ប៉ូឡូញ ជ្រើសយកមីស៊ីលអាមេរិក សម្រាប់ប្រឈមនឹងមីស៊ីលរុស្ស៊ី
ស.រ.អា. ថ្ងៃអង្គារ២១មេសា បានសាទរ ចំពោះគម្រោងប៉ូឡូញ ទិញ ប្រព័ន្ធមីស៊ីល អាមេរិកាំងធុន Patriot សម្រាប់ការពារដែនអាកាស ក្នុងតម្លៃដល់ ៥.០០០លានដុល្លារ ខណៈដែលនាប៉ុន្មានខែចុងក្រោយ ភាពតានតឹងរវាងប៉ូឡូញ នឹងរុស្ស៊ីនៅជិតខាង ចេះតែឡើងកម្រិតធ្ងន់ធ្ងរទៅ។ មជ្ឈដ្ឋាននៅម៉ូស្គូ កត់សម្គាល់ថា ជម្រើសនេះរបស់ប៉ូឡូញ គឺសម្រាប់ទប់នឹងប្រព័ន្ធមីស៊ីលរុស្ស៊ីធុន Iskander ដែលមានដាក់ឲ្យប្រចាំការទៅហើយ នៅលើដែនដីខេត្ត Kaliningrad ប៉ែកខាងលិចបង្អស់របស់រុស្ស៊ី នៅជាប់នឹងព្រំដែនប៉ូឡូញ។
ចុះផ្សាយនៅថ្ងៃ៖
ស្តាប់ - ០២:០១
ការសាទរនេះ ថ្លែងដោយ អ្នកនាំពាក្យផ្លូវការរបស់ក្រសួងការបរទេសអាមេរិក លោកស្រី Marie Harf ដែលគូសបញ្ជាក់ថា ប៉ូឡូញ ជាសសរទ្រូងនៅក្នុងបក្សអូតង់ ហើយការធ្វើទំនើបកម្ម ដល់ប្រព័ន្ធការពាររបស់ប្រទេសនេះ ពិតជាពង្រឹងសក្តានុពលយោធា របស់បក្សសម្ព័ន្ធនេះតែម្តង។
គឺនៅចំពេលដែលភាពតានតឹងរបស់ប្រទេសគាត់ ជាមួយនឹងរុស្ស៊ីនៅជិតខាង កើនកាន់តែខ្លាំងឡើង លោកប្រធានាធិបតីប៉ូឡូញ Bronislaw Komorowski បានប្រកាសថា ក្នុងខែឧសភា ខាងមុខ ក្រុង Varsovie នឹងធ្វើកិច្ចចរចា ជាមួយក្រុង Washington ដើម្បីទិញមីស៊ីល Patriot អាធុនបាញ់ពីដីទៅអាកាសចំនួន៨កង ក្នុងតម្លៃសរុប ៥.០០០លានដុល្លារ។
ពិធីចុះកុងត្រាផ្ទាល់ គ្រោងប្រព្រឹត្តទៅ ក្នុងឆ្នាំ២០១៦។ បន្ទាប់មក ក្នុង៣ឆ្នាំដំបូង ប៉ូឡូញនឹងទទួលបានមីស៊ីល Patriot នោះចំនួន ២កងសិន។ ហើយទៅទល់ឆ្នាំ២០២៥ គឺនឹងទទួលបាន ទាំង ៨កង។ ចំណែក Radar ខាងរាវរកទីដៅសម្រាប់ផ្ចាញ់ក្នុងអាកាស ដោយប្រព័ន្ធនេះ នឹងលេចចេញមក នៅលើដែនដីប៉ូឡូញ គឺក្នុងចន្លោះឆ្នាំ ២០២២-២០២៥។
ប៉ូឡូញ ជ្រើសយក មីស៊ីល Patriot ដែលផលិតដោយ ក្រុមហ៊ុនអាមេរិកាំង Raytheon ទាំង នាំឲ្យក្រុមហ៊ុនបារាំង Thales និង សហគមអឺរ៉ុប SAAM ដែលខំចូលខ្លួនប្រជែងដែរ បែរទៅជា ខកចិត្តទៅវិញ។
ក្រសួងការពារជាតិប៉ូឡូញ គូសបញ្ជាក់ថា ពេលធ្វើជម្រើសនោះ រដ្ឋប៉ូឡូញ ចាត់ទុកជាលក្ខណៈវិនិច្ឆ័យដ៏សំខាន់បំផុត គឺសមត្ថភាពនៃប្រព័ន្ធមីស៊ីល Patriot អាចប្រឈមនឹងប្រព័ន្ធមីស៊ីលរុស្ស៊ីធុន Iskander ដែលមានដាក់ឲ្យប្រចាំការទៅហើយ នៅលើដែនដីខេត្ត Kaliningrad ប៉ែកខាងលិចបង្អស់របស់រុស្ស៊ី នៅជាប់នឹងព្រំដែនប៉ូឡូញ។
អំពីមីស៊ីល Iskander ក្រសួងការពារជាតិរុស្ស៊ី ធ្លាប់បានថ្លែងឲ្យដឹងថា វង់សកម្មរបស់វា គឺអាចកំទេចទីដៅក្នុងអាកាស ដល់ចម្ងាយ ៥០០គ.ម. ដោយវាអាចគ្របដណ្តប់ដែនដី ប៉ូឡូញសឹងទាំងមូល ពីកើតទៅលិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ