អឺរ៉ុប-អន្តោប្រវេសន៍ ៖ ពីមេខ្សល់ទៅជាបណ្តាញជួញដូរមនុស្សដ៏ខ្លាំងក្លា
ចុះផ្សាយនៅថ្ងៃ៖
ស្តាប់ - ០៤:០៨
ប្រាក់ចំណេញច្រើន ហានិភ័យកាន់តែមានកំរិត តម្រូវការរីកដូចផ្កា ... របបរកស៊ីដឹកជញ្ជូនជនភៀសខ្លួនពីអាហ្វ្រិកទៅអឺរ៉ុប ឆ្លងកាត់សមុទ្ទមេឌីទែរ៉ាណេ កំពុងទាក់ចិត្តក្រុមរកស៊ីជួញដូរខុសច្បាប់ធំៗ ម៉ាហ្វីយ៉ាមានអំណាច ព្រមទាំងក្រុមដែលមានរចនាសម្ព័ន្ធច្បាស់លាស់។ នេះបើអ្នកឯកទេស និងអ្នកទទួលខុសត្រូវភ្នាក់ងារប្រឆាំងនឹងគ្រឿងញៀននិងឧក្រិដ្ឋកម្មរបស់អង្គការសហប្រជាជាតិ ដែលទើបចេញផ្សាយរបាយការណ៍មួយស្តីអំពីជំនួញជនភៀសខ្លួន។
អន្តោប្រវេសន៍ខុសច្បាប់ជាបញ្ហាដែលរីកធំធាត់ ជាលំដាប់ និងធ្វើឱ្យប្រទេសលោកខាងលិច ឈឺក្បាលគ្រប់គ្នា។ ប្រថុយស្លាប់ អន្តោប្រវេសន៍រាប់រយ រាប់ពាន់នាក់បាននាំគ្នាឆ្លងសមុទ្ទមេឌីទែរ៉ាណេសំដៅអឺរ៉ុប បើទោះបីជាដឹងថាពេលមកដល់ពួកគេនឹងក្លាយទៅជាជនអនាថា ខុសច្បាប់យ៉ាងណាក៏ដោយ។ ចេតនាដ៏មុះមុតចង់គេចខ្លួនមកជ្រកកោននៅអឺរ៉ុប បានធ្វើឱ្យការដឹកជញ្ជូនអន្តោប្រវេសន៍បានក្លាយជារបររកស៊ីមួយ ដែលមិនត្រឹមតែទាញកម្រៃបានពីថ្លៃធ្វើដំណើរទេ តែពេលទៅដល់ទិសដៅហើយឈ្មួញអាចបន្តជញ្ជាក់ឈាមទាមប្រាក់បានទៀត។
ប្រាក់ចំណូលប្រចាំឆ្នាំ នៃជំនួញប្រភេទនេះ មានទំហំប្រមាណជាង ៧ពាន់លានដុល្លារ ! តើឈ្មួញណាមិនចាប់អារម្មណ៍ ?! ទីផ្សារដឹកជញ្ជូនជនភៀសខ្លួនកំពុងទាក់ទាញក្រុមជួញដូរខុសច្បាប់អន្តរជាតិ និងកំពុងពង្វក់មេទ័ព មេក្រុម មេកើយថ្នាក់មូលដ្ឋាន ឱ្យក្លាយទៅជាឧក្រិដ្ឋជនជួញដូរមនុស្សឆ្លងព្រំដែន។ នេះបើតាម របាយការណ៍ឆ្នាំ២០១៤ របស់ភ្នាក់ងារទទួលបន្ទុកប្រឆាំងនឹងគ្រឿងញៀន និងឧក្រិដ្ឋកម្ម របស់អង្គការសហប្រជាជាតិ (ONUDC) ដែល បានអះអាងបន្ថែមទៀតថា ចរន្តរត់ពន្ធឆ្លងព្រំដែន ជាទូទៅតែតែងមានជាប់ពាក់ព័ន្ធនឹងផែនការឧក្រិដ្ឋកម្ម។ ហើយប្រសិនបើមានចរន្តនេះកាន់តែស្មុគស្មាញ ក្រុមឧក្រិដ្ឋកម្មធំៗ កាន់តែងាយស្រួលយកចំណេញ។
មកទល់នឹងឆ្នាំ២០១៣ ដំណើរភៀសខ្លួន ត្រូវធ្វើឡើងជាដំណាក់ៗ តាមរយៈមេខ្យល់ច្រើននាក់ ប្តូរបន្តគ្នាពីកន្លែងមួយទៅកន្លែងមួយ និងបង់ប្រាក់ដាច់ៗពីគ្នា ជាអ្នកនេសាទសម្រាប់ឆ្លងសមុទ្ទ ឬជាក្រុមអ្នកជួញដូរមនុស្សបែបគ្រួសារ ឬជាមេកុលសម្ព័ន្ធសម្រាប់ឆ្លងភូមិ ឆ្លងវាលខ្សាច់។ ប៉ុន្តែតាំងពីឆ្នាំ២០១៤មក មធ្យោបាយរត់ភៀសខ្លួន មានលក់ដូចទៅទិញកម្មវិធីដំណើរកំសាន្តវិស្សមកាលជាកញ្ចប់។ ជនចង់ធ្វើអន្តោប្រវេសន៍កាន់តែច្រើនឡើងៗបាននជ្រើសរើសទិញ គម្រោងរត់ភៀសខ្លួនតាមទូក គិតតាំងពីមាត់ទ្វារផ្ទះរហូតដល់ជាន់ទឹកដីប្រទេសជាទិសដៅចុងក្រោយតែម្តង។ ជាមួយនឹងលទ្ធផលអង្កេតនេះ គេអាចយល់បានថា ពិតជាមានប្រព័ន្ធរកស៊ីរត់ពន្ធជនភៀសខ្លួន ដែលមានបណ្តាញប្រទាក់គ្នា ខ្លាំងឬខ្សោយទៅ តាមកំរិតនិងស្ថានការណ៍ជាក់ស្តែង។
មានបណ្តាញ មានការរៀបចំ អង្គការរត់ពន្ធអន្តោប្រវេសន៍ខុសច្បាប់ បានធ្វើការឃោសនា ទាក់ទាញភ្ញៀវ យ៉ាងចំហ តាមប្រព័ន្ធសង្គមហ្វេសប៊ូកជាដើម។ល។ ពន្យល់យ៉ាងលម្អិតអំពីតម្លៃ កន្លែងនិងពេលវេលាចេញដំណើរ ប្រភេទទូក … អ្នកហ៊ានថ្លៃនឹងមានការធានាសុវត្ថិភាពច្រើន ដូចជាមានអាវពោង ជិះទូកនៅថ្នាក់លើ អ្នកហ៊ានថ្លៃទាបត្រូវអង្គុយក្នុងបាតទូក ឱ្យលិចបន្តិចនឹងត្រូវលង់ស្លាប់ភ្លាម។ បច្ចុប្បន្ននេះ ទីផ្សារអន្តោប្រវេសន៍កាន់តែគួរឱ្យចាប់អារម្មណ៍ ព្រោះក្រៅអំពីជនជាតិអាហ្វ្រិកស្បែកខ្មៅដែលបង្ខំចិត្តភៀសខ្លួនពីភាពក្រីក្រទុរ្ភិក្សក្នុងប្រទេស មានក្រុមអ្នករត់គេចពីសង្គ្រាមនៅតំបន់ដើមបូព៌ា មានជាអាទិ៍ជនជាតិស៊ីរី។ អ្នករត់គេចសង្គ្រាម សុទ្ធសឹងជាអ្នកមានជីវភាពមធ្យម ជាស្រទាប់គ្រួសារថ្នាក់កណ្តាល តែមានបានខ្លាំងបើប្រៀបទៅនឹងពួកអាហ្វ្រិក។ ហេតុដូច្នេះហើយទើប ក្រុមឈ្មួញអាចបង្កើនសកម្មភាពរកស៊ីដឹកជញ្ជូនបានយ៉ាងងាយ។
ប្រវត្តិនៃការរត់ភៀសខ្លួនឆ្លងសមុទ្ធមេឌីទែរ៉ាណា មិនមែនថ្មីថ្មោងទេ។ ចំណែកក្រុមឈ្មួញ ក៏មិនមែនជាមនុស្សថ្មីដែរ ប៉ុន្តែទម្រង់នៃការជួញដូរបានប្តូរផ្លាស់ ពីលក្ខណៈទោល ទៅជាប្រព័ន្ធ មានបណ្តាញពេញពិភពលោក ជាបណ្តាញម៉ាហ្វីយ៉ានិងបនឧក្រិដ្ឋកម្ម ប្រទាក់ក្រឡាគ្នា តាំងពីមេខ្យល់នៅតាមមូលដ្ឋានបែបឯកា ទៅជាមេខ្យល់ប្រកបដោយវិជ្ជាជីវៈ ខ្លះបញ្ចេញកម្មភាពបែបបូរាណ ខ្លះជាប្រតិបត្តិការប្រកបដោយឯកទេសខ្ពស់ ខ្លះដោយវិធីចាស់ផងថ្មីផងទន្ទឹមគ្នាតែម្តង។ ព្រោះបើតាមរបាយការណ៍ មានមិនខ្វះទេ ស្ត្រីដែលរត់ភៀសខ្លួនតាមប្រទេសលីប៊ី ក្រោយមកក្លាយជាពេស្យាតាមថ្នល់អឺរ៉ុប ដោយមានមេកើយម៉ាហ្វីយ៉ាតាំងទីនៅក្នុងក្រុងធំៗរបស់អឺរ៉ុប សម្រាប់បញ្ជានិងចាត់ចែង។
ភាពវឹកវរនយោបាយនៅលីប៊ី បានសម្រួលដល់ឈ្មួញជួញដូរមនុស្សគ្រប់ជាតិសាសន៍ ដល់មេខ្យល់ និងដល់ក្រុមប្រដាប់អាវុធ ឱ្យរកស៊ីរត់ពន្ធអន្តោប្រវេសន៍បានយ៉ាងពេញទំហឹង ដូចរោងចក្រឧស្សាហកម្ម។ ការប្រយុទ្ធប្រឆាំងនឹងបណ្តាញនេះ ត្រូវការពេលវេលាយូរ និងលំបាកខ្លាំង ព្រោះ ដរាបណាតម្រូវការរត់ភៀសខ្លួននៅតែមាន ក្រុមម៉ាហ្វីយ៉ានឹងនៅតែអាចរកស៊ីបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ