អេស្ប៉ាញ៖ ប្រជាជន​កាតាឡូញ៉ា​រាប់ម៉ឺន​នាក់ ដង្ហែរ​ក្បួន​ប្រឆាំង​នឹងការ​​ទាមទារ​បំបែក​ទឹក​ដី​

បើយោងតាមតួលេខរបស់សមត្ថកិច្ចកាតាឡូញ៉ា  នៅរសៀលថ្ងៃអាទិត្យ ទី២៩តុលា  មានមនុស្សយ៉ាងហោចណាស់៣០ម៉ឺននាក់​ ដែលបានមកចូលរួមដើរដង្ហែរក្បួន​ ដើម្បីការបង្រួបបង្រួមជាតិអេស្ប៉ាញ។ ប៉ុន្តែបើយោងតាម អ្នករៀបចំកម្មវិធី គឺមានអ្នកចូលរួម​ប្រមាណជា១លាននាក់ ដែលមកពីគ្រប់ច្រកល្ហក នៃតំបន់កាតាឡូញ៉ា ដើម្បីសំដែងពីការមិនសុ​ខចិត្តរបស់ពួកគេ ប្រឆាំងទៅនឹងការប្រកាសឯករាជ្យ ផ្តាច់ខ្លួនចេញពីអេស្ប៉ាញ។

ហ្វូងមនុស្សបានលើកទង់ជាតិអេស្ប៉ាញឡើងព្រោងព្រាត ហើយមានអ្នកខ្លះបានស្រែកថា លោក Carles Puigdemont មេដឹកនាំកាតាឡូញ៉ា ត្រូវតែចូលគុក។ បាតុករខ្លះលើកឡើងថា ក្រុមអ្នកនយោបាយកាតាឡូញ៉ា ដែលទាមទារចង់បានឯករាជ្យ​ កំពុងតែដេកស្រម៉ៃ ដាច់ឆ្ងាយពីការពិតពេកហើយ។

លោក Alex Ramos អ្នកដឹកនាំការជួបជុំនេះ  បានពន្យល់ថា ការប្រកាសឯករាជ្យ​ ដែលក្រុមបក្សពួករបស់លោក Carles Puigdemont បានធ្វើកាលពីថ្ងៃសុក្រ គឺជាអំពើខុសច្បាប់ ព្រោះវាមិនបានសម្តែងចេញពី​ឆន្ទៈ​ របស់ប្រជាជនកាតាឡូញ៉ា ទាំងស្រុងទេ។ ក្រុមអ្នកនយោបាយចង់បានឯករាជ្យនេះ​ ចេះតែ រំលើកថា ខ្លួនធ្វើនេះក្នុងនាមប្រជាជនកាតាឡូញ៉ា​ទាំងមូល  តែធាតុពិត មានប្រជាជនតំបន់កាតាឡូញ៉ា តែ៤៧% ប៉ុណ្ណោះ ដែលបានបោះឆ្នោតឲ្យបក្សនយោបាយនេះ កាលពីឆ្នាំ២០១៥។ ចំណែកលទ្ធផលប្រជាមតិ លកាលពីថ្ងៃទី ១តុលា ក៏បង្ហាញថា មានប្រជាជនមិនដល់៥០%ទេ ដែលបានទៅបោះឆ្នោតគាំទ្រ។

សូមបញ្ជាក់ថា កាលពីថ្ងៃសុក្រទី ២៧តុលា ភ្លាមៗក្រោយសភា និងរដ្ឋបាលតំបន់កាតាឡូញ៉ា ប្រកាសឯករាជ្យ រដ្ឋាភិបាលអេស្ប៉ាញ បានសម្រេចរំលាយសភា និងរដ្ឋបាលតំបន់កាតាឡូញ៉ាចោល។ លោក Carles Puigdemont ត្រូវបានដកហូតតំណែង ហើយកំពុងប្រឈមមុខ នឹងទោសធ្វើសកម្មភាពបះបោរបំបែកទឹកដី។​ ដោយឡែក នៅថ្ងៃអាទិត្យ ម្សិលមិញ អ្នកនយោបាយបែលហ្សិក ឈ្មោះ Theo Francken មកពីបក្សនិយមឯករាជ្យតំបន់ហ្វ្លាម៉ង់ដ៍ ម្នាក់ បានលើកឡើងថា​ បែលហ្សិក អាចពិចារណា ផ្តល់សិទ្ធិជ្រកកោនឲ្យលោក Carles Puigdemont។

រដ្ឋាភិបាលអេស្ប៉ាញ នឹងរៀបចំការបោះឆ្នោតតំបន់កាតាឡូញ៉ា នៅថ្ងៃទី ២១ ធ្នូខាងមុខ។ ហើយបើយោងតាមលទ្ធផលនៃការស្ទាបស្ទង់មតិចុងក្រោយ នៅថ្ងៃអាទិត្យ​ម្សិលមិញ បង្ហាញថា គណបក្ស​ឯករាជ្យនិយមរបស់លោក Carles Puigdemont​ អាចនឹងបាត់បង់អាសនៈសភា នៅសល់តែ ៦៥អាសនៈប៉ុណ្ណោះ ក្នុងចំណោម ១៣៥៕