តើប៉ារីសជារដ្ឋធានីដែលមានបរិយាកាសពុលខ្លាំងជាងគេមួយនៅលើពិភពលោកឬ ?
នៅថ្ងៃសៅរ៍នេះ រដ្ឋាភិបាល និងអាជ្ញាធរក្រុងប៉ារីសបានសម្រេចចាត់វិធានការ មិនយកថ្លៃការធ្វើដំណើរតាមមធ្យោបាយសាធារណៈ និងតម្រូវឱ្យរថយន្តឯកជនបើកបរឆ្លាស់គ្នា មួយថ្ងៃលេខសេស មួយថ្ងៃលេខគូ នៅក្នុងនិងតំបន់ជុំវិញរដ្ឋធានី នៅថ្ងៃចន្ទស្អែកនេះ ដើម្បីកាត់បន្ថយការបញ្ចេញផ្សេងពុល។ សារធាតុឆ្មារៗបំផុតក្នុងខ្យល់ បានឡើងហួសកំរិតកំណត់ដោយអង្គការសុខភាពពិភពលោក។ ប៉ុន្តែទោះយ៉ាងដូច្នេះក្តីក៏ប៉ារីសនៅតែមិនត្រូវបានចាត់ទុកជាក្រុងដែលមានផ្សែងពុលខ្លាំងគេនៅលើពិភពលោកឡើយ។ ហេតុអ្វី ?
ចុះផ្សាយនៅថ្ងៃ៖
ស្តាប់ - ០៦:០០
ដោយប្រឈមនឹងកំរិតសារធាតុពុលខ្លាំងក្នុងបរិយាកាស នៅថ្ងៃចន្ទទី ២៣ មីនា ស្អែកនេះ អាជ្ញាធរបារាំងបានចាត់វិធានការមួយចំនួន ដូចជាមិនយកថ្លៃមធ្យោបាយដឹកជញ្ជូនសាធារណៈ រថយន្តក្រុង រទេះភ្លើងក្រោមដី លើដី ។ល។និង។ល។ និងបានតម្រូវឱ្យមានការបើកបររថយន្តឆ្លាស់គ្នា ពោលគឺឡានពាក់ផ្លាកលេខគូ បើកថ្ងៃគូ បើជាថ្ងៃសេស គឺមានតែរថយន្តពាក់ផ្លាកលេខសេសទេ ដែលអាចបើកបរបាន។ ប៉ុន្តែរថយន្តដែលប្រើថាមពលមិនចេះរីងស្ងួត ប្រើភ្លើង ប្រើអាគុយ ឬតាក់ស៊ី ឬរថយន្តនោះត្រូវមានអ្នកជិះជាមួយបីនាក់។
វិធានការបន្ថយចំនួនរថយន្ត ធ្លាប់បានយកមកអនុវត្តពីរដងហើយ ម្តងនៅឆ្នាំ១៩៩៧ និង២០១៤។ ប្រសិទ្ធិភាពក៏បានឃើញជាក់ស្តែងដែរ មិនបង្កឱ្យភាពរញ៉េរញ៉ៃហើយ អាចកាត់បន្ថយការបំពុលបរិយាកាសទៀត។ បើតាមក្រុមជំនាញ គ្រាន់តែចរាចរណ៍ថយ១៨% បរិមាណសារធាតុពុលជាសារធាតុល្អិតឆ្មារៗ បានថយចុះ៦%។
៤២០០០នាក់ស្លាប់មុនអាយុ
សហគមន៍អ្នកវិទ្យាសាស្ត្រ គ្មានការសង្ស័យសោះឡើយ អំពីផលប៉ះពាល់របស់ផ្សែងពុលក្នុងបរិយាកាស ចំពោះសុខភាព។ នៅលើពិភពលោកយើងនេះ មានពលរដ្ឋអ្នកក្រុង៩នាក់ ក្នុងចំណោម១០នាក់ រងគ្រោះស្រូបខ្យល់ពុលចូលក្នុងខ្លួន។ បរិយាកាសពុល គឺជាភ្នាក់ងារដែលអាចបង្កឱ្យមានជំងឺមហារីក ដូចជាមហារីកសួត ផ្លោកនោម ជំងឺផ្លូវដង្ហើម និងសរសៃឈាមបេះដូង។ នៅប្រទេសបារាំង ផ្សែងពុលក្នុងបរិយាកាស បានបង្កឱ្យមានមនុស្សស្លាប់មុនអាយុ ប្រមាណ៤២០០០នាក់ ក្នុងមួយឆ្នាំៗ និងបំផ្លាញលុយសម្រាប់យកទៅព្យាបាលជំងឺមានជាប់ពាក់ព័ន្ធនឹងខ្យល់បរិយាកាសពុលអស់ប្រមាណពី ៨២៥ លានទៅ ១៧០០លានក្នុងមួយឆ្នាំៗ។ នេះមិនរាប់អំពីផ្សែងពុលដែលមានជាប់ជាប្រចាំរាល់ ក្នុងកំរិតទាប ចំពោះសុខភាពពលរដ្ឋផង។
ប៉ារីសជារដ្ឋធានីពុលជាងគេ ?
ប៉ារីសមិនមែនជាក្រុងពុលខ្លាំងជាងគេមួយនៅលើពិភពលោកទេ ! ថ្វីបើនៅរវាងពីរបីថ្ងៃនេះ កំរិតសារធាតុពុលឆ្មារ បានឡើងដល់កំរិតខ្ពស់ហួសការកំណត់របស់អង្គការសុខភាពពិភពលោក និងលើសក្រុងធំៗរបស់ចិនមួយចំនួន ក៏ដោយ។ ជាមធ្យមបណ្តុំសារធាតុពុលឆ្មារៗ PM ១០បានឡើងលើស ៨០µg/m3 ខ្លះឡើងដល់១២០មីក្រូក្រាមក្នុងមួយម៉ែត្រគូបខ្យល់ ប៉ុន្តែគេអាចប្រៀបធៀបជាមួយនឹងបរិមាណពុលក្នុងបរិយាកាសក្នុងក្រុងផ្សេងៗនៅអាស៊ីបានឡើយ។
កាលពីខែឧសភា ២០១៤ អង្គការសុខភាពពិភពលោក បានផ្សព្វផ្សាយទិន្និន័យស្តីពីមធ្យមភាគនៃគុណភាពខ្យល់បរិយាកាស ក្នុងក្រុងចំនួន ១៦០០ របស់ប្រទេសចំនួន៩០។ អង្គការបានកំណត់បរិមាណបណ្តុំសារធាតុពុលជាធាតុល្អិតឆ្មារៗបំផុត មើលនឹងភ្នែកស្ទើរមិនឃើញ (PM10 =០,០១មីល្លីម៉ែត្រ) នៅក្នុងខ្យល់ ជាមធ្យមប្រចាំឆ្នាំ ត្រឹម២០មីក្រូក្រាមក្នុងមួយម៉ែត្រគូបខ្យល់ ទើបមិនបង្កផលប៉ះពាល់ដល់សុខភាព។ ហើយប៉ារីសមានត្រឹម២៤ មីក្រូក្រាមក្នុងមួយម៉ែត្រគូបខ្យល់ប៉ុណ្ណោះ តិចជាងក្រុងរបស់ប៉ាគីស្ថាន (៥៤០ មីក្រូក្រាមក្នុងមួយម៉ែត្រគូបខ្យល់) ឬឥណ្ឌា (៣២៩ មីក្រូក្រាមក្នុងមួយម៉ែត្រគូបខ្យល់)ឆ្ងាយណាស់។ ចំណែកចិនវិញ ដែលអាជ្ញាធរបានចាត់ទុកការប្រយុទ្ធប្រឆាំងនឹងផ្សែងពុលក្នុងបរិយាកាសជាអាទិភាពចំបងមួយនោះ មានបរិមាណធាតុពុល ក្នុងខ្យល់ ជាមធ្យមក្នុងមួយឆ្នាំ ពី ១០០ ទៅ ១៥០ មីក្រូក្រាមក្នុងមួយម៉ែត្រគូបខ្យល់ឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ