ក្រោយវិបត្តិចំណាប់ខ្មាំងនិងភេរវកម្ម បារាំងពង្រឹងសន្តិសុខកាន់តែខ្លាំង
តាំងពីព្រហាមថ្ងៃសៅរ៍មក បើទោះបីជាភេរវជនត្រូវបានសម្លាប់ វិបត្តិចំណាប់ខ្មាំងបានចប់ក្តី ក៏វិមានប្រធានាធិបតីនៅបន្តពុះកញ្ជ្រោលដដែល ព្រោះការគំរាមកំហែងភេរវកម្ម នៅតែខ្ពស់ជានិច្ច។ ម្យ៉ាងទៀត នៅថ្ងៃអាទិត្យនេះ មានការជួបជុំដ៏មហាធំមួយនឹងត្រូវរៀបចំឡើងនៅទីក្រុងប៉ារីស ដើម្បីឧទ្ទិសដល់វិញ្ញាណក្ខន្ធជនរងគ្រោះ១៧នាក់ បាត់បង់ជីវិតដោយស្នាដៃពួកជីហាត។ ជាព្រឹត្តិការណ៍ដែលមានទំហំធំ មានពលរដ្ឋចូលរួមអាចដល់លាននាក់ និងមានមេដឹកនាំបរទេសជាច្រើនរូបមកអមដំណើរប្រធានាធិបតីបារាំង។ សូមបញ្ជាក់ថា បាតុកម្មសម្តែងការសាមគ្គី និងដើម្បីការពារលទ្ធិប្រជាធិបតេយ្យតែងប្រព្រឹត្តទៅជារៀងរាល់ថ្ងៃ តាំងពីមានហេតុការណ៍ភេរវកម្មប្រឆាំងកាសែត Charlie Hebdo មក។ ហើយនៅថ្ងៃសៅរ៍នេះ បើតាមក្រសួងមហាផ្ទៃមានពលរដ្ឋបារាំងប្រមាណជាង ៧០០០០០នាក់ បាននាំគ្នាធ្វើបាតុកម្ម នៅពាសពេញផ្ទៃប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ជំនួបប្រជុំដោះស្រាយវិបត្តិ ដឹកនាំដោយលោកហ្វ្រង់ស័រ ហូឡង់ នៅព្រឹកថ្ងៃសៅរ៍នេះ ឧទ្ទិសមួយភាគធំដល់ការចាត់វិធានការការពារសន្តិសុខប្រទេស និងពិសេសសន្តិសុខពេលធ្វើដើរដង្ហែក្បួន បាតុកម្មសាធារណរដ្ឋ នៅរសៀលថ្ងៃអាទិត្យ ដែលធានាថាចំនួនអ្នកចូលរួមមានច្រើនរាប់រយពាន់នាក់ នៅទីលានសាធារណរដ្ឋ ក្រុងប៉ារីស។ ពេញមួយថ្ងៃ ការប្រជុំមានបន្តឥតដាច់នៅវិមានប្រធានាធិបតីបារាំង ដើម្បីរៀបចំប្រតិបត្តិការដ៏ធំឱ្យសក្តិសម មិនថាលើផ្នែកសន្តិសុខ ឬការធ្វើគារវកិច្ចមេដឹកនាំបរទេសជាច្រើនរូបនោះឡើយ។
ជាជំនួយដល់ក្រុមប៉ូលិស ទាហាន៥០០នាក់ ត្រូវបានដាក់ពង្រាយបន្ថែម ជាបណ្តើរៗ តាំងពីថ្ងៃសៅរ៍នេះ នៅក្នុងរដ្ឋធានី តំបន់ជុំវិញក្រុង ដើម្បីបង្គប់ឱ្យឡើងដល់ ១៣៥០នាក់ នៅថ្ងៃអាទិត្យ ក្នុងក្របខ័ណ្ឌផែនការការពារប្រឆាំងនឹងភេរវកម្ម ដែលអាជ្ញាធរបានដំឡើងដល់កំរិតប្រយ័ត្នខ្ពស់បំផុត តាំងពីថ្ងៃទី ៧ មករា ថ្ងៃដែលភេរវជនពីរនាក់បងប្អូនចូលបាញ់សម្លាប់អ្នកកាសែតនិងប៉ូលិសនៅទីស្នាក់ការទស្សនាវដ្តី Charlie-Hebdoមក។
កាលពីល្ងាចថ្ងៃក្រោយពេល ចប់ប្រតិបត្តិការប្រមាញ់ភេរវជនទាំងបីបានភ្លាម លោកហ្វ្រង់ស័រហូឡង់ បានអំពាវនាវដោយផ្ទាល់មាត់លោក ឱ្យពលរដ្ឋបារាំង ទាំងស្រីទាំងប្រុស នាំគ្នាងើបឡើងនៅថ្ងៃអាទិត្យនេះ ការពារតម្លៃលទ្ធិប្រជាធិបតេយ្យ សេរីភាព និងពហុនិយម។
ចំនួនថ្នាក់ដឹកនាំបរទេសចូលរួមក្នុងបាតុកម្ម អាចនឹងកើនឡើង ពីមួយម៉ោងទៅម៉ោង ប៉ុន្តែលោកប្រធានាធិបតីបារាំង និងភ្ញៀវជាន់ខ្ពស់ អាចនឹងត្រូវដើរដង្ហែក្បួនក្នុងដែនការពារពិសេសផង នេះបើតាមប្រភពព័ត៌មានស្និទ្ធនឹងប្រមុខរដ្ឋ។ សូមបញ្ជាក់ថា គិតចាប់តាំងពីឆ្នាំ១៩៤៥មក មានប្រធានាធិបតីបារាំងតែម្នាក់គត់ មុនលោកហ្វ្រង់ស័រហូឡង់ ដែលបានចុះថ្នល់ធ្វើបាតុកម្មជាមួយពលរដ្ឋ គឺលោកហ្វ្រង់ស័រ មីតេរ៉ង់ កាលពីថ្ងៃទី ១៤ឧសភា ឆ្នាំ ១៩៩០ ដើម្បីប្រឆាំងនឹងការប្រកាន់ពូជសាសន៍ និងការរើសអើងប្រឆាំងនឹងជនជាតិជ្វីហ្វ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ