បោះឆ្នោតសភាអាល្លឺម៉ង់៖ លោកស្រីមែរគែល សង្ឃឹមឈ្នះអាណត្តិទី៤
នៅថ្ងៃអាទិត្យ ទី ២៤ កញ្ញានេះ ប្រជាជនអាល្លឺម៉ង់ ប្រមាណជា៦១លាននាក់ នឹងត្រូវទៅចូលរួមបោះឆ្នោត ជ្រើសរើសសមាជិកសភាជាន់ទាប អាល្លឺម៉ង់។ គណបក្សដែលទទួលបានសម្លេងភាគច្រើន ក្នុងសភានេះ នឹងឈានទៅបង្កើតរដ្ឋាភិបាល ហើយជ្រើសរើសអធិការបតីថ្មី។ លោកស្រី អង់ហ្គេឡា មែរគែល មកពីបក្សអភិរក្សនិយម កំពុងសង្ឃឹមឈ្នះ ដើម្បីដឹកនាំរដ្ឋាភិបាលអាល្លឺម៉ង់ សម្រាប់អាណត្តិទី៤បន្តទៀត។
ចុះផ្សាយនៅថ្ងៃ៖
ស្តាប់ - ០២:២០
លោកស្រី អង់ហ្គេឡា មែរគែល ដែលមកពីគណបក្សអភិរក្សនិយម CDU (Union Chrétienne-Démocrate) ត្រូវប្រជែង ជាមួយនឹងលោក Martin Schulz មកពីគណបក្សសង្គមនិយមប្រជាធិបតេយ្យ SPD។ បើតាមការស្ទៀបស្ទង់មតិ គណបក្សលោកស្រីអង់ហ្គេឡា មែរគែល អាចនឹងទទួលបានសម្លេងឆ្នោត បានចន្លោះពី ៣៤ ទៅ ៣៦% ចំណែកគណបក្សលោក ម៉ាកតាំង ហ្ស៊ូលស៍ អាចនឹងបានសម្លេងឆ្នោតប្រហែល ២១ ទៅ ២២%។
តែអ្វីដែលគេកំពុងភ្ញាក់ផ្អើល នោះ គឺការកើនឡើង នូវប្រជាប្រិយភាព របស់គណបក្សស្តាំនិយមជ្រុល AfD។ យោងតាមតួលេខស្ទាបស្ទង់មតិ គឺគណបក្សនេះអាចនឹងបានសម្លេងឆ្នោត លំដាប់ទីបី ហើយឈានទៅអាចមានកៅអី នៅក្នុងសភាជាន់ទាបអាល្លឺម៉ង់។ អ្នកវិភាគនយោបាយអាល្លឺម៉ង់ យល់ថា ការកើនឡើងកំលាំងនៃគណបក្សស្តាំនិយមជ្រុលនេះ គឺជាការព្រួយបារម្ភបំផុត ដែលសង្គមអាល្លឺម៉ង់ អាចធ្លាក់ទៅក្នុងទ្រឹស្តីរើសអើងប្រកាន់ពូជសាសន៍ ដូចកាលពីអតីតកាល។
គណបក្សនេះ ត្រូវបានគេដឹងថា បានប្រើប្រាស់ទ្រឹស្តីស្អប់ខ្ពើមជនបរទេស ជាអាវុធដើម្បីឃោសនា។ អ្នកខ្លះហ៊ានទៅដល់សន្និដ្ឋានថា វាគឺជាទំនោរទ្រឹស្តី របស់អតីតក្រុមណាហ្ស៊ីសទៀតផង។ គឺគណបក្ស AfD នេះហើយ ដែលបានចោទលោកស្រី អង់ហ្គេឡា មែរគែល ថាក្បត់ជាតិ នៅពេលដែលលោកស្រីសម្រេចបើកទ្វារព្រំដែនទទួលយកជនភៀសខ្លួនដោយសង្រ្គាម មកពីតំបន់ដើមបូព៌ា និងអាហ្វ្រិក។
សូមបញ្ជាក់ថា នេះគឺជាការបោះឆ្នោតសភាជាន់ទាបអាល្លឺម៉ង រឺដែលហៅថា Bundestag។ សភាBundestag មានអាសនៈចំនួន៥៩៨។ ការបោះឆ្នោតនេះ មានលក្ខណៈស្មុគស្មាញ ដោយសារ សមាជិកសភានេះត្រូវចែកជាពីរក្រុម ដែលត្រូវឆ្លងកាត់ការបោះឆ្នោតជ្រើសរើសខុសគ្នា ហើយប្រជាជនម្នាក់ៗ ក៏មានសម្លេងឆ្នោតពីរដែរ។ ទីមួយ គឺសមាជិកសភា ចំនួន២៩៩នាក់ តំណាងឲ្យមណ្ឌល ទាំង២៩៩ (Land) នៅអាល្លឺម៉ង់។ ប្រជាជន នៅតាមមណ្ឌលទាំងនេះ ត្រូវបោះឆ្នោតជ្រើសរើសបេក្ខជនម្នាក់ ដែលខ្លួនពេញចិត្ត។ ចំណែកអាសនៈ២៩៩ផ្សេងទៀត គឺប្រជាជនត្រូវបោះឆ្នោត ឲ្យទៅបញ្ជីបេក្ខជន របស់បក្សដែលខ្លួនពេញចិត្ត ដោយអាសនៈ ត្រូវគិតតាមប្រព័ន្ធសមាមាត្រ។
សូមបញ្ជាក់ថា អស់រយៈពេល១២ឆ្នាំហើយ ដែលលោកស្រី អង់ហ្គេឡា មែរគែល បានធ្វើជាប្រមុខរដ្ឋាភិបាលអាល្លឺម៉ង់។ ស្ថិតក្នុងវ័យ ៦៣ ឆ្នាំ លោកស្រី នៅតែមានប្រជាប្រិយភាពយ៉ាងខ្លាំង សម្រាប់ប្រជាជនអាល្លឺម៉ង់ ទូទៅ។ បច្ចុប្បន្ន អាល្លឺម៉ង់ គឺជាកម្លាំងចលករសេដ្ឋកិច្ច ធំបំផុត នៅសហភាពអឺរ៉ុប។ បើតាមការស្ទាបស្ទង់មតិ ថ្វីបើគណបក្សរបស់លោកស្រី អង់ហ្គេឡា មែរគែល មានសង្ឃឹមឈ្នះមែន តែនៅតែមិនឈ្នះដាច់ទេ។លោកស្រី នឹងត្រូវតែពិចារណា សហការជាមួយបក្សណាមួយផ្សេងទៀត ដើម្បីបង្កើតរដ្ឋាភិបាលចំរុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ