អង្គភាពទ័ពឆ័ត្រយោងអាមេរិក នឹងចាប់បង្ហាត់ពួកយោធាអ៊ុយក្រែន
គឺនៅថ្ងៃ២០មេសាខាងមុខ ដែលទ័ពឆ័ត្រយោងអាមេរិក ចំនួន២៩០នាក់ ត្រូវទៅ ដល់ខេត្ត Lvov ប៉ែកខាងលិចប្រទេសអ៊ុយក្រែន ដើម្បីចាប់ផ្តើមបង្ហាត់ពួកទាហាន នៃកងឆ្មាំអ៊ុយក្រែន ឲ្យចេះយ៉ាងល្អិតល្អន់វិជ្ជាប្រយុទ្ធលើសមរភូមិ។ ក្នុងដំណាក់ឥឡូវ វិជ្ជាបែបនេះ កំពុងផ្តល់ទៅហើយ ដល់ពួកទាហានទ័ពសកម្មអ៊ុយក្រែនដោយពួកនាយទាហានអង់គ្លេស។ ម៉ូស្គូ ចាត់ទុកការបង្វឹកបង្ហាត់បែបនេះ មិនជួយជំរុញឡើយ ដល់ការបន្ធូរបន្ថយភាពតានតឹង ក្នុងជម្លោះនៅតំបន់ខាងកើតអ៊ុយក្រែន។
ចុះផ្សាយនៅថ្ងៃ៖
ពត៌មានបង្ហោះតាម Facebook ដោយលោករដ្ឋមន្ត្រីមហាផ្ទៃអ៊ុយក្រែន Arsen Avakov រំលេចឲ្យដឹងថា ទ័ពឆ័ត្រយោងអាមេរិក ចំនួន២៩០នាក់ ដែលថ្ងៃ២០មេសា នឹងទៅដល់ខេត្ត Lvov ជាខេត្តជាតិនិយម នៅប៉ែកខាងលិចអ៊ុយក្រែន ដើម្បីបង្ហាត់ពួកយោធាអ៊ុយក្រែន នៅលើដែនដីនៃវាលវង់ល្បងពិសោធ Yavorov គឺ ស្របនឹងកិច្ចព្រមព្រៀង ចុះកាលពី ខែកុម្ភៈជាមួយក្រសួងការបរទេសអាមេរិក។
នឹងចូលរួមក្នុងលំហាត់-សមជើងរួម ជាមួយទ័ពឆ័ត្រយោងអាមេរិក គឺ អង្គភាពដ៏ល្បីៗនៃកងឆ្មាំអ៊ុយក្រែន បែបយ៉ាងឈ្មោះ Azov Jaguar Omega មានបទពិសោធន៍ខាងច្បាំងដោយផ្ទាល់ដៃ នៅលើសមរភូមិ តំបន់ផ្តាច់ទឹកដីនិយមប៉ែកខាងកើតប្រទេស និងអង្គភាពកងឆ្មាំនេះ ទៅពីខេត្ត ណានៅប៉ែកខាងកើតដែរ ប៉ុន្តែស្ថិតនៅក្រោមអំណាចក្រុងគៀវ ទៅពីតំបន់ខាងត្បូង ខាងជើង និងខាងលិចប្រទេស និងពីរដ្ឋធានីគៀវតែម្តង។
អង្គភាពកងឆ្មាំនោះ មានគ្នា៩០០នាក់ ចែកជា៣ចរន្ត ចរន្តនិមួយៗមានគ្នា៣០០នាក់ ហើយការបង្ហាត់ចរន្តនិមួយៗ នឹងស៊ីពេល៨សប្តាហ៍។ ជាសរុប ទ័ពឆ័ត្រយោងអាមេរិក នឹងវត្តមាននៅវាលវង់បង្ហាត់នោះក្នុងរយៈពេលប្រមាណកន្លះឆ្នាំ។ លុះក្រោយពីការបង្វឹកបង្ហាត់ ចប់ទៅ រាល់តែបរិក្ខារជាស្បៀងនិងមធ្យោបាយទូរគមនាគមន៍ នឹងត្រូវទ័ពឆ័ត្រយោងអាមេរិក បន្សល់ទុកឲ្យកងឆ្មាំអ៊ុយក្រែន។
តាមពិត ការបង្វឹកបង្ហាត់នេះ ត្រូវចាប់ផ្តើមតាំងពីខែមីនានេះម៉្លេះ ប៉ុន្តែថ្នាក់ដឹកនាំនៃកងទ័ព ជើងគោកអាមេរិកដែលប្រចាំនៅទ្វីបអឺរ៉ុបផ្អាកទៅវិញ ដោយចង់ឃើញ ដំណើរបំពេញតាមកិច្ចព្រមព្រៀងក្រុងមិនស្ក៏។
ក្រុងម៉ូស្គូ ពីចំណែកខ្លួនកត់សម្គាល់ថា ក្រុងគៀវ បច្ចុប្បន្ន ងាកចេញពីការបំពេញតាមកិច្ចព្រមព្រៀងនេះ ដោយមិនព្រមធ្វើវិមជ្ឈការអំណាចទៅតំបន់បះបោរដូចដែលមានចែង ក្នុងឯកសារនោះ ហើយមិនតែប៉ុណ្ណោះ ចាត់ទុកខេត្តបះបោរដូណេត និង លូហ្កាន់ ថាគ្រាន់តែ ដែនដីនៅក្រោមការកាន់កាប់បណ្តោះអាសន្ន ប៉ុណ្ណោះ ដែលកាលណាកងទ័ពអ៊ុយក្រែន មានកម្លាំងគ្រប់គ្រាន់ គឺនឹងសង្គ្រប់ទៅរំដោះខេត្តទាំងពីរនោះ ឲ្យទាល់តែបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ