រដ្ឋមន្ត្រីការបរទេសបារាំងរិះគន់ក្រុមហ៊ុន ស៊ីម៉ងត៍ Lafarge ដែលចង់ចូលរួមសង់ជញ្ជាំងព្រំដែនអាមេរិក
លោករដ្ឋមន្ត្រីក្រសួងការបរទេសបារាំង បានថ្លែងនៅថ្ងៃព្រហស្បតិ៍ទី ៩ មីនានេះ ដោយបានរិះគន់ក្រុមហ៊ុនផលិតស៊ីម៉ងត៍ដ៏ធំរបស់ស្វីសនិងបារាំង ឈ្មោះ LafargeHolcim ដោយក្រុមហ៊ុននេះ មានបំណងចូលរួមជាមួយរដ្ឋាភិបាលលោកដូណាល់ ត្រាំ ក្នុងការសាងសង់ជញ្ជាំងខណ្ឌចែកព្រំដែន រវាងសហរដ្ឋអាមេរិក និងម៉ិចស៊ិក។ លោករដ្ឋមន្ត្រី បានអំពាវនាវឲ្យ ក្រុមហ៊ុនទាំងអស់ ធ្វើការរកស៊ីប្រកបដោយឧត្តមគតិ និងការទទួលខុសត្រូវ មិនមែនឲ្យតែចំណេញ អ្វីក៏ហ៊ានធ្វើនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
លោក Jean-Marc Ayrault រដ្ឋមន្ត្រីក្រសួងការបរទេសបារាំង បានទាមទារ ឲ្យក្រុមហ៊ុនស៊ីម៉ងត៍ធំបំផុត ឈ្មោះ LafargeHolcim ឲ្យពិចារណាឲ្យបានច្បាស់ មុននឹងសម្រាច់ចិត្ត ចូលរួមសាងសង់ជញ្ជាំងខណ្ឌព្រំដែន ដែលលោកដូណាល់ ត្រាំ ចង់សាងសង់ពុះចែកទឹកដីអាមេរិក និងម៉ុចស៊ិក។ លោករដ្ឋមន្ត្រី បានលើកឡើងថា ទោះបីជាគោលការណ៍ ក្រុមហ៊ុនឯកជនមិនធ្វើនយោបាយ ក៏ដោយ ក៏ប៉ុន្តែ ចូរយើងកុំភ្លេចថា ក្រុមហ៊ុនសហគ្រាសទាំងអស់ មានទំនួលខុសត្រូវក្នុងវិស័យសង្គម និងបរិស្ថាន។ ដូច្នេះ មុននឹងសម្រេចចិត្តធ្វើអ្វីមួយ ត្រូវតែពិចារណា ឲ្យបានល្អិតល្អន់។
លោករដ្ឋមន្ត្រីបារាំង បានបន្តថា ក្រុមហ៊ុនក៏ត្រូវតែពិចារណាឲ្យបានវែងឆ្ងាយ ពីមុខមាត់របស់ខ្លួនដែរ។ បើសិនក្រុមហ៊ុន LafargeHolcim ចូលរួមសង់ជញ្ជាំងដ៏ចំរូងចំរាសនេះ តើអតិថិជនផ្សេងទៀត គេនឹងយល់ឃើញយ៉ាងណា? តើគេអាចបន្តរកស៊ីជាមួយក្រុមហ៊ុនស៊ីម៉ង់ត៍នេះ ទៅថ្ងៃមុខបានទេ?
លោកដូណាល់ ត្រាំ បានសន្យាថានឹងសង់ជញ្ជាំងបេតុង ប្រវែង ១៦០០គីឡូម៉ែត្រ ដើម្បីបិទព្រំដែន កុំឲ្យជនអន្តោប្រវេសន៍ ឆ្លងចូលមកដីអាមេរិក ពីខាងម៉ុចស៊ិក។ គម្រោងសាងសង់នេះ បានបង្កជាការរិះគន់ពីសំណាក់សហគមអន្តរជាតិ និងជាពិសេសបានធ្វើឲ្យកើត ជាវិបត្តិការទូតរវាងសហរដ្ឋអាមេរិក និងម៉ុចស៊ិក។ លោក Jean-Marc Ayrault រដ្ឋមន្ត្រីក្រសួងការបរទេសបារាំង បានលើកឡើងដែរថា លោកបានជួបនឹងរដ្ឋមន្ត្រីការបរទេសម៉ុចស៊ិក ហើយលោកបានសង្កេតឃើញថា រឿងរ៉ាង គឺជារឿងធ្ងន់ធ្ងរ និងមាក់ងាយបំផុត ទៅលើសម្រាប់ម៉ុចស៊ិក។
សូមបញ្ជាក់ផងដែរថា ក្រុមហ៊ុន LafargeHolcim គឺជាក្រុមហ៊ុនផលិតស៊ីម៉ងត៍បារាំង និងស្វីស ដ៏ធំបំផុតជាងគេ។ លោក អគ្គនាយក ក្រុមហ៊ុននេះ បានឆ្លើយប្រាប់ទៅអ្នកយកព័ត៌មានទីភ្នាក់ងារបារាំង AFP ថា ក្រុមហ៊ុនលោក ត្រៀមខ្លួនជានិច្ច ក្នុងការផ្គត់ផ្គង់សម្ភារៈ ចាំបាច់ក្នុងការសាងសង់សំណង់គ្រប់ប្រភេទ នៅសហរដ្ឋអាមេរិក ទោះសំណង់អ្វីក៏ដោយ។ ហើយក្រុមហ៊ុនលោករកស៊ី ដោយមិនចង់លូកដៃក្នុងរឿងនយោបាយទេ។
គួររំលឹកដែរថា កាលពីសប្តាហ៍មុន ក្រុមហ៊ុននេះ LafargeHolcim ក៏បានសារភាពថា ខ្លួនបានចុះកិច្ចព្រមព្រៀងមួយចំនួន ជាមួយនឹងពួកក្រុមភេរវកម្មនៅស៊ីរី ដើម្បីបានបន្តធ្វើសកម្មភាពរកស៊ី នៅក្នុងប្រទេសនេះតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ