អាល់កៃដានៅ យេម៉ែនប្រកាសថា ខ្លួនជាអ្នកបញ្ជាឲ្យមានភេរវកម្មប្រឆាំងCharlie Hebdo
នៅក្នុងសារវីដេអូដែលបង្ហោះផ្សាយតាមអ៊ីនធ័រនែត កាលពីថ្ងៃពុធ ម្សិលមិញ ក្រុមអាល់កៃដា នៅយេម៉ែនបានប្រកាស ខ្លួនជាអ្នករៀបចំ និងបញ្ជាឲ្យមានភេរវកម្មវាយប្រហារទៅលើទស្សនាវដ្តី Charlie Hebdo។ ការចេញមុខទទួលខុសត្រូវលើភេរវកម្មជាផ្លូវការ របស់អាល់កៃដា នៅយេម៉ែន ធ្វើឡើង នៅមួយសប្តាហ៍ក្រោយ អំពើភេរវកម្ម បាញ់សម្លាប់អ្នកកាសែត និងអ្នកគូររូបត្លុកកំប្លែងរបស់ Charlie Hebdo នៅកណ្តាលក្រុងប៉ារីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
ការចេញមុខទទួលខុសត្រូវក្រុមអាល់កៃដា នៅយេម៉ែនថា ខ្លួនជាអ្នកបញ្ជាឲ្យវាយប្រហារទៅលើទស្សនាវដ្តី Charlie Hebdo បានបញ្ជាក់កាន់តែច្បាស់ ការសន្និដ្ឋានរបស់អាជ្ញាធរបារាំង។ នៅក្នុងពេលដែលការស៊ើបអង្កេតកំពុងដំណើរការ រដ្ឋអាជ្ញាបារាំងបានកំណត់រួចហើយថា ភេរវជនបាញ់សម្លាប់អ្នកកាសែតបារាំង កាលពីថ្ងៃពុធសប្តាហ៍មុន គឺបងប្អូនគួរស្ហ៊ីនោះ មានជាប់ទាក់ទងនឹងក្រុមAqpa ក្រុមអាល់កៃដា នៅយេម៉ែន ដែលជាបណ្តាញមួយរបស់អាល់កៃដា ប្រចាំឧបទ្វីបអារ៉ាប់។
កាលពីថ្ងៃពុធ វិទ្យុបារំាងអន្តរជាតិ RFI បានទទួលសារវីដេអូមួយរបស់ក្រុមអាល់កៃដា ជាភាសាអារ៉ាប់ ប៉ុន្តែ មានចំណងជើងជាភាសាអង់គ្លេស។ នៅក្នុងសារវីដេអូ រយៈពេល ១០នាទី ដែលមានដាក់រូបភាពវាយប្រហាររបស់ភេរវជនទៅលើទីស្នាក់ការរបស់Charlie Hebdo ផងនោះ Nasser Ben Ali al-Anassi មេដឹកនាំជាន់ខ្ពស់ម្នាក់របស់ក្រុមអាល់កៃដា ប្រចាំឧបទ្វីបអារ៉ាប់ បានអះអាងថា វីរជនត្រូវបានគេរើសបញ្ចូល និងបានធ្វើសកម្មភាព ទៅតាមផែនការ យ៉ាងជោគជ័យ។ វីរជនដែលអ្នកទទួលខុសត្រូវជាន់ខ្ពស់អាល់កៃដានៅយេម៉ែន ចង់សំដៅនោះ គឺបងប្អូនគួរស្ហ៊ី ដែលធ្វើភេរវកម្មបាញ់សម្លាប់ប៉ូលិស និងអ្នកកាសែតរបស់Charlie Hebdo កាលពីថ្ងៃពុធ ទី ៧មករា។
នៅក្នុងសារវីដេអូ អ្នកទទួលខុសត្រូវរបស់Aqpaបានសង្កត់ធ្ងន់ដែរថា ការដាក់ទិសដៅ រៀបចំគម្រោង រួមទាំងការផ្តល់ហិរញ្ញវត្ថុ សុទ្ធតែធ្វើឡើង ថ្នាក់ដឹកនាំអាល់កៃដា ចំណែកគម្រោងភេរវកម្មវាយប្រហារCharlie Hebdo ដើម្បីចង់សងសឹកឲ្យព្យាការីមូហាមេដ ត្រូវបានធ្វើឡើង បន្ទាប់ពីមានបញ្ជាររបស់មេធំ អាល់កៃដា Ayman al-Zawahiri ដែលអំពាវនាវឲ្យក្រុមអ៊ីស្លាមវាយប្រហារទៅលើអឺរ៉ុប តាមគ្រប់មធ្យោបាយទាំងអស់។ ក្រៅតែពី និយាយសើចចំអក ទៅលើក្រុមមេដឹកនាំពិភពលោកដែលបានចូលរួមដើរក្បួន កាលពីថ្ងៃអាទិត្យ ក្នុងទីក្រុងប៉ារីស មេឃោសនារបស់Aqpaបានកោតសរសើរស្នាដៃរបស់ភេរវជនគូលីបាលី ដែលបានសម្លាប់ជនជាតិជ្វីហ្វនៅPorte de Vincennes និងថា សកម្មភាពរបស់គូលីបាលីគ្មានជាប់ទាក់ទងនឹងគម្រោងការរបស់ក្រុមអាល់កៃដាទេ ប៉ុន្តែ គ្រាន់តែវាកើតឡើង នៅចំជួនគ្នាតែប៉ុណ្ណោះ។
តាមមន្រ្តីស៊ើបការណ៍សម្ងាត់យេម៉ែន នៅឆ្នាំ ២០១១ បងប្អូនគួរស្ហ៊ីទាំង២នាក់ បានចូលក្នុងទឹកដីយេម៉ែន តាមរយៈទឹកដីអូម៉ង់ និងបានទទួលការបណ្តុះបណ្តាល ពីក្រុមអាល់កៃដា ឲ្យចេះបាញ់កាំភ្លើង នៅវាលខ្សាច់Maribដែលជាទីតាំង សម្បុករបស់អាល់កៃដា។ នៅមុនត្រូវប៉ូលិសបារាំងបាញ់សម្លាប់ កាលពីថ្ងៃសុក្រ បងប្អូនគួរស្ហ៊ី បាននិយាយប្រាប់ទូរទស្សន៍បារំាង ថា ខ្លួនគេបានទទួលលុយពីមេអាល់កៃដា ម្នាក់ គឺAnouar Al Aoulaki ដែលក្រោយមក ត្រូវយន្តហោះដ្រូនអាមេរិកបាញ់សម្លាប់ នៅឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ