អាមេរិកចាប់ផ្តើមដាក់ទណ្ឌកម្ម នៅពេលអឺរ៉ុបមិនចង់ឲ្យមានទណ្ឌកម្មសេដ្ឋកិច្ចលើរុស្ស៊ី
ចុះផ្សាយនៅថ្ងៃ៖
ស្តាប់ - ០៧:៣២
នៅក្នុង វិបត្តិនៅអ៊ុយក្រែន ការចរចាការទូតបានបរាជ័យជាថ្មី នៅទីក្រុងព្រុចស៊ែល ប្រទេសប៊ែលហ្សិក។ នៅក្រោយជំនួបរវាងប្រមុខការបរទេសរុស្ស៊ី និងសហភាពអឺរ៉ុប គេនៅតែរកមិនទាន់ឃើញដំណោះស្រាយដើម្បីដោះស្រាយវិបត្តិរុស្ស៊ី អ៊ុយក្រែន។ ថ្នាក់ដឹកនាំអ៊ុយក្រែនចោទរុស្ស៊ីថា បានដាក់ឱសានវាទឲ្យទាហានអ៊ុយក្រែន នៅគ្រីមេទម្លាក់អាវុធ កាលពីថ្ងៃចន្ទម្សិលមិញ។ អាមេរិកបានសម្រុកដាក់គំនាប ទៅលើរុស្ស៊ី ដោយមិនផាត់ចោលទេទណ្ឌកម្មការទូត និងសេដ្ឋកិច្ច ដើម្បីឲ្យរុស្ស៊ីដកទ័ពចេញពីអ៊ុយក្រែន។ ប្រមុខការបរទេសអាមេរិកធ្វើដំណើរទៅទីក្រុងគៀវ នៅថ្ងៃអង្គារទី ៤ មីនា ដើម្បីបញ្ជាក់ការគាំទ្រ និងជំនួយសេដ្ឋកិច្ចដល់រដ្ឋាភិបាលថ្មីអ៊ុយក្រែន នៅពេលដែលប្រមុខការបរទេសរុស្ស៊ីបានចាត់ទុកទណ្ឌកម្មរបស់អាមេរិកថា ជាសកម្មភាពគ្មានឥទ្ធិពលធ្វើឲ្យរុស្ស៊ីដូរជំហរស្តីពីអ៊ុយក្រែន។
នៅក្នុងសុន្ទរកថារបស់ខ្លួនជាលើកទីមួយស្តីពីអ៊ុយក្រែន លោកប្រធានាធិបតី រុស្ស៊ី វ្លាឌីមៀរ ពូទីនបានថ្លែងកាលពីថ្ងៃអង្គារនេះ ថា រស្ស៊ីនៅតែទទួលស្គាល់លោកយ៉ានូកូវិចថា ជាប្រធានាធិបតីស្របច្បាប់ ហើយអ៊ុយក្រែនបានជួបរដ្ឋប្រហារ ដោយក្រុមប្រដាប់អាវុធបានប្លន់យកអំណាច ដែលខុសពីរដ្ឋធម្មនញ្ញអ៊ុយក្រែន។
លោកប្រធានាធិបតីអាមេរិកបានវាយតម្លៃថា រុស្ស៊ីកំពុងឈរនៅផ្នែកអាក្រក់នៃប្រវត្តិសាស្រ្ត ដោយសារតែបានចូលទៅរំលោភបូរណភាពទឹកដីរបស់អ៊ុយក្រែន។ លោកអូបាម៉ាបានព្រមានថា បើសិនជារុស្ស៊ីនៅតែដើរលើផ្លូវខុស តទៅទៀត នោះ អាមេរិកនឹងពិចារណាផងដែរ ដើម្បីដាក់ទណ្ឌកម្មផ្នែកសេដ្ឋកិច្ច និងការទូត ទៅលើរុស្ស៊ី គឺធ្វើយ៉ាងម៉េចដើម្បីឲ្យរុស្ស៊ីស្ថិតនៅឯកោ។
►សូមអាន៖ លោកពូទីនទទួលមែន ភ្លើងខៀវពីព្រឹទ្ធសភាឲ្យគាត់ប្រើកងទ័ពរុស្ស៊ី នៅអ៊ុយក្រែន
កាលពីថ្ងៃចន្ទម្សិលមិញ ទីក្រុងវ៉ាស៊ីនតោន បានសម្រេចផ្អាក ព្យួរទំនាក់ទំនងយោធាជាមួយរុស្ស៊ី។ តាមមន្ទីរបញ្ចកោណអាមេរិក អាមេរិកបានសម្រេចផ្អាកសមយុទ្ធ រួមគ្នា និងការប្រជុំទ្វេភាគីជាមួយរុស្ស៊ី។ ការចុះចតនាវា របស់អាមេរិក នៅតាមកំពង់ផែរុស្ស៊ី និងលែងមានតទៅទៀត សន្និសីទដើម្បីពិភាក្សាលើផែនការយោធារវាងរុស្ស៊ី និងអាមេរិក។
អាមេរិកប្រើសេដ្ឋកិច្ចជាអាវុធប្រឆាំងរុស្ស៊ី
តាមប្រភពពីមន្រ្តីអាមេរិក ក្នុងចំណាត់ការដាក់ទណ្ឌកម្ម គេមាននិយាយពីការហាមផ្តល់ទិដ្ឋាការដល់មន្រ្តីរុស្ស៊ីដែលពាក់ព័ន្ធនឹងការបញ្ជូនទ័ពទៅគ្រីមេ។ ទណ្ឌកម្មនឹងអាចរីករាលដល់អ្នកទទួលខុសត្រូវសំខាន់ៗក្នុងជួររដ្ឋាភិបាលរុស្ស៊ី។ ក្រៅតែពីគំនាបការទូត អាមេរិកចង់យកសេដ្ឋកិច្ចមកធ្វើជាអាវុធសំខាន់ដើម្បីដាក់សម្ពាធលើរុស្ស៊ី។ ទណ្ឌកម្មសេដ្ឋកិច្ចអាចមានរាប់បញ្ចូលតាំងពីការដករុស្ស៊ីចេញពីក្រុមប្រទេសមានឧស្សាហកម្មលូតលាស់ G ៨ ការដក ផាត់ចោលធានាគាររុស្ស៊ីចេញពី ប្រព័ន្ធហិរញ្ញវត្ថុអាមេរិក ការផ្អឹបទ្រព្យសម្បត្តិរបស់លោកប្រធានាធិបតីពូទីន ឬកាត់បន្ថយការដោះដូរពាណិជ្ជកម្មរវាងប្រទេសទាំងពីរ។ នៅឆ្នាំ២០១៣ ទំនាក់ទំនងពាណិជកម្មរុស្ស៊ីអាមេរិកមានតម្លៃ ៣៨ពាន់លានដុល្លារ។ ទំហំវិនិយោគដោយផ្ទាល់របស់ក្រុមហ៊ុនអាមេរិកកាំង នៅរុស្ស៊ីមានតម្លៃ ១៤ពាន់លានដុល្លារ។ ដើម្បីរក្សាលំនឹងសេដ្ឋកិច្ចរបស់ខ្លួន រុស្ស៊ីត្រូវការជាចាំបាច់ការវិនិយោគ។
ដើម្បីឲ្យសេដ្ឋកិច្ចរុស្ស៊ីកាន់តែរងគ្រោះ អាមេរិកគ្រោងនឹងជួយសេដ្ឋកិច្ចអ៊ុយក្រែន ដើម្បីទប់ទល់នឹងការគំរាមកំហែងសេដ្ឋកិច្ចរបស់រុស្ស៊ី។ ហើយទៅទៅថ្ងៃអនាគត អាមេរិកគ្រោងនឹងរំដោះសហភាពអឺរ៉ុបឲ្យចេញផុតពីការពឹងផ្អែកទៅលើឧស្ម័នរុស្ស៊ី។ សមាជិកអាមេរិកបានលើកឡើងពីសំណើចង់ឲ្យអាមេរិកបញ្ជូនលក់ឧស្ម័នទៅអឺរ៉ុប។
ជារួម តាមទីក្រុងវ៉ាស៊ីនតោន ដើម្បីឲ្យការដាក់ទណ្ឌកម្មទៅលើរុស្ស៊ី មានប្រសិទ្ធិភាព ពោល គឺការដាក់សម្ពាធខ្លាំងរហូតដល់រុស្ស៊ីយល់ព្រមដកទ័ពចេញពីអ៊ុយក្រែន បាន លុះណាតែអាមេរិកមានជំនួយគាំទ្រពីសហភាពអឺរ៉ុប។ អាមេរិកចង់បញ្ជាក់ទៅភាគីអឺរ៉ុបថា រុស្ស៊ីនឹងមិនផ្លាស់ប្តូរជំហរទេ បើអាមេរិកតឹងរ៉ឹងតែម្នាក់ឯង ចំណែកសហភាពអឺរ៉ុបនៅធូរលុង និងបើកទ្វារសេដ្ឋកិច្ចសម្រាប់រុស្ស៊ីនោះ។
ដោយសារផលប្រយោជន៍ អឺរ៉ុបមិនចង់ដាក់ទណ្ឌកម្មសេដ្ឋកិច្ចលើរុស្ស៊ី
សហភាពអឺរ៉ុបមាន២៨ប្រទេស គឺមិនងាយនឹងអាចរកឃើញឯកភាពគ្នា បានឆាប់ទេ។ ថ្វីត្បិតតែអឺរ៉ុបជាទូទៅថ្កោលទោសទៅលើសកម្មភាពឈ្លានពានទ័ពរបស់រុស្ស៊ី លើទឹកដីអ៊ុយក្រែន ប៉ុន្តែ សមាជិកទាំង២៨របស់សហភាពអឺរ៉ុបនៅខ្វែងគំនិត មិនទាន់យល់ស្របគ្នា ពីរឿងដាក់ទណ្ឌកម្មទៅលើរុស្ស៊ី។ នៅក្នុងកិច្ចប្រជុំនៅទីក្រុងព្រុចស៊ែល កាលពីថ្ងៃម្សិលមិញ អឺរ៉ុប បានត្រឹមព្រមានសម្រេចផ្អាកការចរចាស្តីពីការផ្តល់ទិដ្ឋាការដល់ជនជាតិរុស្ស៊ី និងកិច្ចព្រមព្រៀងថ្មីស្តីពីសហប្រតិបត្តិការរវាងរុស្ស៊ី និងសហភាពអឺរ៉ុប។
អាល្លឺម៉ង់វិញ ដែលចូលរួមជួយបន្ថយភាពតានតឹងរវាងរុស្ស៊ី និងអ៊ុយក្រែន មិនទាន់បាននិយាយដល់ការដាក់ទណ្ឌកម្មទៅលើរុស្ស៊ីទេ។ សម្រាប់ប្រមុខដឹកនាំអាល្លឺម៉ង់ វានៅមិនទាន់ហួសពេលទេ រុស្ស៊ីនៅមានពេលដើម្បីបន្ថយភាពតានតឹង និងរកដំណោះស្រាយនយោបាយឲ្យវិបត្តិនៅអ៊ុយក្រែន។
រហូតមកដល់ពេលនេះ អឺរ៉ុបអាចមូលមតិគ្នាដើម្បីដាក់ទណ្ឌកម្មផ្នែកការទូត ប៉ុន្តែ សមាជិកភាគច្រើនរបស់សហភាពអឺរ៉ុបមិនចង់ឲ្យមានទណ្ឌកម្មសេដ្ឋកិច្ចទៅលើរុស្ស៊ីទេ។ មូលហេតុ គឺមកពី ប្រទេសនៅអឺរ៉ុបមួយចំនួន កំពុងបោះទុនវិនិយោគ ក្នុងទឹកដីរុស្ស៊ី ឬកំពុងធ្វើជំនួញជាមួយក្រុមហ៊ុនរុស្ស៊ី។ អង់គ្លេស ជាឧទាហរណ៍ស្រាប់។ ឯកសារមួយ ដែលទូរទស្សន៍BBC បានផ្សាយ កាលពីថ្ងៃម្សិលមិញបានបង្ហាញថា សម្រាប់ពេលនេះ អង់គ្លេសមិនអាចគាំទ្រការដាក់ទណ្ឌកម្មពាណិជ្ជកម្មទៅលើរុស្ស៊ីបានទេ។ ពោលគឺទីក្រុងឡុងស៍ មិនចង់បិទទ្វារធនាគាររបស់ខ្លួន ដល់ក្រុមវិនិយោគរុស្ស៊ីនោះទេ។
ជំហររបស់អង់គ្លេស ដែលជាសម្ព័ន្ធមិត្តរបស់អាមេរិកនឹងអាចធ្វើឲ្យអាមេរិកខកចិត្ត ព្រោះមិនបានការគាំទ្រ១០០ភាគរយពីដៃគូ។ ប៉ុន្តែ យ៉ាងណាក៏ដោយ ដើម្បីកុំឲ្យអាមេរិកថ្នាំងថ្នាក់ចិត្តខ្លាំង អង់គ្លេសបានបញ្ជាក់ថា ខ្លួនកំពុងគ្រោងរឹតបន្តឹងលើការផ្តល់ទិដ្ឋាការ និងការផ្លាស់ទីរបស់អ្នកទទួលខុសត្រូវរុស្ស៊ី ក្នុងទឹកដីអង់គ្លេស។
ប្រទេសអឺរ៉ុបផ្សេងទៀត ក៏មិនសូវគាំទ្រឲ្យមានទណ្ឌកម្មសេដ្ឋកិច្ចទៅលើរុស្ស៊ី ដោយសារតែឧស្ម័នមួយភាគបួនរបស់អឺរ៉ុបនាំចូលមកពីរុស្ស៊ី ដោយឆ្លងកាត់ទឹកដីអ៊ុយក្រែន។ ប្រទេសអឺរ៉ុបភាគច្រើន ដូចជាបារាំងជាដើម នៅត្រូវការឧស្ម័ន រុស្ស៊ី ចំណែកថាមពលរបស់ប្រទេសខ្លះ ដូចជាលីតូនី អេស្តូនី ត្រូវពឹងផ្អែក១០០ភាគរយតែម្តងទៅលើឧស្ម័នរុស្ស៊ី។
ពូទីនបញ្ជាឲ្យទ័ពដែលធ្វើសមយុទ្ធត្រលប់ចូលបន្ទាយវិញ
នៅលើផ្នែកនយោបាយការទូត គេមិនដឹងច្បាស់ទេពីប្រសិទ្ធិភាពនៃទណ្ឌកម្មសេដ្ឋកិច្ចរបស់អាមេរិក។ គេក៏មិនប្រាកដទេដែរថា តើលោកពូទីនដែលបានបញ្ជាឲ្យទ័ពដែលធ្វើសមយុទ្ធនៅតាមព្រំដែន អ៊ុយក្រែន ចូលក្នុងបន្ទាយវិញ នោះ កំពុងអាចបន្ទន់ជំហរដោយសារតែគំនាបរបស់អាមេរិក។
ប៉ុន្តែ នៅលើទីផ្សារភាគហ៊ុនវិញ គេមើលឃើញយ៉ាងច្បាស់ ថា យុទ្ធសាស្រ្តរបស់អាមេរិកដើម្បីដាក់រុស្ស៊ីនៅឯកោបានផ្តល់លទ្ធផលជាផ្លែផ្កា។ តាំងពីប៉ុន្មានថ្ងៃមកហើយ គឺចាប់តាំងពីមានការគំរាមដាក់ទណ្ឌកម្មទៅលើរុស្ស៊ី ទីផ្សារភាគហ៊ុនរបស់រុស្ស៊ីបានដាំក្បាលធ្លាក់ចុះ។ កាលពីថ្ងៃម្សិលមិញ ទីផ្សារភាគហ៊ុនរុស្ស៊ីបានធ្លាក់ចុះខ្លាំង ដល់ទៅ ១៣ភាគរយ។ លុយរូប្លក៏ធ្លាក់ចុះខ្លាំ បើប្រៀបធៀបនឹងលុយដុល្លារ និងលុយអឺរ៉ូ។ ដំណឹងនេះ មិនមែនជាដំណឹងល្អសម្រាប់សេដ្ឋកិច្ចរុស្ស៊ី ដែលកំពុងប្រឈមមុខនឹងចលនាលំហូរទុន ចេញទៅក្រៅប្រទេស។ ក្នុងរយៈពេល២ឆ្នាំចុងក្រោយនេះ រុស្ស៊ីរងគ្រោះខ្លាំងដោយសារលំហូរទុនទៅបរទេស ប្រមាណ ៦០ពាន់លានដុល្លារ ក្នុងមួយឆ្នាំៗ។ ទុនវិនិយោគហូរចេញទៅក្រៅប្រទេស ដោយសារតែអ្នកវិនិយោគមិនជឿទុកចិត្តលើស្ថិរភាពនយោបាយរបស់រដ្ឋាភិបាល រុស្ស៊ី។
រុស្ស៊ីវិញមិនបានព្រងើយកន្តើយនឹងការដាក់គំនាបពីអាមេរិកដែរ។ នៅថ្ងៃនេះ ទីប្រឹក្សារដ្ឋាភិបាលម្នាក់បានព្រមានថា រុស្ស៊ីនឹងកាត់បន្ថយការពឹងផ្អែកសេដ្ឋកិច្ចរបស់ខ្លួន ទៅលើអាមេរិក ឲ្យមកនៅចំណុចសូន្យ នោះបើសិនអាមេរិកដាក់ទណ្ឌកម្មសេដ្ឋកិច្ចមកលើរុស្ស៊ី។
ជំហរនេះត្រូវបានកែប្រែមកវិញ ដោយក្រេមឡាំងបញ្ជាក់ថា នោះគ្រាន់តែគំនិតមតិផ្ទាល់ខ្លួនរបស់ទីប្រឹក្សាខាងលើ ប៉ុន្តែ វាមិនបានស្តែងពីជំហរពិតប្រាកដរបស់រុស្ស៊ីទេ។ លោកប្រធានាធិបតីពូទីន ដែលបានចេញមុខថ្លែងការណ៍នៅថ្ងៃនេះ ជាលើកទីមួយទៅលើវិបត្តិអ៊ុយក្រែនបាននិយាយថា ការដាក់ទណ្ឌកម្មសេដ្ឋកិច្ចមកលើរុស្ស៊ីគឺជាសកម្មភាពបន្ទុចបង្អាក់ ប្រឆាំងនឹងការរីកចម្រើន។ ប្រមុខរដ្ឋរុស្ស៊ីបញ្ជាក់ដែរថា គាត់នឹងនៅតែរៀបចំកិច្ចប្រជុំG៨ដដែលនៅទីក្រុងសុតឈី។ ហើយបើមេដឹកនាំផ្សេងៗមិនមកចូលរួម គឺស្រេចតែចិត្តរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ