កំណែទម្រង់ប្រព័ន្ធចូលនិវត្តន៍បារាំងស្វែងរកតុល្យភាពនៅឆ្នាំ២០១៨
នៅថ្ងៃពុធទី១៦មិថុនានេះរដ្ឋមន្ត្រី ក្រសួងការងារត្រូវបង្ហាញឲ្យគេដឹងពីកំណែទម្រង់ប្រព័ន្ធចូល និវត្តន៍បារាំងដែលកំពុងខិតខំស្វែងរកតុល្យភាពឲ្យបាននៅឆ្នាំ២០១៨ ខាងមុខនេះ។ តុល្យភាពដែលអាចនឹងស្វែងរកបានដោយសារតែមានការជំរុញអាយុចូល និវត្តន៍ស្របច្បាប់ពី៦០ឆ្នាំទៅ៦២ឆ្នាំ។ ហើយនិង រយៈកាលនៃការបង់ភាគទានទៅក្នុងហិបប្រាក់នៃប្រព័ន្ធចូលនិវត្តន៍ នឹងត្រូវរុញឲ្យកើនឡើងដល់៤១ឆ្នាំកន្លះនៅរវាងឆ្នាំ២០២០ទល់នឹង ៤០ឆ្នាំកន្លះបច្ចុប្បន្ននេះ ហើយនិង៤១ឆ្នាំនៅឆ្នាំ២០១២។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សៀក សារិន
កំណែទម្រង់ប្រព័ន្ធចូលនិវត្តន៍បារាំងនឹងត្រូវប្រព្រឹត្តទៅដោយសន្សឹមៗ។ រដ្ឋាភិបាលបារាំងស្នើជំរុញអាយុចូលនិវត្តន៍ស្របច្បាប់ឲ្យកើនឡើងដល់៦២ឆ្នាំនៅឆ្នាំ២០១៨ទល់នឹងអាយុ៦០ឆ្នាំបច្ចុប្បន្ននេះ ដោយគោរពតាមចង្វាក់កើនឡើងទៅមុខក្នុងល្បឿន៤ខែសម្រាប់រយៈកាល១ឆ្នាំ។ ទាំងនេះគិតចាប់តាំងពីថ្ងៃទី១កក្កដាឆ្នាំ២០១១ទៅ។ នេះជាការគូសបញ្ជាក់របស់លោករដ្ឋមន្ត្រីក្រសួងការងារបារាំងនាឱកាសសន្និសីទកាសែត។ ការជំរុញអាយុចូលនិវត្តន៍ស្របច្បាប់ឲ្យកើនឡើងដល់៦២ឆ្នាំនៅឆ្នាំ២០១៨ទល់នឹងអាយុ៦០ឆ្នាំបច្ចុប្បន្ននេះនឹងធ្វើឲ្យហិបប្រាក់នៃប្រព័ន្ធចូលនិវត្តន៍បារាំងសន្សំសំចៃបានជិត១៩ពាន់លានអឺរ៉ូនៅឆ្នាំ២០១៨។ ហើយកំណែទម្រង់ទៅលើប្រព័ន្ធចូលនិវត្តន៍នេះក៏នឹងធ្វើឲ្យប្រជាជនបារាំងចាប់មានទំនុកចិត្តកក់ក្តៅទៅលើហិបប្រាក់នៃប្រព័ន្ធចូលនិវត្តន៍របស់ខ្លួនផងដែរ។
បើយោងតាមគម្រោងនៃកំណែទម្រង់ប្រព័ន្ធចូលនិវត្តន៍បារាំង រយៈកាលនៃការបង់ភាគទានទៅក្នុងហិបប្រាក់នៃប្រព័ន្ធចូលនិវត្តន៍នឹងត្រូវរុញឲ្យកើនឡើងដល់៤១ឆ្នាំកន្លះនៅរវាងឆ្នាំ២០២០ទល់នឹង៤០ឆ្នាំកន្លះបច្ចុប្បន្ននេះ ហើយនិង៤១ឆ្នាំនៅឆ្នាំ២០១២។ ចំណែកឯអាយុចូលនិវត្តន៍ស្របច្បាប់នៃរបបចូលនិវត្តន៍ពិសេសសម្រាប់អ្នកធ្វើការប្រើកម្លាំងកាយនឿយហត់ច្រើននឹងត្រូវធ្វើការរុញច្រានឲ្យកើនទៅមុខចាប់ពីថ្ងៃទី១មករាឆ្នាំ២០១៧ទៅ។
សូមគូសបញ្ជាក់ថា គម្រោងនៃកំណែទម្រង់ប្រព័ន្ធចូលនិវត្តន៍បារាំងស្វែងរកតុល្យភាពនៅឆ្នាំ២០១៨ដែលបានបង្ហាញឲ្យដឹងនៅថ្ងៃពុធនេះក៏បានគ្រោងផងដែរនឹងធ្វើការរុញច្រានបន្តិចម្តងៗអាយុសម្រាប់ចូលនិវត្តន៍ស្របច្បាប់ពី៦៥ឆ្នាំទៅ៦៧ឆ្នាំចាប់ពីពេលនេះទៅទល់ឆ្នាំ២០១៨សម្រាប់ជនណាដែលចង់ទទួលឲ្យបាននូវប្រាក់សោធននិវត្តន៍គ្រប់ពេញលេញ ដោយមូលហេតុពុំបានបង់ភាគទានឲ្យបានគ្រប់៤១ឆ្នាំឬ៤១ឆ្នាំកន្លះនៅពេលដែលខ្លួនឈានចូលនិវត្តន៍។
ក្រៅពីនេះរដ្ឋាភិបាលបារាំងគ្រោងស្នើផងដែរជំរុញឲ្យការបង់ភាគទានសម្រាប់ប្រព័ន្ធចូលនិវត្តន៍របស់អ្នករដ្ឋការមានកម្រិតស្មើនឹងការបង់ភាគទានសម្រាប់ប្រព័ន្ធចូលនិវត្តន៍របស់អ្នកធ្វើការនៅក្នុងឯកជន។ ទាំងនេះក្នុងរយៈកាល១០ឆ្នាំ។ គួរកត់សម្គាល់ថា បច្ចុប្បន្ននេះអត្រានៃការបង់ភាគទានសម្រាប់ប្រព័ន្ធចូលនិវត្តន៍របស់អ្នកធ្វើការនៅក្នុងឯកជនមានកម្រិត១០,៥៥%នៃប្រាក់បៀវត្សរ៍ដុល។ រីឯអ្នករដ្ឋការបារាំងវិញ គេបង់តែ៧,៨៥%ប៉ុណ្ណោះ។ ហើយបន្ថែមពីលើនេះ រដ្ឋាភិបាលបារាំងគ្រោងដកពន្ធ១%បន្ថែមទៀតទៅលើអ្នកដែលមានប្រាក់ចំណូលថ្នាក់ខ្ពស់ជាងគេ ដើម្បីយកមកជួយដោះស្រាយបញ្ហាឧនភាពប្រព័ន្ធចូលនិវត្តន៍បារាំង។
មិនតែប៉ុណ្ណោះរដ្ឋាភិបាលបារាំងគ្រោងដកពន្ធ១%ទៀតទៅលើប្រាក់ចំណូលបានមកពីវិស័យហិរញ្ញវត្ថុឬមូលធន។ ហើយរដ្ឋាភិបាលបារាំងក៏បានគ្រោងផងដែរប្រើប្រាស់ប្រាក់ដែលមាននៅក្នុងមូលនិធិបម្រុងទុកសម្រាប់ប្រព័ន្ធចូលនិវត្តន៍ដើម្បីដោះស្រាយបញ្ហាឧនភាពនៃរបបចូលនិវត្តន៍ទូទៅចាប់ពីពេលនេះទៅទល់ឆ្នាំ២០១៨។
បើវិធានការនៃកំណែទម្រង់ប្រព័ន្ធចូលនិវត្តន៍បារាំងសម្រេចបានជោគជ័យមែន នោះប្រព័ន្ធចូលនិវត្តន៍បារាំងលែងមានបញ្ហាឧនភាពទៀតហើយ។ បើយោងតាមតារាំងដែលបានផ្សព្វផ្សាយឲ្យដឹងក្រសួងការងារបានឲ្យដឹងថា កំណែទម្រង់ប្រព័ន្ធចូលនិវត្តន៍នឹងអាចអនុញ្ញាតឲ្យឧនភាពនៃប្រព័ន្ធចូលនិវត្តន៍បារាំងធ្លាក់មកនៅត្រឹម៧ពាន់៨រយលានអឺរ៉ូនៅឆ្នាំ២០១៥ទល់នឹង១៦ពាន់៨រយលានអឺរ៉ូដែលគ្រោងមាននៅឆ្នាំ២០១០ ហើយនៅទីបំផុតគឺ ប្រព័ន្ធចូលនិវត្តន៍បារាំងអាចមានតុល្យភាពនៅឆ្នាំ២០១៨។
សូមបញ្ជាក់ថា បើគេពុំខិតខំធ្វើការកែទម្រង់ប្រព័ន្ធចូលនិវត្តន៍ទេ នៅឆ្នាំ២០២០ ប្រព័ន្ធចូលនិវត្តន៍បារាំងអាចមានឧនភាពប្រមាណ៥០ពាន់លានអឺរ៉ូក្នុង១ឆ្នាំៗ ហើយនៅឆ្នាំ២០៥០ ប្រព័ន្ធចូលនិវត្តន៍បារាំងអាចមានឧនភាពដល់ទៅ១០០ពាន់លានអឺរ៉ូក្នុង១ឆ្នាំៗទល់នឹង២ពាន់២រយលានអឺរ៉ូបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ