រដ្ឋាភិបាលអេស្ប៉ាញ ផ្តើមនីតិវិធីព្យួរស្វ័យភាពរបស់កាតាឡូញ៉ា ដើម្បីរៀបចំការបោះឆ្នោត
២០ថ្ងៃក្រោយការបោះឆ្នោតប្រជាមតិ នៅតំបន់កាតាឡូញ៉ា រដ្ឋាភិបាលអេស្ប៉ាញ ទើបបានប្រកាសជាផ្លូវការថា គេនឹងចាប់ផ្តើមនីតិវិធីព្យួរស្វ័យភាព នៃតំបន់កាតាឡូញ៉ានេះ ដោយគោរពទៅតាមការអនុញ្ញាតិ របស់រដ្ឋធម្មនុញ្ញ។ ជាមួយនឹងការច្បាមយកតំបន់នេះ មកកាន់កាប់ជាបណ្តោះអាសន្ន រដ្ឋាភិបាលអេស្ប៉ាញ នឹងរៀបចំការបោះឆ្នោត មុនពេលកាលកំណត់មួយ នៅរវាងដើមឆ្នាំ២០១៨ ដើម្បីជ្រើសតាំងថ្នាក់ដឹកនាំថ្មី សម្រាប់តំបន់ស្វយ័តកាតាឡូញ៉ា។
ចុះផ្សាយនៅថ្ងៃ៖
ស្តាប់ - ០១:៥១
ទីបំផុត កាលពីថ្ងៃសុក្រ ទី ២០តុលា រដ្ឋាភិបាលអេស្ប៉ាញ បានសម្រេច បើកនីតិវិធី ព្យួរស្វ័យភាព របស់តំបន់កាតាឡូញ៉ា ដោយយោងទៅតាមមាត្រា ១៥៥ នៃរដ្ឋធម្មនុញ្ញអេស្ប៉ាញ។ នេះជាលើកទីមួយហើយ ដែលគេអនុវត្តមាត្រានេះ។ មាត្រានេះ នឹងអនុញ្ញាតឲ្យរដ្ឋាភិបាលកណ្តាលរបស់អេស្ប៉ាញ គ្រប់គ្រងដោយផ្ទាល់ ជាបណ្តោះអាសន្នសិន ទៅលើរដ្ឋបាល និងស្ថាប័ននៅតំបន់ស្វយ័តកាតាឡូញ៉ា មុននឹងវិលត្រលប់មករកស្ថិរភាពវិញ។
បើតាមការប្រកាស របស់រដ្ឋាភិបាលអេស្ប៉ាញ សភាតំបន់កាតាឡូញ៉ា និងត្រូវរំលាយចោល ហើយនឹងមានការបោះឆ្នោតមួយ នៅខែមករា ឆ្នាំ២០១៨ ដើម្បីជ្រើសរើសសមាជិកសភា និងរដ្ឋបាលគ្រប់គ្រងថ្មីសម្រាប់តំបន់កាតាឡូញ៉ា។ ទោះបីជាយ៉ាងណា រដ្ឋាភិបាលអេស្ប៉ាញ មិនទាន់បានបង្ហាញកាលវិភាគលំអិត ស្តីពីការអនុវត្តនីតិវិធីនេះនៅឡើយទេ។ បើតាមការរំពឹងទុក នៅរសៀលថ្ងៃសៅរ៍នេះ លោក Mariano Rajoy នាយករដ្ឋមន្ត្រីអេស្ប៉ាញ និងបើកអង្គប្រជុំគណរដ្ឋមន្ត្រីវិសាមញ្ញមួយ ដើម្បីសម្រេចលំអិត អំពីនីតិវិធីដ៏កម្រនេះ។
សូមរំលឹកថា តំបន់កាតាឡូញ៉ា បានធ្វើប្រជាមតិទាមទារឯករាជ្យ កាលពីថ្ងៃទី១ តុលា ដោយបំពានការហាមឃាត់ របស់រដ្ឋាភិបាល ព្រមទាំងសេចក្តីសម្រេច របស់តុលាការធម្មនុញ្ញអេស្ប៉ាញ។ បន្ទាប់ពីសន្យាថា នឹងប្រកាសឯករាជ្យ លោក Carles Puigdemont ប្រធានរដ្ឋបាលតំបន់ស្វយ័តនេះ បានដកថយមួយជំហានវិញ ដើម្បីចរចាជាមួយរដ្ឋាភិបាល។ លោកនាយករដ្ឋមន្ត្រីអេស្ប៉ាញ បានដាក់ឱសានុវាទ រហូតដល់ថ្ងៃព្រហស្បតិ៍ទី ១៩តុលា ឲ្យរដ្ឋបាលតំបន់កាតាឡូញ៉ា ធ្វើការបញ្ជាក់ជាផ្លូវការ ថាខ្លួនមិនបានប្រកាសឯករាជ្យទេ។
ដោយគ្មានការបញ្ជាក់ពីតំបន់កាតាឡូញ៉ា នាយករដ្ឋមន្ត្រីអេស្ប៉ាញ បានសម្រេចផ្តើមនីតិវិធីតាមមាត្រា១៥៥ នៃរដ្ឋធម្មនុញ្ញ។ យ៉ាងណាក៏ដោយ ដើម្បីបង្ហាញពីឯកភាពជាតិ លោកនាយករដ្ឋមន្ត្រីអេស្ប៉ាញ បានព្យាយាមទាល់តែបានសម្រេច ដើម្បីទទួលបានការគាំទ្រ ពីសមាជិកសភា មកពីគណបក្សប្រឆាំង មុននឹងសម្រេចបើកនីតិវីធីនេះ ជាផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ