មេដឹកនាំពិភពលោក និងអង្គការសហប្រជាជាតិចូលរួមកិច្ចប្រជុំ ស្តីពីកង្វះអាហារូបត្ថម្ភ នៅក្រុងរ៉ូម
មេដឹកនាំនយោបាយមកពីជុំវិញពិភពលោកបានប្រមូលផ្តុំគ្នានៅក្នុងទីក្រុងរ៉ូម ប្រទេសអ៊ីតាលី នៅថ្ងៃពុធនេះ ដើម្បីចូលរួមសន្និសីទអង្គការសហប្រជាជាតិ ស្តីពីកខ្វះអាហាររូបត្ថម្ភ សម្រាប់រយៈពេលបីថ្ងៃ ដែលត្រូវបានធ្វើឡើងដើម្បីទប់ស្កាត់ជំងឺរាតត្បាតជាសកល ហើយដែលអាចនឹងកើតមានទៅលើទាំងអ្នកក្រនិងអ្នកមានបានដូចគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
តំណាងមកពីបណ្តាប្រទេសចំនួន១៩០ នៅទូទាំងពិភពលោក នឹងត្រូវចូលរួមក្នុងសន្និសីទអន្តរជាតិស្តីពីអាហារូបត្ថម្ភលើកទី២ ដែលរៀបចំដោយទីភ្នាក់ងារអាហារអង្គការសហប្រជាជាតិ ហៅកាត់ថា (FAO) និងអង្គការសុខភាពពិភពលោក (WHO) ហើយក៏មានការចូលរួមពីមេដឹកនាំសាសនាកាតូលីក សម្តេចសង្ឃ ប៉ាប ហ្វ្រង់ស័រផងដែរ។
លោកស្រី Leslie Amoroso អ្នកជំនាញអាហារូបត្ថម្ភរបស់អង្គការ FAO បានប្រាប់អ្នកសារព័ត៌មានមុនកិច្ចប្រជុំ ដែលមានការចូលរួមពីរដ្ឋមន្ត្រីសុខាភិបាលនិងកសិកម្មជាង១០០នាក់នោះថា យើងកំពុងតែសិក្សារាល់កម្រិតនៃជំងឺខ្វះអាហារូបត្ថម្ភនេះនៅទូទាំងពិភពលោក។
លោកស្រីបានបន្តថា មនុស្សដែលកើតជំងឺខ្វះអាហារូបត្ថម្ភ គឺមានកម្រិតខ្ពស់ណាស់។ មនុស្សចំនួន ៨០៥លាននាក់ កើតមានជំងឺស្គមស្គាំង ខ្វះជីវជាតិ ហើយកុមារចំនួន ១៦១លាននាក់ មានការលូតលាស់យឺត។ កត្តានេះ ទាមទារឲ្យមានការសហការគ្នាពីគ្រប់ផ្នែកទាំងអស់។
ទន្ទឹមនឹងបញ្ហានេះ មានការវិឌ្ឍន៍ជាច្រើន នៅក្នុងរយៈពេលពីរទសវត្សចុងក្រោយនេះ ដោយចំនួនអ្នកជំងឺស្គមស្គាំងនិងខ្វះជីវជាតិ គឺមានការធ្លាក់ចុះ ពី១ពាន់លាននាក់ នៅក្នុងឆ្នាំ ១៩៩២ នៅពេលដែលសន្និសីទអន្តរជាតិអាហារូបត្ថម្ភលើកទី១ ត្រូវបានធ្វើឡើង ហើយនៅឆ្នាំ ២០១៤នេះ មានចំនួន ៨០៥លាននាក់។
ប៉ុន្តែជំងឺកខ្វះអាហារូបត្ថម្ភមិនមែនត្រឹមតែជាភាពអត់ឃ្លាននោះទេ។ មនុស្ស២ពាន់លាននាក់ បានទទួលរងនូវការខ្វះសារធាតុចិញ្ចឹមដែលមានដូចជា វិតាមីន A សារធាតុដែក និងស័ង្កសីជាដើម នៅខណៈដែលកុមារ ហើយនិងមនុស្សពេញវ័យ ៥០០លាននាក់ កើតជំងឺធាត់ ឬក៏ដុះពោះ។
តំណាងចូលរួមទាំងអស់និងអនុវត្តតាមសេចក្តីថ្លែងការណ៍ស្តីពីអាហារូបត្ថម្ភក្រុងរ៉ូម និងគម្រោងដើម្បីចាត់វិធានការទៅលើបញ្ហានេះ ដែលអង្គការ FAO បាននិយាយថា គម្រោងនេះគឺផ្នែកទៅលើការឯកភាពពីរដ្ឋាភិបាលជាតិចំនួន ជាង ២០០ បន្ទាប់ពីប្រឹក្សាជាមួយនិងអង្គការសង្គមស៊ីវិល និងវិស័យឯកជនរួចមក។
នៅក្នុងសេចក្តីថ្លែងការណ៍នោះសង្គត់ធ្ងន់ថា អាហារគួរមិនត្រូវបានប្រើជាឧបករណ៍ដើម្បីដាក់គំនាបនយោបាយ និងសេដ្ឋកិច្ចនោះទេ។ ជាងនេះទៅទៀតកិច្ចប្រជុំនេះ ក៏បានជម្រុញឲ្យរដ្ឋាភិបាលទាំងអស់ ធានាឲ្យបាននូវការប្រើប្រាស់ទឹកស្អាត និងការពារកុមារពីជំងឺឆ្លងផ្សេងៗ ដូចជាជំងឺរាគ គ្រុនចាញ់ និងជំងឺដង្កូវក្នុងពោះវៀន ដែលមានដូចជាព្រូន អៀន និងតេនញ៉ាជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ