ប្រទេសសមាជិកសហភាពអឺរ៉ុប ទាំង២៧ បានយល់ស្របគ្នា ទុកពេលវេលា ឲ្យរដ្ឋាភិបាលអង់គ្លេស ក្នុងការត្រៀមរៀបចំខ្លួន មុននឹងចាប់ផ្តើមសម្រេចធ្វើនីតិវិធីផ្តាច់ខ្លួនជាស្ថាពរ។ ទុកពេលវេលា តែមិនមានន័យថា វាត្រូវអូសបន្លាយទៅរាប់ខែនោះទេ។ នេះជាគោលជំហរដ៏រឹងមាំ របស់សហភាពអឺរ៉ុប ដែលមិនចង់ដាក់សម្ពាធខ្លាំងលើអង់គ្លេសនាពេលនេះ តែក៏គេមិនចង់ឲ្យអង់គ្លេសធ្វើផ្គរធ្វើភ្លៀងស្រេចតែនឹងចិត្តដែរ។ ចំណែកផ្ទៃក្នុងនយោបាយរបស់អង់គ្លេសឯណោះវិញ កំពុងតែរង្គោះរង្គើរជាខ្លាំង។ គណបក្សប្រឆាំងអង់គ្លេស កំពុងផ្ទុះបែក ឯចំណែកគណបក្សកាន់អំណាចរបស់លោក ដាវីដ ខាមឺរ៉ុន ក៏កំពុងតែប្រកែកគ្នា រកអ្នកមកធ្វើនាយករដ្ឋមន្ត្រីមិនបាន។ អង់គ្លេសកំពុងស្ថិតនៅមាត់ជ្រោះ ដ៏សែនគ្រោះថ្នាក់។
ដេវីដ ខាមឺរ៉ុន លេបបាយទាំងទទឹងក៖
លោកដេវីដ ខាមឺរ៉ុន បានទៅចូលរួមកិច្ចប្រជុំកំពូលនៃសហភាពអឺរ៉ុបកាលពីថ្ងៃអង្គារ ទី២៨មិថុនា ជាលើកចុងក្រោយ។ វាជាការចូលរួមដ៏សែនទើសទ័ល ដែលទាមទារឲ្យលោក ដាវីដ ខាមឺរ៉ុន ត្រូវធ្វើមុខឲ្យក្រាស ព្រោះត្រូវប្រឈមមុខនឹងសំណួរ ដេញដោលរបស់មេដឹកនាំអឺរ៉ុបផ្សេងទៀត ក៏ដូចជាសំណួររបស់អ្នកសារព័ត៌មាន។ អ្នកកាសែតម្នាក់ បានស្រែកសួរថា តើលោកដាវីដ ខាមឺរ៉ុន មានស្តាយក្រោយទេ? លោកខាមឺរ៉ុន បានខាំមាត់ទប់ចិត្តមិនឆ្លើយ ក្នុងទឹកមុខយ៉ាងមាំ។
សារព័ត៌មាន The Guardian បានសរសេរថា វាមិនខុសពីយើងតែម្នាក់ឯង ត្រូវអង្គុយក្នុងតុបាយជាមួយមនុស្ស២៧នាក់ផ្សេងទៀត ដែលគេគ្រប់គ្នា ដឹងយ៉ាងច្បាស់ អំពីកំហុស និងទង្វើល្ងង់ខ្លៅរបស់យើង សួរថាតើយើងមានអារម្មណ៍ បែបណា? តើលេបបាយចូលដែររឺទេ? តែយ៉ាងណាក៏ដោយ លោកប្រធានាធិបតីបារាំង បានអះអាងថា ប្រទេសសមាជិកផ្សេងទៀត មិនបានឆ្លៀតឱកាសនេះ ទៅបន្ទោសបង្អាប់ រឺបំបាក់មុខលោកដេវីដ ខាមឺរ៉ុន ទេ។ សមាជិកគ្រប់គ្នា ដឹងនិងយល់ពីសម្ពាធ ដែលលោកខាមឺរ៉ុន ត្រូវទទួលរងនាពេលនេះ។
សភាចលាចល គ្មានលទ្ធភាពរកនាយករដ្ឋមន្ត្រីថ្មី៖
សម្ពាធដ៏សែនធ្ងន់សម្រាប់លោក ដេវីដ ខាមឺរ៉ុន ក៏ដូចជារដ្ឋាភិបាលអង់គ្លេសនាពេលនេះ គឺធ្វើយ៉ាងណា ស្វែងរកដំណោះស្រាយនយោបាយផ្ទៃក្នុង ហើយឈានទៅតែងតាំងនាយករដ្ឋមន្ត្រីថ្មីមួយរូបឲ្យបាន ដើម្បីចាប់ផ្តើមនីតិវិធីផ្តាច់ខ្លួន ចេញពីសហភាពអឺរ៉ុប។ អឺរ៉ុបបានបញ្ជាក់យ៉ាងរន្ធាន់ថា អង់គ្លេសត្រូវតែប្រញ៉ាប់ប្រញ៉ាល់ មិនត្រូវអូសបន្លាយរាប់ខែទេ។
នៅក្នុងគណបក្សអភិរក្សនិយមរបស់លោក ខាមឺរ៉ុន គឺកំពុងសម្លឹង ទៅលើបុគ្គលពីររូប ដែលអាចនឹងក្លាយជានាយករដ្ឋមន្ត្រី គឺទីមួយ លោក Boris Johnson អតីតចៅហ្វាយក្រុងឡុងដ៍ នឹងជាមេដឹកនាំឃោសនាប្រឆាំងអឺរ៉ុបមួយរូប និងទីពីរគឺលោកស្រី Theresa May ដែលបច្ចុប្បន្នជារដ្ឋមន្ត្រីក្រសួងមហាផ្ទៃ។
លោក Boris Johnson គេចមិនផុតពីការរិះគន់ទេ។ ប៉ុន្មានថ្ងៃនេះ ពេលលោកចេញពីផ្ទះម្តងៗ គឺមានមនុស្សរាប់រយនាក់ នៅចាំស្វាគមន៍ ជាមួយពាក្យស្រែកជេរប្រទេចផ្តាសា ព្រោះពួកគេចោទថា ប្រជាជនភាគច្រើនបានបោះឆ្នោតដើរចេញពីសហភាពអឺរ៉ុប គឺដោយសារតែពាក្យឃោសនាបោកប្រាស់ ប្រឌិតបំភ័យ របស់លោក Boris Johnson នេះឯង។ អ្នករិះគន់បានលើកឡើងពីភាពគ្មានការទទួលខុសត្រូវរបស់លោក Boris Johnson ដែលអំពាវនាវឲ្យបោះឆ្នោតចេញពីអឺរ៉ុប ក៏ប៉ុន្តែមិនបានសិក្សា និងត្រៀមលក្ខណៈដាក់យុទ្ធសាស្ត្រ ធ្វើយ៉ាងណា ធានាមិនឲ្យអង់គ្លេសជួបវិបត្តិទេ។
ចំណែកគណបក្សការងារ ដែលជាបក្សប្រឆាំងឯណោះ កំពុងបែកបាក់គ្នាជា១០០ចំរៀក។ លោក Jeremy Corbyn ប្រធានាគណបក្សនេះ ត្រូវបានតំណាងរាស្ត្រមកពីគណបក្សខ្លួន១៧២នាក់ ផ្តិតមេដៃទាមទារឲ្យចុះចេញពីតំណែង។ តែលោកម្នាក់នេះនៅតែក្រាញមិនព្រមចុះ ខណៈដែលសមាជិកផ្សេងទៀត បាននាំគ្នាលាឈប់ជាបន្តបន្ទាប់។ ចលាចលមានពេញក្នុងសភាអង់គ្លេស។ តំណាងរាស្ត្រគ្រប់គ្នា កំពុងវង្វេងវង្វាន់ រកមេដឹកនាំមិនបាន ដើម្បីត្រៀមខ្លួនរៀបចំរដ្ឋាភិបាលថ្មី។
ខឹងខុស ខឹងខាត៖
បើយើងចុះទៅមើលនៅតាមដងផ្លូវឯណោះវិញ យើងឃើញមានបាតុកម្ម ការស្រែកតវ៉ា របស់ប្រជាជនដែលទាមទារចង់ឲ្យលប់ចោលលទ្ធផលប្រជាមតិ ដែលបាននាំអង់គ្លេសឲ្យធ្លាក់ក្នុងគ្រោះថ្នាក់។ កាលពីល្ងាចថ្ងៃចន្ទ មានអ្នកចូលរួមគាំទ្រ សុំឲ្យមានការធ្វើប្រជាមតិជាថ្មី ចំនួនដល់ទៅ ៣លាន៨សែននាក់។ ហើយអ្វីដែលគួរកត់សម្គាល់ យោងតាមស្ថិតិបោះឆ្នោតកាលពីថ្ងៃទី២៣មិថុនា ភាគច្រើននៃអ្នកបោះឆ្នោតព្រមឲ្យអង់គ្លេសចេញ គឺសុទ្ធសឹងតែមនុស្សវ័យចំណាស់ ចាប់ពីអាយុ៥០ឆ្នាំឡើងទៅ។ ផ្ទុយទៅវិញ យុវជនវ័យក្មេង និងវ័យកណ្តាល ពួកគេបានបោះឆ្នោតប្រឆាំងនឹងការចាកចេញរបស់អង់គ្លេស។ នេះសបង្ហាញពីគម្លាតគ្នា នៃការយល់ឃើញរបស់ប្រជាជនអង់គ្លេស រវាងមនុស្សវ័យក្មេង និងមនុស្សចាស់។
ការសម្រេចចិត្តរបស់មនុស្សចាស់ គឺវាបានលាយលំទៅដោយទឹកចិត្តស្រណោះអាល័យ ដល់អតីតកាលមហារុងរឿង ដែលអង់គ្លេសធ្លាប់ជាចក្រភព ដ៏មានអំណាចតែឯង ព្រមទាំងអារម្មណ៍ជាតិនិយមជ្រុល ចាស់គំរិល ភ័យខ្លាចបរទេសមករស់នៅក្នុងទឹកដីកំណើតខ្លួន។ ចំណែកយុវជនវ័យក្មេងវិញ ពួកគេមានស្មារតីបើកចំហរទូលាយ ទទួលយកការរួមរស់ ជាមួយបណ្តាប្រទេសអឺរ៉ុបផ្សេងទៀត។ សម្រាប់យុវជន រួមរស់ជាមួយអឺរ៉ុប គឺវាមិនមែនជាជម្រើសទេ តែវាជាការចាំបាច់ ក្នុងបរិបទសេដ្ឋកិច្ចសកលភាវូបនីយកម្ម។
ស្កុតលែនដ៍ចង់នៅជាមួយអឺរ៉ុប ជាងនៅជាមួយអង់គ្លេស៖
វិបត្តិដ៏ធ្ងន់របស់អង់គ្លេសមួយទៀត គឺគ្រោះថ្នាក់នៃការបះបោរទាមទារផ្តាច់ខ្លួន របស់រដ្ឋសមាជិក។ តំបន់ស្វ័យ័តស្កុតលែនដ៍ បានធ្វើប្រជាមតិម្តងទៅហើយ កាលពីឆ្នាំ២០១៤ ដើម្បីយកឯករាជ្យផ្តាច់ខ្លួនចេញពីអំណាចរបស់ទីក្រុងឡុងដ៍។ តែកាលនោះលទ្ធផលប្រជាមតិ បានជ័យជំនះទៅខាងអ្នកមិនព្រម។ ក៏ប៉ុន្តែជាមួយនឹងកាលៈទេសៈថ្មី ដែលអង់គ្លេសដើរចេញពីអឺរ៉ុប គឺវានឹងធ្វើឲ្យប្រជាជនតំបន់ស្កុតលែនដ៍ប្តូរចិត្ត។
លទ្ធផលប្រជាមតិថ្ងៃទី២៣មិថុនាបង្ហាញថា នៅស្កុតលែនដ៍ ប្រជាជនដល់ទៅ៦២% ដែលចង់រួមរស់ក្នុងអឺរ៉ុប។ ហើយតាមការស្ទាបស្ទង់មតិរបស់ Sunday Times ក៏បង្ហាញថា ប្រជាជនតំបន់ស្កុតលែន៥២% ចង់ឲ្យតំបន់ខ្លួន ក្លាយជារដ្ឋឯករាជ្យ ហើយក្លាយជាសមាជិកពេញសិទ្ធិរបស់សហភាពអឺរ៉ុប។ យ៉ាងណាមិញ កាលពីថ្ងៃពុធម្សិលមិញ លោកស្រីនាយករដ្ឋមន្ត្រីស្កុតលែនដ៍ បានអញ្ជើញទៅដល់ក្រុងព្រុចសែល ដើម្បីជួបជាមួយថ្នាក់ដឹកនាំអឺរ៉ុប និយាយគ្នាដើម្បីរកវិធីឲ្យតំបន់ស្កុតលែនដ៍ អាចបន្តនៅក្នុងសហភាពអឺរ៉ុបតទៅទៀត។ ទោះបីសម្រាប់ពេលនេះ វានៅឆាប់រហ័សពេក តែយ៉ាងណា នេះសបញ្ជាក់ពីចេតនារបស់ស្កុតលែនដ៍ ដែលចង់ឆក់ឱកាសនេះ វេចបង្វិចចេញពីអង់គ្លេស។
ជំងឺចាស់រើឡើងវិញ៖ អៀរឡង់ខាងជើង ទាមទារឯករាជ្យ
រដ្ឋសមាជិកមួយទៀត ដែលអាចបង្ករការឈឺក្បាលដល់ អង់គ្លេសដែរ គឺតំបន់អៀរឡង់ខាងជើង។ តំបន់នេះ ត្រូវបានចក្រភ័ពអង់គ្លេស ទៅដាក់អាណានិគម និងច្រឹបយកមកគ្រប់គ្រង ទុកឲ្យកោះអៀរឡង់ ត្រូវបែកខ្ញែកជាពីរ ខាងជើង ជារបស់ចក្រភពអង់គ្លេស ឯផ្នែកខាងត្បូងជារដ្ឋអៀរឡង់ឯករាជ្យ។
រហូតមកដល់ពេលនេះ ចលនាបះបោរប្រឆាំងអង់គ្លេសនៅអៀរឡង់ខាងជើង បានស្ងប់ស្ងាត់ ក៏ដោយសារតែ ទាំងប្រទេសអៀរឡង់ ទាំងអង់គ្លេសស្ថិតក្នុងសហភាពអឺរ៉ុបដូចគ្នា។ ដូច្នេះទោះ តំបន់អៀរឡង់ខាងជើង ស្ថិតនៅខាងអៀរឡង់ រឺខាងអង់គ្លេស ក៏មិនសូវជាខុសគ្នាប៉ុន្មានដែរ ព្រោះពុំមានព្រំដែន មនុស្សម្នាអាចធ្វើដំណើរ ទៅធ្វើការ រស់នៅ បានដោយសេរី។ ប៉ុន្តែបើសិនពេលនេះ អង់គ្លេសលែងជាសមាជិកអឺរ៉ុប នោះប្រជាជនកោះអៀរឡង់ នឹងត្រូវជួបការលំបាក ដោយសារព្រំដែននឹងត្រូវដាក់ឡើងវិញ ដែលការនេះ វានឹងញាំងឲ្យអៀរឡង់ខាងជើង រើបំរាស់ ដើម្បីបានត្រលប់មករួមរស់ជាមួយនឹងប្រទេសអៀរឡង់ និងសហភាពអឺរ៉ុបវិញ។
ទាំងអស់នេះ យើងនៅមិនទាន់និយាយទៅដល់ការប៉ះពាល់ផ្នែកសេដ្ឋកិច្ច ចរាចរណ៍ភាគហ៊ុន និងទំនិញហិរញ្ញវត្ថុ ដែលអង់គ្លេសកំពុងតែចាប់ផ្តើមខាត ទៅហើយ នោះទេ។ ការសម្រេចចិត្តតែមួយប៉ព្រិចភ្នែក របស់ប្រជាជនដែលខ្វះការពិចារណា ដោយជឿទៅតាមពាក្យឃោសនាប្រជាភិថុត របស់អ្នកនយោបាយឆក់ឱកាស គឺកំពុងតែនាំរាជាណាចក្រនៃម្ចាស់ក្សត្រីអេលីហ្សាបែត ឲ្យស្ថិតនៅមាត់ជ្រោះមួយ ដ៏សែនគ្រោះថ្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ