សម្តេចប៉ាបរៀបចំការពិនិត្យសុខភាពជនអនាថា៤ពាន់នាក់ ក្នុងទិវាពិភពលោកនៃជនក្រីក្រ
សម្តេចប៉ាប ហ្វ្រង់ស័រ ប្រមុខសង្ឃកាតូលិក បានរៀបចំពិធីសូត្រធម៌ នៅថ្ងៃអាទិត្យទី ១៩ វិច្ឆិកានេះ ដែលជាទិវាពិភពលោកនៃជនក្រីក្រ។ ស្ថិតក្នុងឱកាសនេះ សម្តេចប៉ាប បានអញ្ជើញជនអនាថា ចំនួន៤ពាន់នាក់ ឲ្យចូលរួម នៅទីលានខាងមុខព្រះវិហារសាំងព្យែរ នៃបុរីវ៉ាទីកង់ ដើម្បីធ្វើពិធីសូត្រធម៌ និង បរិភោគចំណីអាហារ។ ក្រុមស្ម័គ្រចិត្ត ក៏ាមានរៀបចំមណ្ឌល់សុខភាពមួយ នៅក្បែរទីនោះ ដើម្បីព្យាបាល និងពិនិត្យសុខភាព ដល់ជនអនាថា ដែលសុទ្ធតែ ជាអ្នករស់នៅតាមផ្លូវ គ្មានផ្ទះសំបែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
លោក Jorge Bergoglio ដែលជាអ្នកផ្តួចផ្តើមគំនិតរៀបចំកម្មវិធីនេះ បានបញ្ជាក់ថា ព្រះវិហារកាតូលិក គឺប្រៀបបានជាមន្ទីរពេទ្យស្រុកស្រែ ដែលជាទីកន្លែងព្យាបាលផ្លូវចិត្ត និងផ្លូវកាយឲ្យបានរឹងមាំ ឲ្យដល់ជនដែលគ្មានទីពឹងពំនាក់។ នៅថ្ងៃនេះ ទីលាន Saint Pierre គឺជានិម្មិតរូបនៃការជួយយកអាសារនេះ តាមរយៈការរៀបចំ ឲ្យមានមណ្ឌលពិនិត្យសុខភាព និងព្យាបាលជំងឺ ឲ្យដល់ជនអនាថា ប្រមាណជា៤ពាន់នាក់។
ក្រុមគ្រូពេទ្យ និងអ្នកជំនាញសុខភាព ជាច្រើន បានមកចូលរួម ក្នុងថ្ងៃនេះ នៅខាងមុខទីលាន សាំងព្យែរ នៃបុរីវ៉ាទីកង់ មានដូចជាអ្នកជំនាញផ្នែកជួសឈាម ពិនិត្យរកមេរោគ អ្នកជំនាញរោគបេះដូង គ្រូពេទ្យជំងឺសើរស្បែក គ្រូពេទ្យរោគស្ត្រី និងគ្រូពេទ្យជំនាញជំងឺឆ្លង ជាដើម។ គ្រូពេទ្យជំងឺសើរស្បែកម្នាក់ បានបញ្ជាក់ថា លោកមិនដែលធ្លាប់ជួបនឹងករណីរលាកស្បែក និងមេរោគកន្តួលរមាស់ ច្រើនដូចថ្ងៃនេះទេ។ ក្រុមជនអនាថា ដែលមកពិនិត្យ សុទ្ធតែមានបញ្ហាស្បែក ដោយសារតែពួកគេ ពុំមានលទ្ធភាព រស់នៅជាមួយនឹងអនាម័យត្រឹមត្រូវ។
សម្តេចប៉ាប ហ្វ្រង់ស័រ បានអញ្ជើញមកមើលដោយផ្ទាល់ នៅមណ្ឌលសុខភាពបណ្តោះអាសន្ន ដែលបានរៀបចំនៅខាងមុខព្រះវិហារ Saint Pierre ដោយទឹកមុខញញឹម និងបានថ្លែងអំណរគុណ ដល់ក្រុមគ្រូពេទ្យ និងអ្នកស្ម័គ្រចិត្តទាំងអស់។
ក្នុងសន្ទរកថា របស់សម្តេចប៉ាប ក្រោយពិធីសូត្រធម៌ ដែលត្រូវបានផ្សាយផ្ទាល់ នៅតាមវិហារកាតូលិក ជាច្រើន ទូទាំងពិភពលោក សម្តេចប៉ាប បានឧទ្ទិសទីវាពិភពលោកនៃជនក្រីក្រនេះ ឲ្យដល់មនុស្សជាតិទាំងអស់ ឲ្យខិតខំតាំងចិត្តឲ្យមានមេត្តាធម៌ ហុចដៃជួយយកអាសារមនុស្សផងគ្នា ដែលត្រូវការជំនួយទីពឹង។
សាររបស់សម្តេចប៉ាប ក៏បានផ្តោតន័យទៅដល់ ការអំពាវនាវ ឲ្យអាជ្ញាធរទាំងអស់ បើកចិត្តឲ្យទូលាយ ជួយយកអាសារ សង្គ្រោះជនភៀសខ្លួន ដែលរត់គេចពីសង្រ្គាម ពីភាពក្រីក្រ។ សម្តេចប៉ាប មានប្រសាសន៍ថា ទោះអ្នកនោះកាន់សាសនាអ្វីក៏ដោយ តែនៅពីក្រោយនេះ គឺមនុស្ស គឺជីវិត គឺសេចក្តីទុក្ខវេទនា ដែលគ្នាបានឆ្លងកាត់។ ដូច្នេះក្នុងនាមជាមនុស្សដូចគ្នា យើងមិនត្រូវធ្វើរបង សង់ជញ្ជាំង បំភ្លេចចោលនូវសេចក្តីមេត្តា ដែលមាននៅក្នុងចិត្ត របស់មនុស្សយើងពីកំណើតមកនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ