លោក Nazarbaiev ដែលកាន់អំណាច២០ឆ្នាំមកហើយ ឈ្នះឆ្នោតជាថ្មី
គ.ជ.ប. កាហ្សាក់ស្តង់.ទើបបានប្រកាសជាផ្លូវការ លទ្ធផលនៃការបោះឆ្នោតមុនកាលកំណត់ដែលបានប្រព្រឹត្តទៅម្សិលមិញ ថា ដោយសំឡេងគាំទ្រដល់ទៅ៩៥,៥% ប្រធានាធិបតីសព្វថ្ងៃ លោក Nazarbaiev អាយុ៧០ឆ្នាំ ឈ្នះឆ្នោតសំរាប់មួយ អាណត្តិថ្មីទៀត ដែលជា អាណត្តិលើកទី៤ទៅហើយ ទាំងវ៉ាដាច់ឆ្ងាយ លើគូប្រជែង៣នាក់ទៀត។ តើហេតុអ្វីបានជាគាត់មានប្រជាប្រិយភាពម៉្លឹងៗ ទោះបីបក្សប្រឆាំងចោទគាត់ថាកាន់អំណាចផ្តាច់ការក្តី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយាពីទីក្រុង ម៉ូស្គូ
គឺក្នុងន័យផ្គើនឲ្យ”បក្សសង្គម-ប្រជាធិបតេយ្យ” ជាបក្សប្រឆាំងធំបំផុត ដែលខំអំពាវនាវប្រជាជនឲ្យធ្វើពហិការកុំទៅបោះឆ្នោតអី ដែលគ.ជ.ប. បានប្រកាសថា មាន ដល់ទៅ ៩០% ឯណោះ ពីក្នុងចំណោមអ្នកមានសិទ្ធិបោះឆ្នោតចំនួនជិត៩លាន២សែនបានទៅកាន់ហិបឆ្នោត។
ការនេះបានញ៉ាំងទីប្រឹក្សាលោកប្រធានាធិបតី Nazarbaiev ឲ្យថ្លែងប្រកបដោយមោទនភាព ថា ការបោះឆ្នោតលើកនេះ គឺល្អឥតខ្ចោះ ក្នុងប្រវត្តិទាំងមូលរបស់កាហ្សាក់ស្តង់។ ប៉ុន្តែព្រឹកមិញ “អង្គការដើម្បីសន្តិសុខនិង សហប្រតិបត្តិការនៅទ្វីបអឺរ៉ុប” OSCEដែលមានភារៈខាងតាមដានអំពីការបោះឆ្នោតនៅក្នុងប្រទេសទាំង៥៦ ជាសមាជិក ខ្លួន បានថ្លែងថា ការបោះឆ្នោតម្សិលមិញ នៅ កាហ្សាក់ស្តង់ បានប្រព្រឹត្តទៅ ក្នុងកម្រិតនៅទាបជាង ស្តង់ដារដែលតម្រូវ។
តាមពិត អាណត្តិលោក Nazarbaievត្រូវផុតលុះ២ឆ្នាំទៀត គឺនៅដំណាច់ឆ្នាំ២០១២ឯណោះប៉ុន្តែកាលពីដើមឆ្នាំនេះ រដ្ឋសភា កាហ្សាក់ស្តង់ ដោយយោងទៅលើហត្ថលេខា អង្គាសបានដោយអ្នកស្រុកដល់ទៅ៥លាននាក់ ដែលចង់ឃើញ រូបគាត់ ក្នុងឋានៈជា”បិតាជាតិ” នៅជា ប្រមុខរដ្ឋដដែល ស្រាប់តែ បានអនុម័តសេចក្តីសម្រេច ឲ្យធ្វើប្រជាមតិ ពន្យារអាណត្តិគាត់រហូតដល់ឆ្នាំ២០២០ទៅ ដោយមិនបាច់ឆ្លងកាត់ការបោះឆ្នោតអ្វីណាទេ។
ប៉ុន្តែ ក្រុមប្រឹក្សាធម្មនុញ្ញ បានសន្និដ្ឋានគម្រោងធ្វើប្រជាមតិនោះថាផ្ទុយនឹងរដ្ឋធម្មនុញ្ញទេតើ។ ឃើញដូច្នេះ លោក Nazarbaiev ដែលតែងចាត់ទុកខ្លួនឯង ជាអ្នកប្រជាធិបតេយ្យ ដែលមិនចង់បានអំណាចដោយឯងៗ និងដែលព្យាយាមកសាង នីតិរដ្ឋនៅ កាហ្សាក់ស្តង់ ក៏បាន ប្រកាស ធ្វើការបោះឆ្នោតមុនកាលកំណត់ទៅដើម្បីបញ្ជាក់ពីអាណត្តិខ្លួន។
តាមយោបល់ ពួកអ្នកសង្កេតការណ៍ លោក Nazarbaievដែលត្រូវអ្នកស្រុកបន្តគាំទ្រប្តូរផ្តាច់ គឺដោយសារសមិទ្ធិផល នៃនយោបាយគាត់ ទាំងក្នុងប្រទេសទាំងក្រៅប្រទេស៖
--ក្នុងប្រទេស គឺ គាត់ចេះធានាឲ្យមានស្ថិរភាព មានសន្តិសុខ និងការអភិវឌ្ឍន៍យ៉ាងផុសផុលនៃសេដ្ឋកិច្ច ទាល់តែក្រុមហ៊ុនបស្ចិមលោក នាំគ្នាបោះទុនយ៉ាងក្រាស់ក្រែល ទៅក្នុងវិស័យឧស្ម័ននិងប្រេងកាតនៃដែនដីនេះ ដែលកាលពីមុន ជាតំបន់ចុងកាត់មាត់ញកសោះរបស់ សហភាពសូវៀតនៅភូម៌ភាគអាស៊ីកណ្តាល។
--លើឆាកអន្តរជាតិ ពេញ១ឆ្នាំ២០១០កន្លងទៅ កាហ្សាក់ស្តង់ក្លាយ ជារដ្ឋទី១នៃអតីតសហភាពសូវៀត ដែលបានទទួលសិទ្ធិធ្វើជាប្រធានផ្លាស់វេន របស់ អង្គការ OSCE៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ