អាមេរិកប្រកាសដកខ្លួន ចេញពីសន្ធិសញ្ញាដកអាវុធនុយក្លេអ៊ែរកម្លាំងមធ្យម ព្រោះរុស្ស៊ីមិនគោរព
រដ្ឋាភិបាលអាមេរិក តាមរយៈលិខិតប្រកាស ចុះហត្ថលេខាដោយលោកដូណាល់ ត្រាំ បានប្រកាសថា នឹងដកខ្លួន ចាប់ពីថ្ងៃទី២កុម្ភៈនេះ ចេញពីសន្ធិសញ្ញា ដកអាវុធនុយក្លេអ៊ែរកម្លាំងមធ្យម ដែលខ្លួនបានចុះហត្ថលេខា ជាមួយរុស្ស៊ី។ រដ្ឋាភិបាលអាមេរិក បានចោទរុស្ស៊ី ថាបានរំលោភសន្ធិសញ្ញានេះ តាមរយៈការដាក់តាំង អាវុធមីស៊ីលជាច្រើនគ្រឿង នៅតាមព្រំដែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
នៅក្នុងលិខិតប្រកាស របស់សេតវិមានអាមេរិក ដែលចុះហត្ថលេខា ដោយលោកដូណាល់ ត្រាំ មានសរសេរថា ចាប់ពីថ្ងៃទី២កុម្ភៈទៅ សហរដ្ឋអាមេរិក នឹងព្យួរទុក នូវកាតព្វកិច្ចទាំងអស់ ដែលមានចែងក្នុងកិច្ចសន្ធិសញ្ញាដកអាវុធនុយក្លេអ៊ែរកម្រិតមធ្យម (INF)។ លិខិតដដែល បញ្ជាក់ថា នីតិវិធីដកខ្លួនចេញជាស្ថាពរ នឹងត្រូវចំណាយពេលប្រមាណ ៦ខែ។
សូមបញ្ជាក់ថា សន្ធិសញ្ញាដកអាវុធនុយក្លេអ៊ែរ កម្រិតមធ្យម ត្រូវបានចុះហត្ថលេខា ដោយសហរដ្ឋអាមេរិក និងសហភាពសូវៀត កាលពីឆ្នាំ១៩៨៧។ កិច្ចព្រមព្រៀងនេះ មានខ្លឹមសារដាក់កំហិត មហាអំណាចនុយក្លេអ៊ែរទាំងសងខាង ថាត្រូតែបំផ្លាញចោល នូវអាវុធមីស៊ីលនុយក្លេអ៊ែរ ដែលអាចហោះបានរយៈចំងាយចន្លោះ ពី៥០០ ទៅ៥៥០០គីឡូម៉ែត្រ។
គួររំលឹកថា កាលពីខែតុលា ឆ្នាំ២០១៨ លោកដូណាល់ ត្រាំ បានប្រកាសជាលើកដំបូង អំពីចេតនារបស់លោក ក្នុងការដកខ្លួនចេញ ឈប់គោរពសន្ធិសញ្ញានេះ ដោយលោកបានចោទថា រុស្ស៊ីបានរំលោភបំពានកាតព្វកិច្ចខ្លួន ជាច្រើនដង។ បន្ទាប់មកទៀត នៅដើមខែធ្នូ លោក Mike Pompeo រដ្ឋមន្ត្រីការបរទេសអាមេរិក បាននិយាយនៅទីក្រុងព្រុចសែលថា អាមេរិកទុកពេល ៦០ថ្ងៃ ឲ្យរុស្ស៊ី ដកសម្ភារៈមីស៊ីល ចេញពីតាមព្រំដែនជាបន្ទាន់។ ពុំនោះទេ អាមេរិក នឹងដកខ្លួនចេញពីសន្ធិសញ្ញា។
សម្រាប់ភាគីរុស្ស៊ីវិញ គេបានច្រានចោលជានិច្ច ថាការចោទប្រកាន់របស់អាមេរិក គឺជាការចោទប្រកាន់ ដែលគ្មានមូលដ្ឋានត្រឹមត្រូវ។ រុស្ស៊ី បានក្រឿនរំលឹកផងដែរ អំពីគ្រោះថ្នាក់ប្រឈមទាក់ទិននឹងបញ្ហាសន្តិសុខ នៅអឺរ៉ុប បើសិនជាអាមេរិក ហ៊ានដកខ្លួន ចេញពីសន្ធិសញ្ញដកអាវុធនុយក្លេអ៊ែរកម្រិតមធ្យមនេះ។ យ៉ាងណាមិញ ថ្មីៗនេះ លោកពូទីន ប្រធានាធិបតីរុស្ស៊ី បាននិយាយគំរាមថា បើអាមេរិកដកខ្លួនចេះពីសន្ធិសញ្ញានេះ នោះរុស្ស៊ី នឹងចាប់ផ្តើមធ្វើការអភិវឌ្ឍន៍ មីស៊ីលបាលីស្ទីកចំងាយមធ្យម។
ទោះយ៉ាងណាក៏ដោយ លោក Mike Pompeo បានអះអាងនៅថ្ងៃសុក្រទី១កុម្ភៈថា អាមេរិក ត្រៀមខ្លួននិយាយជាមួយរុស្ស៊ីជានិច្ច ទាក់ទិននឹងបញ្ហាអាវុធនុយក្លេអ៊ែរនេះ។ ប៉ុន្តែ សម្រាប់លោកEugene Rumer អតីមន្ត្រីស៊ើបការណ៍សំងាត់របស់អាមេរិក យល់ឃើញថា បច្ចុប្បន្ននេះ ទាំងអាមេរិក ទាំងរុស្ស៊ី គ្មាននរណាមានចេតនា ចង់ថែររក្សាសន្ធិសញ្ញា ដែលមានចំណាស់ជិត៤០ឆ្នាំនេះទៀតទេ។ ម្នាក់ៗសុទ្ធតែមានហេតុផលរៀងៗខ្លួន មកចោទគ្នា។ ដូច្នេះ យកល្អ គួរតែពិចារណា រៀបចំឲ្យមានបទដ្ឋានច្បាប់អន្តរជាតិថ្មី ដើម្បីឆ្លើយតបនឹងស្ថានការណ៍បច្ចុប្បន្ននេះវិញ វាប្រសើរជាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ