សហភាពអឺរ៉ុប ត្រូវត្រៀមខ្លួនព្យាបាលជម្ងឺ ទោះអង់គ្លេសចេញរឺមិនចេញ
ចុះផ្សាយនៅថ្ងៃ៖
ស្តាប់ - ០៥:៣៦
ថ្ងៃទី២៣ មិថុនានេះ ជាថ្ងៃដែលប្រជាជនអង់គ្លេស ត្រូវទៅបោះឆ្នោតប្រជាមតិ ដើម្បីសម្រេចថា ប្រទេសខ្លួន ត្រូវដើរចេញ រឺក៏បន្តនៅក្នុងសហភាពអឺរ៉ុបតទៅទៀត។ យោងតាមលទ្ធផលស្ទាបស្ទង់មតិចុងក្រោយ និងក្រោយពេលដែលស្ត្រីអ្នកតំណាងរាស្ត្រគាំទ្រសហភាពអឺរ៉ុបម្នាក់ ត្រូវបានជនជ្រុលនិយមធ្វើឃាត គេសង្កេតឃើញថា សម្លេងអ្នកគាំទ្រចង់ឲ្យអង់គ្លេសដើរចេញពីសហភាពអឺរ៉ុប ហាក់បានចុះថយបន្តិចវិញ។ តែទោះជាលទ្ធផលយ៉ាងណាក៏ដោយ អ្នកដែលត្រូវត្រៀមខ្លួន ទប់ទល់ជាមួយនឹងបញ្ហា គឺសហភាពអឺរ៉ុប ព្រោះ ទោះអង់គ្លេសដើរចេញ រឺមិនដើរចេញ ក៏អឺរ៉ុបត្រូវតែត្រៀមខ្លួន ធ្វើកំណែទម្រង់ឲ្យស៊ីជំរៅ ដើម្បីឱបក្រសោបមហាគ្រួសារអឺរ៉ុប ឲ្យកក់ក្តៅឡើងវិញ។
មកដល់នាទីចុងក្រោយ ថ្នាក់ដឹកនាំសហភាពអឺរ៉ុប នៅក្រុងព្រុចសែល នៅតែចិញ្ចឹមកូនចិត្តសង្ឃឹមថា ប្រជាជនអង់គ្លេស ពិតជាមិនបោះឆ្នោតគាំទ្រឲ្យប្រទេសខ្លួនដើរចេញពីសហភាពអឺរ៉ុបទេ។ ប៉ុន្មានសប្តាហ៍មុននេះ សារព័ត៌មានចុះព្រោងព្រាតអំពី ផលវិបាកទាំងល្អទាំងអាក្រក់ ទាំងសម្រាប់អង់គ្លេស ទាំងសម្រាប់សហភាពអឺរ៉ុប ក្នុងករណីដែលអង់គ្លេស សម្រេចដកខ្លួនចេញ។
ដើរចេញក៏ឈឺចាប់ បន្តនៅក៏ឈឺចាប់៖
តែទោះជាហេតុផល នៅពីក្រោយការសម្រេចចិត្តរបស់ប្រជាជនអង់គ្លេស យ៉ាងណា ក៏ដោយ ការធ្វើប្រជាមតិនេះ គឺជាឱកាសមួយ ដែលសហភាពអឺរ៉ុបខ្លួនឯងត្រូវត្រលប់ទៅសួរខ្លួនឯងវិញថា កន្លងមកសហភាពអឺរ៉ុបមានចំណុចខ្សោយ មានចំណុចខ្វះខាតអ្វីខ្លះ ទើបធ្វើឲ្យប្រជាជនអង់គ្លេស មានការស្ទាក់ស្ទើរលែងចង់រួមរស់ ក្នុងមហាគ្រួសារអឺរ៉ុបតទៅទៀត។ អឺរ៉ុបត្រូវតែទទួលស្គាល់ការពិត ត្រៀមខ្លួនទប់ទល់ កុំឲ្យជំងឺស្អប់អឺរ៉ុបនេះ រីករាលដាលទៅដល់ប្រទេសសមាជិកផ្សេងទៀត។ តួយ៉ាងប្រទេសហូឡង់ ដែលចង់យកគំរូតាមអង់គ្លេស ទៅថ្ងៃមុខ។
ជាការពិត នៅពីក្រោយការធ្វើការឃោសនាអូសទាញ ឲ្យមនុស្សផ្អើលឈូរឆ នាំគ្នាបោះឆ្នោតដើរចេញពីអឺរ៉ុប គឺមានអ្នកនយោបាយ និងជាពិសេសមហាសេដ្ឋីមានឥទ្ធិពលមួយចំនួន ដែលជួយចំណាយលុយ ព្រោះពួកអ្នករកស៊ីអស់ទាំងនេះ មិនចង់ស្ថិតនៅក្រោមគំនៀបសង្កត់របស់វិធានច្បាប់ដ៏តឹងរឹង របស់សហភាពអឺរ៉ុបទៀតទេ។ ពួកអ្នករកស៊ីលោតឆត្រ័អស់ទាំងនេះ ចង់ឲ្យអង់គ្លេសដើរចេញពីអឺរ៉ុប ដើម្បីងាយស្រួលរកស៊ីនៅក្នុងផ្សារភាគហ៊ុនក្រុងឡុងដ៍ ហើយយកលុយទៅលាក់ដើម្បីគេចពន្ធរដ្ឋ។ សហភាពអឺរ៉ុប មានវិធានច្រើន ដើម្បីតាមដានក្រុមហ៊ុនលោតឆ័ត្រទាំងនោះ មិនឲ្យធ្វើល្មើសលាក់លុយ រឺក៏លាងលុយក្រខ្វក់ ក្នុងទីផ្សារអឺរ៉ុប។
តែក៏មិនមែនមានន័យថា សហភាពអឺរ៉ុបល្អឥតខ្ចោះដែរ។ វិបត្តិជនភៀសខ្លួន វិបត្តិសេដ្ឋកិច្ច បំណុលសាធារណៈរបស់ប្រទេសសមាជិកសហភាពអឺរ៉ុប គឺជាជំងឺរ៉ាំរ៉ៃ រាប់ឆ្នាំមកហើយ។ បារាំង និងអាល្លឺម៉ង់ ដែលជាបង្គោលគ្រិះ នៃការកសាងមហាគ្រួសារអឺរ៉ុប អាចទប់ទល់ ដោះស្រាយបញ្ហាទាំងអស់នេះបានដែររឺទេ? ឥឡូវកាលៈទេសៈនេះ បារាំងនិងអាល្លឺម៉ង់ ត្រូវត្រៀមខ្លួនចាត់វិធានការ ក្រោយពេលដែលដឹងលទ្ធផលប្រជាមតិរបស់អង់គ្លេស។
រក្សាសាមគ្គីភាពរវាងសមាជិកដែលនៅសល់ ឲ្យរឹងមាំ៖
គេត្រូវតែត្រៀមសេណារីយោទាំងពីរនេះ ទុកជាមុន។ បើក្នុងករណីអង់គ្លេសត្រូវដើរចេញ សហភាពអឺរ៉ុប បានផ្ញើរសារច្បាស់លាស់ណាស់ថា អង់គ្លេសកុំសង្ឃឹមថានឹងបានមកក្រេបជញ្ជក់ផលប្រយោជន៍ របស់ទីផ្សារសេដ្ឋកិច្ចរួម នៃសហភាពអឺរ៉ុបទៀតឲ្យសោះ។ បើចេញ គឺចេញឲ្យផុត។ នីតិវិធីចរចាផ្តាច់ខ្លួនចេញពីសហភាពអឺរ៉ុប ដោយយោងតាមមាត្រា៥០ នៃសន្ធិសញ្ញាសហភាព នឹងត្រូវចាប់ផ្តើមភ្លាម។ ការផ្តាច់ខ្លួន មិនមែនធ្វើមួយថ្ងៃបានទេ។ វាត្រូវឆ្លងកាត់ដំណាក់កាល ជាច្រើន និងច្រើនផ្នែក ច្រើនវិស័យ។ ក្នុងករណីនេះ ការចរចារវាងសហភាពអឺរ៉ុប និងអង់គ្លេស អាចនឹងត្រូវធ្វើរយៈពេលយ៉ាងហោចណាស់ ១ឆ្នាំ។ នេះបើតាមសម្តីមន្ត្រីធំម្នាក់នៅព្រុចសែល។
បន្តែសួរថា តើប្រទេសសមាជិកទាំង២៧របស់សហភាពអឺរ៉ុប អាចនឹងទ្រាំទ្រនឹងស្ថានភាព កាត់ផ្តាច់ទំនាក់ទំនងសេដ្ឋកិច្ចជាមួយអង់គ្លេសនេះ បានដូចៗគ្នាដែររឺទេ? អ្វីដែលសហភាពអឺរ៉ុបត្រូវប្រុងប្រយ័ត្ន គឺរក្សាសាមគ្គីភាពរវាងសមាជិកដែលនៅសល់ ឲ្យបានរឹងមាំ។ អាល្លឺម៉ង់ និងហូឡង់ មានចំណងសេដ្ឋកិច្ចច្រើនណាស់ជាមួយអង់គ្លេស។ ដូច្នេះគេពិបាកនឹងទុកចិត្តណាស់ ថាប្រទេសទាំងនេះសុខចិត្តធ្វើពលីកម្មសេដ្ឋកិច្ចរបស់ខ្លួននោះ។ មួយវិញទៀត ការរក្សាសាមគ្គីភាពក្នុងសហភាពអឺរ៉ុប មិនមែនធ្វើឡើងតែក្នុងតំបន់ចាយលុយអឺរ៉ូ តែត្រូវធ្វើជាទូទៅ ជាមួយប្រទេសសមាជិកដ៏ទៃទៀត ចៀសវាងការបែកបាក់ផ្ទៃក្នុងកាន់តែខ្លាំង។
សមាហរណកម្មបន្ថែម រឺក៏ផ្អាកសិន?
អង់គ្លេស មិនទាន់ដើរចេញផង ផ្ទៃក្នុងអឺរ៉ុបកំពុងជជែកគ្នាតឹងសរសៃករួចទៅហើយ ស្តីពីអនាគតអឺរ៉ុប។ តើអឺរ៉ុប ត្រូវបន្តដើរតាមផ្លូវចាស់ រឺត្រូវពិចារណារកវិធីធ្វើសមាហរណកម្មថ្មីបន្ថែម ដើម្បីឲ្យសមាជិកដែលនៅសេសសល់ កាន់តែមានសម្ព័ន្ធនឹងគ្នាជាងនេះទៀត? ត្រង់បញ្ហានេះ ថ្នាក់ដឹកនាំអាល្លឺម៉ង់ និងបារាំង ហាក់ដូចជាមានជំហមិនស្របគ្នាទេ។
សម្រាប់អាល្លឺម៉ង់ គេមិនអាចធ្វើអ្វីឲ្យលើសនេះបានទេ សម្រាប់ពេលនេះ ព្រោះវាមិនខុសពីយកសាំងទៅចាក់លើភ្លើងទេ។ មតិសាធារណៈទូទៅនៅអឺរ៉ុប កំពុងតែមិនពេញចិត្តនឹងនយោបាយរបស់អឺរ៉ុបស្រាប់ទៅហើយ ដូច្នេះ អឺរ៉ុបមិនអាចទៅសម្រេចអ្វីមួយ ដើម្បីចាប់បង្ខំប្រទេសមាជិក ឲ្យធ្វើសម្បទានសមាហរណកម្មលើសនេះទៀតទេ។ ប៉ុន្តែសម្រាប់បារាំង លោកប្រធានាធិបតីបានថ្លែងថា សហភាពអឺរ៉ុប នៅមានលទ្ធភាពអាចធ្វើសមាហរណកម្មលើសនេះទៀត ជាពិសេសទាក់ទិនទៅនឹងវិស័យសន្តិសុខ និងការពារជាតិ។
ជាការពិត សហភាពអឺរ៉ុប មានគម្រោងបង្កើតជាទីបញ្ជាការកងទ័ពរួមមួយ ដែលមានទីតាំងនៅព្រុចសែល ដើម្បីធ្វើឲ្យកិច្ចសហប្រតិបត្តិការយោធា និងសន្តិសុខ មានប្រសិទ្ធិភាព។ តែកន្លងមកគម្រោងនេះ តែងតែត្រូវបានអង់គ្លេសបដិសេធជានិច្ច។ ចុះបើសិនជាអង់គ្លេស ដើរចេញ លែងជាសមាជិកអឺរ៉ុបទៀត តែគម្រោងនេះ អាចចេញទៅរួចដែររឺទេ?
អង់គ្លេសអត្មានិយម ចង់ចូលចង់ចេញស្រេចតែនឹងចិត្ត៖
បើក្នុងករណីដែលអង់គ្លេសបោះឆ្នោត ថានឹងនៅបន្តក្នុងមហាគ្រួសារអឺរ៉ុប ក៏អឺរ៉ុបនៅតែពិបាកចិត្តដដែល។ កែវវាបានប្រេះស្រាំទៅហើយ។ ទំនាក់ទំនងរវាងសហភាពអឺរ៉ុប និងរដ្ឋាភិបាលអង់គ្លេស នឹងលែងដូចមុនទៀតហើយ។ ហើយក៏មិនមែនមានន័យថាពីពេលនេះទៅ សហភាពអឺរ៉ុបត្រូវតែថ្នមចិត្តអង់គ្លេស ដើម្បីកុំឲ្យអង់គ្លេសមានបំណងដើរចេញម្តងទៀត នោះក៏ទេដែរ។
សម្រាប់មតិសាធារណៈ ដែលនឿយណាយនឹងចរិកក្រអឺតក្រទមរបស់អង់គ្លេស គេនិយាយថាសហភាពអឺរ៉ុបមិនមែនជារបស់អង់គ្លេសតែម្នាក់ឯងទេ។ បើអង់គ្លេសអត្មានិយម ចង់ដើរចេញក៏ចេញទៅចុះ។ ចូរកុំភ្លេចថា កាលពីដំបូង ដោយឃើញផលប្រយោជន៍របស់ទីផ្សាររួមអឺរ៉ុប នៅចុងទសវត្សឆ្នាំ៦០ គឺអង់គ្លេសទេដែលសុំអង្វរទទូច ដើម្បីចូលជាសមាជិកអឺរ៉ុប ម្តងជាពីរដង ទម្រាំគេសម្រេចឲ្យចូល។ អង់គ្លេសតែងតែទាមទារលក្ខន្តិកៈពិសេសសម្រាប់ខ្លួនជានិច្ច។ អង់គ្លេស វាយឫក មិនព្រមចាយលុយអឺរ៉ូ ដូចប្រទេសដ៏ទៃទេ។ នៅមានផែនការអឺរ៉ុបច្រើនទៀត ដែលត្រូវធ្លាក់ទឹក ដោយសារតែអង់គ្លេសមិនព្រម។ ចេញរឺមិនចេញ គឺវាជាការសម្រេចចិត្ត និងការទទួលខុសត្រូវរបស់ប្រជាជនអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ