លោកជូលៀន អាសាញ់ជ៍ កំពុងជាប់គុក Wikileaks បន្តចុះផ្សាយឯកសារសម្ងាត់
លោកជូលៀន អាសាញ់ជ៍ (Julian Assange) ស្ថាបនិកវែបសៃត៍ Wikileaks បានស្គាល់គុកក្នុងប្រទេសអង់គ្លេសមួយយប់ហើយ បន្ទាប់ពីប៉ូលីសអង់គ្លេសបានឃាត់ខ្លួនលោកនៅថ្ងៃអង្គារ ទី៧ ធ្នូម្សិលមិញ។ លោកជូលៀន អាសាញ់ជ៍ (Julian Assange) សុំបង់ប្រាក់តម្កល់ដើម្បីស្ថិតនៅក្រៅឃុំបណ្តោះអាសន្ន តែត្រូវបានតុលាការអង់គ្លេសបដិសេធ។ វែបសៃត៍ Wikileaks ដែលមានជំនាញខាងចុះផ្សាយឯកសារសម្ងាត់។ ថ្មីៗនេះ គឺការចុះផ្សាយឯកសារសម្ងាត់ទាក់ទងនឹងកិច្ចសន្ទនារវាងមន្រ្តីការទូត អាមេរិក និងមន្រ្តីរដ្ឋាភិបាលនៃបណ្តាប្រទេសជាសម្ព័ន្ធមិត្ត។
ចុះផ្សាយនៅថ្ងៃ៖
បទអន្តរាគមន៍របស់គួច គន្ធារ៉ា
កន្លងមកយើងបានដឹងថា តំាងពីក្រោយវែបសៃត៍ Wikileaks បានចុះផ្សាយឯកសារសម្ងាត់ទំាងអម្បាលម៉ានទាក់ទងនឹងសហរដ្ឋអាមេរិក មានទំាងសំណុំរឿងសង្រ្គាមនៅអៀរ៉ាក់ នៅអាហ្វហ្កានីស្តង់ និងចុងក្រោយ សំណុំរឿងការទូតអាមេរិកមក លោកជូលៀន អាសាញ់ជ៍ (Julian Assange) ដែលជាស្ថាបនិកវែបសៃត៍ Wikileaks បានក្លាយជាមនុស្សម្នាក់ដែលមានប៉ូលីសប្រមាណជា ១៨៨នាក់ក្នុងលោកតាមរកចាប់ខ្លួន។ ទីបំផុតទៅនៅថ្ងៃអង្គារ ទី៧ ធ្នូម្សិលមិញ លោកជូលៀន អាសាញ់ជ៍បានប្រគល់ខ្លួនទៅឲ្យប៉ូលីសអង់គ្លេស។ ភ្លាមៗ ប៉ូលីសអង់គ្លេសក៏បានចាប់លោក ជូលៀន អាសាញ់ជ៍ (Julian Assange) ដាក់គុក។ ក៏ប៉ុន្តែ ការឃាត់ខ្លួនលោកជូលៀន អាសាញ់ជ៍នេះ មិនមែនទាក់ទងនឹងការចុះផ្សាយឯកសារសម្ងាត់ទំាងជាង ២៥ម៉ឺនឯកសារស្តីពីនយោបាយការបរទេសអាមេរិកំាងនោះទេ។
តាមពិតទៅ ស្ថាបនិកវែបសៃត៍ Wikileaks រូបនេះបានស្ថិតក្រោមដីកាចាប់ខ្លួនអន្តរជាតិរបស់តុលាការប្រទេសស៊ុយអែដអស់ជាច្រើនថ្ងៃកន្លងមកហើយ។ តុលាការស៊ុយអែដដែលបានចោទលោកជូលៀន អាសាញ់ជ៍ (Julian Assange) ពីបទល្មើសផ្លូវភេទ។ ជាបទល្មើសមួយដែលបានកើតឡើងកាលពីខែសីហាកន្លងទៅ បន្ទាប់ពីមានក្មេងស្រីពីររូបបានសារភាពថា ត្រូវបានលោកជូលៀន អាសាញ់ជ៍ (Julian Assange) ចាប់រំលោភ និងគំរាមរួមភេទ។
ខណៈនេះ តុលាការអង់គ្លេសមានពេល ២១ថ្ងៃដើម្បីសម្រេចថា តើត្រូវបញ្ជូន ឬមិនត្រូវបញ្ជូនលោកជូលៀន អាសាញ់ជ៍ (Julian Assange) ទៅឲ្យតុលាការស៊ុយអែដ។ ទោះជាយ៉ាងណាក៏ដោយ តុលាការអង់គ្លេសបានសម្រេចរួចហើយថា នឹងបន្តឃុំលោកជូលៀន អាសាញ់ជ៍ (Julian Assange) រហូតដល់ថ្ងៃទី ១៤ ធ្នូ។
តើការចាប់ខ្លួនលោកជូលៀន អាសាញ់ជ៍ ជាល្បិចកលរបស់សហរដ្ឋអាមេរិក ឬ ?
គេមិនអាចដឹងទេថា តើការចាប់ខ្លួនលោកជូលៀន អាសាញ់ជ៍ (Julian Assange) ដោយដីកាអន្តរជាតិរបស់តុលាការស៊ុយអែដពេលនេះ ជាកលល្បិចរបស់អាមេរិក ឬយ៉ាងណានោះ។ គេបានដឹងហើយថា អ្វីដែលវែបសៃត៍ Wikileaks បានចុះផ្សាយឯកសារសម្ងាត់អាមេរិកកន្លងមក បានធ្វើឲ្យរដ្ឋបាលក្រុងវ៉ាស៊ីនតោនក្តៅក្រហាយមិនតិចទេ ពិសេស ឯកសារសម្ងាត់ទាក់ទងនឹងកិច្ចសន្ទនារវាងមន្រ្តីការទូតអាមេរិក និងមន្រ្តីរដ្ឋាភិបាលនៃបណ្តាប្រទេសជាសម្ព័ន្ធមិត្តរបស់អាមេរិក។
តំាងពីពេលនោះមក អាជ្ញាធរអាមេរិកបានប្រកាសឲ្យដឹងថា គេកំពុងតែធ្វើការស៊ើបអង្កេតទៅលើការលេចធ្លាយបែកការឯកសារសម្ងាត់ដោយវែបសៃត៍ Wikileaks ។ តែគ្មានព័ត៌មានជាផ្លូវការណាមួយដែលបញ្ជាក់ថា ទីក្រុងវ៉ាស៊ីនតោនបានចេញដីកាតាមរកចាប់ខ្លួនលោកអាសាញ់ជ៍នោះទេ។ ប៉ុន្តែទន្ទឹមគ្នានោះ និងអាចថាជារឿងមួយចៃដន្យក៏ថាបាន ស្រាប់តែតុលាការនៅប្រទេសស៊ុយអែដបែរជាបានចេញដីកាអន្តរជាតិតាមរកចាប់លោកអាសាញ់ជ៍នៅក្នុងសំណុំរឿងបទល្មើសផ្លូវភេទទៅវិញ។
ពិតណាស់ថា ទោះបីជាការចាប់ខ្លួនលោកអាសាញ់ជ៍ពេលនេះ មិនមានទាក់ទងនឹងការចុះផ្សាយឯកសារសម្ងាត់អាមេរិកក៏ដោយ ក៏មានមន្រ្តីអាមេរិកមួយចំនួនញញឹម បិទមាត់មិនជិតទេ មុនគេគឺរដ្ឋមន្រ្តីក្រសួងការពារជាតិ លោក Robert Gates។ លោក Robert Gates ដែលបានចាត់ទុកការចាប់ខ្លួនលោកអាសាញ់ជ៍ ថាជាដំណឹងល្អមួយ។
លោកជូលៀន អាសាញ់ជ៍កំពុងជាប់គុក Wikileaks បន្តការងារប្រចំាថ្ងៃ
លោកអាសាញ់ជ៍ផ្ទាល់ក៏ធ្លាប់បានទទួលការគំរាមសម្លាប់។ ឥឡូវនេះទៀត គណនីរបស់វែបសៃត៍ Wikileaks នៅធនាគារស្វីសត្រូវបានគេបិទចោល ឈប់ឲ្យប្រើប្រាស់។ គឺតាមរយៈគណនីនេះហើយ ដែលវែបសៃត៍ Wikileaks បានទទួលប្រាក់ឧបត្ថម្ភពីសប្បុរសជនដែលជួយគំាទ្រការងាររបស់លោកអាសាញ់ជ៍។ សេវាបង់ប្រាក់តាមប្រព័ន្ធ Internet របស់អាមេរិកំាងឈ្មោះ Paypal និងក្រុមហ៊ុន Mastercard ក៏បានបិទសេវាបញ្ជូនប្រាក់ទៅឲ្យវែបសៃត៍ Wikileaks ដោយលើកហេតុផលថា សកម្មភាពរបស់វែបសៃត៍ Wikileaks ជាសកម្មភាពខុសច្បាប់។ ទន្ទឹមគ្នានេះ គេហទំព័រ Wikileaks ក៏ទទួលរងការវាយប្រហារពីគ្រប់ទិសទីដែរ។
ទោះបីជាមេរបស់ខ្លួនកំពុងជាប់ឃុំក៏ដោយ ក៏សហការីរបស់លោកជូលៀន អាសាញ់ជ៍ (Julian Assange) មិនបញ្ឈប់ការងាររបស់គេដែរ។ « គ្រប់សកម្មភាពដែលសំដៅប្រឆំាងនឹងប្រធានរបស់យើងនាពេលនេះ មិនបានធ្វើឲ្យប៉ះពាល់ដល់ការងាររបស់យើងទេ » នេះជាសារដែលសរសេរនៅក្នុងប្លុក Twitter របស់វែបសៃត៍ Wikileaks។ លោកជូលៀន អាសាញ់ជ៍ (Julian Assange) ក៏ធ្លាប់បានព្រមានរួចហើយថា លោកនឹងចុះផ្សាយឯកសារសម្ងាត់សំខាន់ៗជាច្រើនទៀត ប្រសិនបើគ្រប់គ្នាហ៊ានចាត់វិធានការចាស់ដៃលើវែបសៃត៍ Wikileaks។
តើជោគវាសនាអនាគតរបស់លោកជូលៀន អាសាញ់ជ៍នឹងទៅជាយ៉ាងណា ?
នេះជាសំណួរដែលទំាងអស់គ្នាកំពុងចង់ដឹង ព្រោះថា អ្វីដែលបាននិងកំពុងកើតមានលើរូបលោកជូលៀន អាសាញ់ជ៍ (Julian Assange) នាពេលនេះ ប្រហែលគ្រាន់តែជាជំហានដំបូងនៃការប្រឈមមុខនឹងតុលាការប៉ុណ្ណោះ។ ប៉ុន្តែនៅចំពោះមុខ និងអ្វីដែលក្រុមមេធាវីរបស់លោកជូលៀន អាសាញ់ជ៍ (Julian Assange) ព្យាយាមចៀសឲ្យផុតនោះ គឺការចាប់បញ្ជូនកូនក្តីរបស់ខ្លួនទៅឲ្យរដ្ឋអំណាចប្រទេសស៊ុយអែដ។ ចំណែកក្តីបារម្ភផ្ទាល់របស់លោកជូលៀន អាសាញ់ជ៍ (Julian Assange) វិញ គឺការចាប់បញ្ជូនខ្លួនលោកទៅឲ្យសហរដ្ឋអាមេរិក ដែលនៅទីនោះ លោកនឹងត្រូវឆ្លើយនៅចំពោះមុខតុលាការអាមេរិកំាងពីបទចុះផ្សាយឯកសារសម្ងាត់យោធា និងការទូត។ យើងមិនដឹងថា តើជោគវាសនាអនាគតលោកជូលៀន អាសាញ់ជ៍ (Julian Assange) នឹងទៅជាយ៉ាងណាទេ អ្វីដែលយើងដឹង ជូលៀន អាសាញ់ជ៍ត្រូវបានអាមេរិកចាត់ទុកជាសត្រូវម្នាក់ដែលត្រូវកំចាត់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ