ប្រជាជនអឺរ៉ុបជាង១លាននាក់ ធ្វើញត្តិសុំបង្កើតច្បាប់ បង្ខំឲ្យហាងទំនិញកុំបោះចោលចំណីអាហារ ដែលលក់មិនអស់
ខណៈដែលប្រជាជនក្រីក្រ គ្មានអ្វីបរិភោគមានកាន់តែច្រើន ហាងលក់ទំនិញ ផ្សារទំនើបឯណោះ បានបោះចោលក្នុងធុងសម្រាម នូវផលិតផលចំណីអាហាររាប់សិបតោន ដែលខ្លួនលក់មិនអស់ ឬផុតកាលបរិច្ឆេទប្រើប្រាស់។ ដើម្បីប្រយុទ្ធប្រឆាំងនឹងការខ្ជះខ្ជាយចំណីអាហារបែបនេះ សកម្មជនមួយក្រុមនៅអឺរ៉ុប បានផ្តួចផ្តើមគំនិត ធ្វើញត្តិមួយដើម្បីស្នើទៅសហភាពអឺរ៉ុប ឲ្យធ្វើច្បាប់ចាប់បង្ខំ ឲ្យហាងទំនិញទាំងអស់ ត្រូវតែប្រគល់ទំនិញដែលខ្លួនបំរុងបោះចោលទាំងនោះ ទៅឲ្យអង្គការ ឬសមាគមន៍នានា ដើម្បីយកទៅចែកដល់អ្នកដែលគ្មានអ្វីបរិភោគ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
នៅព្រឹកថ្ងៃសៅរ៍ ទី៣កុម្ភៈ វេលាម៉ោង៨ព្រឹក ចំនួនអ្នកចុះហត្ថលេខាគាំទ្រញត្តិ មានដល់ទៅ ១លាន ១រយនាក់។ នេះគឺជាជោគជ័យ មិននឹកស្មានដល់ របស់ក្រុមការងារដែលប្រយុទ្ធប្រឆាំង និងការខ្ជះខ្ជាយចំណីអាហារ។ ញត្តិនេះ ត្រូវបានគេផ្សព្វផ្សាយ នៅលើគេហទំព័រ Change.org នៅក្នុងប្រទេសអឺរ៉ុប ចំនួន៧ មានដូចជាបារាំង អេស្ប៉ាញ អ៊ីតាលី អាល្លឺម៉ង់ ប៊ែលហ្សិក អង់គ្លេស និងក្រិក។
តាមរយៈញត្តិនេះ ក្រុមសកម្មជនបានសំណូមពរ សុំឲ្យសហភាពអឺរ៉ុប បង្កើតច្បាប់មួយ ចាប់បង្ខំទៅហាងលក់ទំនិញទាំងអស់ នៅតាមបណ្តាប្រទេសសមាជិកសហភាពអឺរ៉ុប ទាំង២៧ ថាត្រូវតែប្រគល់ទំនិញជាម្ហូបអាហារ ដែលខ្លួនលក់មិនអស់ ឬផុតកាលបរិច្ឆេទប្រើប្រាស់ ទៅឲ្យអង្គការមនុស្សធម៌នានា ដើម្បីឲ្យគេយកទៅចែកដល់មនុស្សក្រីក្រ ដែលគ្មានអ្វីបរិភោគ។
សូមបញ្ជាក់ថា បច្ចុប្បន្ននេះ មានតែប្រទេសបារាំងមួយទេ ដែលបានអនុម័តច្បាប់ កាលពីឆ្នាំ២០១៦ តម្រូវឲ្យហាង ឬផ្សារលក់ទំនិញទាំងអស់ ប្រគល់ទំនិញជាចំណីអាហារ ដែលលក់មិនអស់ ទៅឲ្យអង្គការមនុស្សធម៌ ជាជាងយកទៅបោះចោលក្នុងធុងសម្រាម។ ពីមុនមក មានអង្គការ ឬសមាគមន៍ជាច្រើន ដែលធ្វើសកម្មភាព ជួយយកអាសារជនក្រីក្រ បានត្អូញត្អែរថា ហាងទំនិញ ឬផ្សារភាគច្រើន មិនព្រមប្រគល់ទំនិញដែលបោះចោល មកឲ្យពួកគេទេ សុខចិត្តយកទៅកំទេចចោល។
ក្នុងរយៈពេល២ឆ្នាំមកនេះ បន្ទាប់ពីបារាំង បានអនុម័តច្បាប់ ចាប់បង្ខំឲ្យហាងទំនិញ ប្រគល់ស្បៀងអាហារ ដែលលក់មិនអស់ ទៅឲ្យអង្គការមនុស្សធម៌នេះមក គឺចំនួនម្ហូបអាហារបរិភោគ ដែលអង្គការនានា បានចែកជូនទៅអ្នកក្រីក្រ បានកើនឡើងដល់ទៅ២២%។ នេះបើតាមការអះអាង របស់លោកស្រី Geneviève Wills ប្រធានកម្មវិធីចំណីអាហារពិភពលោក ប្រចាំប្រទេសបារាំង។
គួរបញ្ជាក់ដែរថា យោងតាមច្បាប់សន្ធិសញ្ញាទីក្រុងលីស្បូន របស់សហភាពអឺរ៉ុប ប្រជាជនអឺរ៉ុបសាមញ្ញទូទៅ អាចផ្តួចផ្តើមគំនិត បង្កើតច្បាប់ថ្មីបាន បើសិនជាបានទទួលការគាំទ្រ យ៉ាងហោចណាស់ ពីមនុស្ស១លាននាក់ នៅតាមបណ្តាប្រទេសយ៉ាងហោចណាស់ ១ភាគ៤ នៃប្រទេសសមាជិកសហភាពអឺរ៉ុបទាំងអស់។ លោក Arash Derambarsh តំណាងប្រជាជនបារាំងនៅតំបន់ Courbevoie និងជាស្ថាបនិកម្នាក់នៃញត្តិនេះ បានលើកឡើងថា លោកសង្ឃឹមថា លោកប្រធានាធិបតីបារាំង នឹងធ្វើសម្នើច្បាប់មួយ ទៅកាន់ក្រុមប្រឹក្សាសហភាព ក្នុងរវាងឆ្នាំ២០១៨នេះ ដើម្បីឲ្យមានច្បាប់រួមទូទាំងអឺរ៉ុប ប្រយុទ្ធប្រឆាំង នឹងការខ្ជះខ្ជាយចំណីអាហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ