ភេរវកម្មនៅស្តុកខូម៖ ចាប់បានជនសង្ស័យម្នាក់ តែគ្មានការប្រកាសទទួលពីក្រុមជីហាតណាមួយ
កាលពីថ្ងៃសុក្រទី ៧មេសា ម្សិលមិញ ទីក្រុងស្តុកខូមរាជធានីស៊ុតអែត បានរងនូវការវាយប្រហារភេរវកម្ម ដោយជនដៃដល់បានបើករថយន្តបុកសម្លាប់មនុស្ស យ៉ាងហោចណាស់៤នាក់ និង១៥នាក់ រងរបួសធ្ងន់។ ប៉ុន្មានម៉ោងក្រោយកើតហេតុ ជនសង្ស័យម្នាក់ ដែលគេជឿថា ជាជនដៃដល់បើករថយន្តនោះ ត្រូវបានចាប់ខ្លួន។ យ៉ាងណាក៏ដោយ មកទល់ពេលនេះ នៅមិនទាន់មានក្រុមភេរវកម្មជីហាតណាមួយ ចេញមុខមកទទួលខុសត្រូវ ថាជាអំពើភេរវកម្ម បញ្ជាដោយក្រុមខ្លួននៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
នៅក្រោយហេតុការណ៍ភេរវកម្ម កណ្តាលរាជធានីស្តុកខូម កាលពីរសៀលថ្ងៃសុក្រទី៧មេសា ជនសង្ស័យម្នាក់ ត្រូវបានគេចាប់ខ្លួននៅតំបន់Mästa មិនឆ្ងាយប៉ុន្មាន ខាងជើងក្រុងស្តុកខូម កាលពីវេលាយប់ថ្ងៃសុក្រដដែល។ ព្រះរាជអាជ្ញាស្តុកខូម មិនបានបញ្ជាក់អ្វីលំអិតច្រើនទេ អំពីអត្តសញ្ញាណរបស់ជនសង្ស័យដែលគេឃាត់ខ្លួន គ្រាន់តែបញ្ជាក់ថា ជននេះត្រូវដាក់ឲ្យស្ថិតក្រោមនីតិវិធីព្រហ្មទណ្ឌ ខ្ពស់បំផុត នៃបទល្មើសឃាតកម្ម ដែលមានលក្ខណៈ ជាអំពើភេរវកម្ម។
ដោយឡែក បើតាមការចុះផ្សាយរបស់បណ្តាញព័ត៌មានស៊ុយអែត បានឲ្យដឹងថា ជនសង្ស័យ ដែលត្រូវគេឃាត់ខ្លួន គឺជាបុរស ជនជាតិអ៊ូសបេកគីស្ថាន មានអាយុ៣៩ឆ្នាំ ហើយគឺជាអ្នកនិយមគាំទ្រ ទ្រឹស្តីអ៊ីស្លាមផ្តាច់ការរបស់ក្រុមជីហាតអង្គការរដ្ឋអ៊ីស្លាម។ កាលពីយប់ថ្ងៃសុក្រដែរ ទូរទស្សន៍ជាតិស៊ុយអែត បានផ្សាយថា នៅក្នុងរថយន្តបង្កហេតុ គេបានរកឃើញគ្រាប់ផ្ទុះជាច្រើនគ្រាប់។
សមត្ថកិច្ចស៊ុយអែត បានធ្វើការចោទប្រកាន់ជាផ្លូវការ តែទៅលើជនសង្ស័យម្នាក់នេះតែប៉ុណ្ណោះ។ គេកំពុងស្រាវជ្រាវបន្ថែមទៀត បើសិនជាជននេះ មានបក្សពួក ដែលបានចូលរួមរៀបចំសកម្មភាពភេរវកម្មនេះ។ យ៉ាងណាក៏ដោយ មកទល់ពេលនេះ នៅមិនទាន់មានបណ្តាញភេរវកម្មណាមួយ ចេញមុខមកអះអាងទទួលខុសត្រូវឡើយ។
សូមរំលឹកថា ជនដៃដល់ បានបើករថយន្តកាមីញ៉ុង មួយគ្រឿង ដែលខ្លួនបានលួច ហើយបើកសំដៅបុកមនុស្សជាច្រើននាក់ នៅតាមផ្លូវស្ថិតនៅក្នុងទីប្រជុំជនធំបំផុត កណ្តាលក្រុងស្តុកខូម។ បន្ទាប់ពីបានបុករះមនុស្សជាច្រើននាក់ ឃាតករបានបើកទៅបំបុកនឹងកញ្ចក់ហាងទំនិញ បន្ទាប់មក៏រត់គេចខ្លួន។ មានអ្នកស្លាប់៤នាក់ក្នុងហេតុការណ៍នេះ ហើយក្នុងចំណោមអ្នករបួស១៥នាក់ មាន៩នាក់ កំពុងស្ថិតក្នុងស្ថានភាពធ្ងន់ធ្ងរ។
គួរបញ្ជាក់ដែរថា ភេរវកម្មបើករថយន្តបុករះមនុស្សនេះ មានលក្ខណៈស្រដៀងនឹងភេរវកម្ម នៅទីក្រុងនីស នៅទីក្រុងឡុង និងនៅទីក្រុងប៊ែកឡាំង។ ភេរវកម្មនៅទីក្រុងស្តុកខូមនេះ គឺជាភេរវកម្មលើកទីបីហើយ ដែលកើតមាននៅអឺរ៉ុប ក្នុងរយៈពេលមិនដល់៣អាទិត្យផង បន្ទាប់ពី ភេរវកម្មនៅទីក្រុងឡុងដ៍ និងនៅទីក្រុងសាំងប៉េតេសបួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ