ប្រជាជនអេស្ប៉ាញ ចុះផ្លូវទូទាំងប្រទេស ទាមទារឲ្យរដ្ឋាភិបាល និង តំបន់កាតាឡូញ៉ា ចរចាគ្នា
ចុះផ្សាយនៅថ្ងៃ៖
ស្តាប់ - ០៦:១២
វិបត្តិតំបន់កាតាឡូញ៉ា ប្រទេសអេស្ប៉ាញ នៅតែជាប់គាំង ពុំទាន់មានដំណោះស្រាយនៅឡើយ។ ប្រជាជនអេស្ប៉ាញបានអំពាវនាវ តាមបណ្តាញសង្គម ឲ្យនាំគ្នាចុះផ្លូវទូទាំងប្រទេសនៅថ្ងៃសៅរ៍នេះ ដើម្បីបរិហារពីភាពអសមត្ថភាព របស់អ្នកនយោបាយអេស្ប៉ាញ មិនថានៅក្នុងរដ្ឋាភិបាល ឬនៅក្នុងរដ្ឋបាលតំបន់ស្វយ័តកាតាឡូញ៉ា ដែលនៅតែមិនអាច ស្វែងរកដំណោះស្រាយ ក្នុងវិបត្តិដ៏ធ្ងន់ធ្ងរនេះ។
ចុះផ្លូវបរិហារ ពីភាពអសត្ថភាព របស់ថ្នាក់ដឹកនាំអេស្ប៉ាញ
ជិតមួយសប្តាហ៍ ក្រោយការបោះឆ្នោតប្រជាមតិ ដោយខុសច្បាប់ នៅតំបន់កាតាឡូញ៉ា និងបន្ទាប់ពីមានបាតុកម្ម របស់ប្រជាជនតំបន់កាតាឡូញ៉ា ដែលចង់បានឯករាជ្យនោះ នៅថ្ងៃសៅរ៍នេះ គឺដល់វេនប្រជាជនអេស្ប៉ាញទូទាំងប្រទេសតែម្តង ដែលបានអំពាវនាវ ធ្វើបាតុកម្ម។ បាតុកម្មរបស់ប្រជាជនអេស្ប៉ាញ នៅទូទាំងប្រទេសដែលគេគ្រោងធ្វើនៅថ្ងៃសៅរ៍នេះ គឺដើម្បីជំរុញ ឲ្យថ្នាក់ដឹកនាំនយោបាយអេស្ប៉ាញទាំងអស់ ស្វែងរកវិធីចរចាគ្នាដោយសន្តិវិធី ជាមួយនឹងក្រុមទាមទារឯករាជ្យនៅតំបន់កាតាឡូញ៉ា។
គឺជាការចុះផ្លូវ ដើម្បីបរិហារ អំពីភាពអសមត្ថភាព របស់អ្នកនយោបាយអេស្ប៉ាញ ទាំងអស់ ដែលបានបណ្តែតបណ្តោយ បញ្ហាតំបន់កាតាឡូញ៉ា ឲ្យធ្លាក់ធ្ងន់ធ្ងរដល់ថ្នាក់នេះ។ សកម្មជនម្នាក់ លើកឡើងថា មកដល់ដំណាក់កាលដ៏ធ្ងន់ធ្ងរនេះ អ្នកនយោបាយអេស្ប៉ាញ មិនថាភាគីរដ្ឋាភិបាល មិនថាភាគីតំបន់កាតាឡូញ៉ា សុទ្ធតែជាមនុស្សគ្មានការទទួលខុសត្រូវ នៅតែមិនព្រមពិចារណា រកវិធីចរចាគ្នាទេ បែរជាគំរាមគ្នាទៅវិញទៅមក ធ្វើឲ្យប្រជាជាតិអេស្ប៉ាញកាន់តែបែកបាក់។
ការអំពាវនាវ ឲ្យប្រជាជនអេស្ប៉ាញធ្វើបាតុកម្មទូទាំងប្រទេសនេះ គឺផ្តួចផ្តើមឡើង ដោយក្រុមសកម្មជន ដែលគាំទ្រ ការផ្សះផ្សាចរចាគ្នា។ បន្ទាប់មកសម្លេងអំពាវនាវនេះ បានរីកសាយភាយភ្លាម នៅលើទំព័របណ្តាញសង្គមនានា។ ញត្តិអំពាវនាវមួយ នៅលើគេហទំព័រ Change.org មានមនុស្សចុះហត្ថលេខា ដល់ទៅ៩០០០នាក់ នៅព្រឹកថ្ងៃសៅរ៍នេះ។ ការជួបជុំគ្នានេះ គ្រោងធ្វើនៅខាងមុខសាលាឃុំ ឬសាលាក្រុង ទូទាំងប្រទេសអេស្ប៉ាញតែម្តង។ គេអំពាវនាវឲ្យ ប្រជាជនអេស្ប៉ាញ ចូលរួម ឲ្យបានច្រើន ទូទាំងប្រទេស ដោយត្រូវស្លៀកពាក់ពណ៌ស ចំណែកប្រជាជនមានផ្ទះនៅតាមផ្លូវ ត្រូវយកក្រណាត់ស មកចងនៅមុខផ្ទះ ដើម្បីជាសញ្ញានៃការគាំទ្រ ឲ្យមានការសម្រុះសម្រួសគ្នា ដោយសន្តិវិធី ដើម្បីដោះស្រាយវិបត្តិ តំបន់កាតាឡូញ៉ានេះ។
ប្រកាសឯករាជ្យដោយឯកតោភាគី ដូចបិទផ្លូវចរចាទាំងស្រុង
លោក Cales Puigdemont ដែលជាមេក្រុមទាមទារឯករាជ្យនោះ នៅតែអះអាងថា គេនឹងប្រកាសឯករាជ្យតំបន់កាតាឡូញ៉ា ដោយឯកតោភាគី ក្នុងពេលដ៏ឆាប់ខាងមុខ។ ក៏ប៉ុន្តែ គេសង្កេត ឃើញថា លោក Puigdemont បានបន្ទន់ឥរិយាបថបន្តិច បន្ទាប់ពីមេដឹកនាំទាមទារឯករាជ្យរូបនេះ បានប្រកាសលើក ពេលអន្តរាគមន៍នៅមុខសភាកាតាឡូញ៉ា ពីថ្ងៃចន្ទ ទៅថ្ងៃអង្គារវិញ។ បើតាមការគ្រៀងទុក គឺក្នុងពេលអន្តរាគមមុខសភានេះហើយ ដែលគេនឹងប្រកាសឯករាជ្យ។
តែយ៉ាងណា អ្នកវិភាគខ្លះ លើកឡើងថា ការលើកថ្ងៃប្រកាសឯករាជ្យនេះ អាចជាវិធី ដើម្បីស្វែងរកពេលវេលាឲ្យបានយូរបន្តិច ដើម្បីចរចាគ្នា នៅក្នុងផ្ទៃក្នុងរបស់ក្រុមទាមទារឯករាជ្យ។ អ្នកវិភាគលើកឡើងថា នៅក្នុងសភាតំបន់កាតាឡូញ៉ា ក៏មានអ្នកជំទាស់ និងការធ្វើប្រជាមតិផ្តាច់ខ្លួននេះដែរ។ ហើយបើទោះសមាជិកសភាខ្លះ គាំទ្រការធ្វើប្រជាមតិ ក៏មានអ្នកខ្លះ មិនគាំទ្រ ការប្រកាសឯករាជ្យដោយឯកតោភាគី បែបនេះដែរ។ បើប្រកាសឯករាជ្យ គឺមានន័យថា បិទផ្លូវចរចា ជាមួយនឹងរដ្ឋាភិបាលអេស្ប៉ាញទាំងអស់តែម្តង។
ក្នុងករណីនេះ គឺមិនខុសពីប្រកាសសត្រូវជាចំហ ជាមួយនឹងរដ្ឋាភិបាលអេស្ប៉ាញ។ ដូច្នេះហើយ ទើបរដ្ឋាភិបាលអេស្ប៉ាញ បានគំរាមតបវិញ ថានឹងអនុវត្តមាត្រា ១៥៥ នៃរដ្ឋធម្មនុញ្ញ។ មាត្រា នេះ អនុញ្ញាត ឲ្យរដ្ឋាភិបាល ច្បាមយកមកគ្រប់គ្រងជាបណ្តោះអាសន្ន នូវតំបន់ស្វយត័ណា ដែលបានធ្វើបំពាន ឬបង្កការប៉ះពាល់ធ្ងន់ធ្ងរ ដល់ផលប្រយោជន៍ជាតិ។
រដ្ឋាភិបាលអេស្ប៉ាញ គួរបោះដៃទៅរកមុន
ជារួម ក្នុងតំណាក់កាលនេះ ភាគីទាំងសងខាង កំពុងរងចាំមើលគ្នាទៅវិញទៅមក ដោយប្រុងប្រយ័ត្ន។ តែយ៉ាងណា អ្នកវិភាគ ក៏ដូចជាអ្នកនយោបាយអេស្ប៉ាញខ្លះ បានលើកឡើងថា មានតែរដ្ឋាភិបាលអេស្ប៉ាញ តែម្នាក់គត់ ដែលត្រូវបោះដៃ ទៅរកក្រុមទាមទារឯករាជ្យមុន។ ពោលគឺ រដ្ឋាភិបាលនេះ ត្រូវបង្ហាញជំហ ថាខ្លួនចង់អង្គុយនិយាយគ្នាដោយស្ងប់ស្ងាត់ មិនមែនគិតតែស្រែកប្រកាស ថ្កោលទោស ការធ្វើប្រជាមតិនេះទេ។
ចង់មិនចង់ បើស្ថានការណ៍ក្លាយជាធ្ងន់បែបនេះ ក៏ដោយសារតែថ្នាក់ដឹកនាំរបស់រដ្ឋាភិបាលអេស្ប៉ាញ កន្លងមក មិនបានធ្វើអ្វីសោះ ដើម្បីរំងាប់ទឹកចិត្តទាមទារឯករាជ្យ របស់តំបន់កាតាឡូញ៉ានេះ។ ដូច្នេះវា ដល់ពេលហើយ ដែលអេស្ប៉ាញ គួរសិក្សា នៅក្នុងរដ្ឋធម្មនុញ្ញ ថាត្រូវផ្លាស់ប្តូរយ៉ាងណា ដើម្បីឲ្យតំបន់តាឡាឡូញ៉ា អាចបន្តរួមរស់ ក្នុងរង្វង់ប្រជាជាតិអេស្ប៉ាញ ដោយសុខសន្តិភាព។
ផលប៉ះពាល់ផ្នៃកសេដ្ឋកិច្ច
ផលអាក្រក់ ចាប់ផ្តើមចេញរូបរាងមកជាបណ្តើរៗហើយ។ កាលពីថ្ងៃសុក្រ ធនាគារដ៏ធំបំផុតចំនួន២ របស់តំបន់កាតាឡូញ៉ា គឺធនាគារ Sabadell និង ធនាគារ Caixa បានសម្រេច ប្តូរទីតាំង ស្នាក់ការកណ្តាលរបស់គេ ទៅកាន់តំបន់ផ្សេងទៀត នៅអេស្ប៉ាញ។ ចំណុចនេះ បង្ហាញថា គេលែងមានទំនុកចិត្តស្តីពីសន្តិសុខ និងនយោបាយរបស់តំបន់កាតាឡូញ៉ាទៀតហើយ។ ក្រុមហ៊ុនធំៗផ្សេងទៀត ក៏ចាប់ផ្តើមព្រួយបារម្ភដែរ។
កន្លងមកក្រុមទាមទារឯករាជ្យតំបន់កាតាឡូញ៉ានេះ មិនដែលខ្វល់ ថានឹងអាចមានរឿងដូច្នេះទេ ព្រោះគេអួតថា សេដ្ឋកិច្ចតំបន់កាតាឡូញ៉ា មានទំងន់ធ្ងន់ណាស់ បើប្រៀបធៀបទៅនឹងតំបន់ឯទៀត នៅអេស្ប៉ាញ។ ពោលគឺ ក្រុមទាមទារឯករាជ្យតំបន់កាតាឡូញ៉ានេះ មានអំនួតណាស់។ តែជាមួយនឹងសញ្ញាណអាក្រក់ ជះលើវិស័យសេដ្ឋកិច្ច ដោយសារតែប្រជាមតិផ្តាច់ខ្លួន នាពេលនេះ គឺជឿថា ក្រុមនេះបានភ្លឺភ្នែកបន្តិច។
ការប្រកាសឯករាជ្យ វាមិនមែនថាហើយ ចេះតែធ្វើទៅបានដោយងាយស្រួល ដូចដែលក្រុមនេះ ធ្លាប់បានអួតកន្លងមកទេ។ ជាក់ស្តែងក្រុមនេះ អួតថា នឹងបានសម្លេងគាំទ្រច្រើនលើសលប់ ពីប្រជាជនកាតាឡូញ៉ា ក្នុងពេលធ្វើប្រជាមតិ។ តែដល់មែនទែន មានមនុស្សទៅបោះឆ្នោត តែ ៤៣% ប៉ុណ្ណោះ។ ហេតុដូច្នេះ ហើយបានជាគេឃើញក្រុមទាមទារឯករាជ្យនេះ កំពុងសំងំបង្អន់ជំហានបន្តិចវិញ ដើម្បីសិក្សាពី ផ្លូវដើរ និងផលវិបាកឲ្យបានល្អិតល្អន់ មុននឹងអ្វីៗហួសពេល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ