អឺរ៉ុបរៀបផែនការចេញធ្វើប្រតិបត្តិការជើងទឹកប្រឆាំងឈ្មួញអន្តោប្រវេសន៍
អាស៊ីនិងអឺរ៉ុប កំពុងឈឺក្បាលយ៉ាងខ្លាំងនឹងលំហូរអន្តោប្រវេសន៍តាមទូក។ ក្នុងខណៈដែលប្រទេសនៅក្នុងតំបន់អាស៊ីចាប់ផ្តើមពិគ្រោះគ្នា តាមផ្លូវការទូត ដោយមានជំនួបថ្នាក់រដ្ឋមន្ត្រីការបរទេសថៃនិងម៉ាឡេស៊ីនៅថ្ងៃនេះ សហភាពអឺរ៉ុបវិញ ហាក់ដូចជាកំពុងពន្លឿនការងារ។ សហភាពអឺរ៉ុប ជ្រើសរើសនយោបាយសម្តែងសាមគ្គីធម៌ផង និងកម្លាំងយោធាទប់ស្កាត់ចរន្តអន្តោប្រវេសន៍ផង។ នៅថ្ងៃចន្ទទី ១៨ ឧសភានេះ រដ្ឋមន្ត្រីក្រសួងការបរទេសនិងការពារជាតិអឺរ៉ុប ទាំង២៨ ត្រូវជួបប្រជុំគ្នានៅក្រុងព្រុចសែលប្រទេសបែលហ្សិក ដើម្បីផ្តើមរៀបចំដាក់ឱ្យដំណើរការប្រតិបត្តិការជើងទឹក “EU Navfor Med” ផ្តាច់ជើងឈ្មួញដែលរកស៊ីនាំអន្តោប្រវេសន៍ឆ្លងសមុទ្ទមេឌីទែរ៉ាណេមកទ្វីបអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៣៦
ក្រោយពីមានសោកនាដកម្មអន្តោប្រវេសន៍ស្លាប់រាប់រយនាក់ក្នុងសមុទ្ទមេឌីទែរ៉ាណេមក សហភាពអឺរ៉ុបបានតាំងចិត្តចេញធ្វើប្រតិបត្តិការដើម្បីមនុស្សធម៌ផង និងសុវត្ថិភាពផង ពោលគឺចេញធ្វើប្រតិបត្តិការ ប្រឆាំងនឹងពួកឈ្មួញអន្តោប្រវេសន៍ឱ្យដល់ឬសគល់។ នេះជាលទ្ធផលនៃជំនួបប្រជុំ បន្ទាន់ ថ្នាក់ប្រមុខដឹកនាំប្រទេសនិងរដ្ឋាភិបាល កាលពីថ្ងៃទី ២៣មេសា។ ប្រតិបត្តិការជើងទឹកដែលរដ្ឋមន្ត្រីការបរទេសនិងការពារជាតិអឺរ៉ុបកំពុងរៀបដាក់ឱ្យមានដំណើរការនៅថ្ងៃនេះ ស្ថិតនៅក្នុងក្របខ័ណ្ឌនៃសេចក្តីសម្រេចកាលពីខែមុននេះឯង។
ប្រតិបត្តិការយោធាអឺរ៉ុបក្នុងមេឌីទែរ៉ាណេ
ជាបេសកកម្មយោធាធំមិនធ្លាប់មាន ! នាវាសង្គ្រាម និងយន្តហោះស៊ើបការណ៍នឹងត្រូវដាក់ពង្រាយនៅក្នុងសមុទ្ទមេឌីទែរ៉ាណេ ដើម្បីតានដាននិងត្រួតពិនិត្យសកម្មភាពជួញដូរមនុស្ស។ ប្រតិបត្តិការនេះ ត្រូវបានគេប្រសិទ្ធិនាមថា EU Navfor Med មានទីបញ្ជាការធំនៅប្រទេសអ៊ីតាលី និងមេបញ្ជការជាឧត្តមនាវីអ៊ីតាលី។ បារាំង អង់គ្លេស អាល្លឺម៉ង់ អ៊ីតាលី និងអេស្ប៉ាញ បានសន្យារួចហើយ ថានឹងផ្គត់ផ្គង់នាវា។ ប៉ូឡូញ ស្លូវ៉ានី ផ្តល់យន្តហោះតានដាន ឬឧទ្ធម្ភាគចក្រ។
រដ្ឋមន្ត្រីក្រសួងការបរទេសនិងការពារជាតិអឺរ៉ុប ទាំង២៨ ត្រូវធ្វើការសម្រេចចិត្តជាផ្លូវការ ដោយគ្មានបង្អង់នៅថ្ងៃនេះ មុននឹងត្រូវអនុម័ត និងដាក់ដំណើរការបានជាស្ថាពរនៅខែមិថុនា ខាងមុខ នាឱកាសជំនួបកំពូលប្រមុខរដ្ឋ-រដ្ឋាភិបាលអឺរ៉ុប។ កម្មវត្ថុចំបងនៃបេសកកម្មគឺតាមចាប់ទូក នាវា ដែលពួកមេខ្យល់ប្រដាប់អាវុធប្រើ នៅក្នុងដែនសមុទ្ទអន្តរជាតិ មុននឹងទម្លាក់ជនអន្តោប្រវេសន៍មកលើក្នុងទូកចាស់ទ្រុឌទ្រោម បណ្តែតឱ្យចូលក្នុងដែនទឹកអឺរ៉ុប។
អឺរ៉ុបចង់ទប់ស្កាត់ពួកឈ្មួញទាំងអស់នោះ ដោយការឃាត់ខ្លួន ឬរឹមអូស ឬបំផ្លាញទូកតែម្តង។ ប៉ុន្តែពួកឈ្មួញមិនខ្លាចនឹងបាញ់រះមកលើទាហានឆ្មាំសមុទ្ទទេ ដើម្បីដណ្តើមទូកឡើយ។ ក្នុងស្ថានភាពបែបនេះ ដើម្បីបញ្ចេញសកម្មភាពប្រកបដោយប្រសិទ្ធិភាពនិងដើម្បីគោរពច្បាប់អន្តរជាតិ អឺរ៉ុបត្រូវការព្រមព្រៀងពីអង្គការសហប្រជាជាតិ ពោលគឺត្រូវមានសេចក្តីសម្រេចចិត្តពីក្រុមប្រឹក្សាសន្តិសុខអង្គការសហប្រជាជាតិ។
ការគាំទ្រពីក្រុមប្រឹក្សាសន្តិសុខអង្គការសហប្រជាជាតិ
ប្រមុខការទូតអឺរ៉ុប បានចេញធ្វើប្រតិបត្តិការចែចង់ នៅក្រុមប្រឹក្សាសន្តិសុខអង្គការសហប្រជាជាតិ តាំងពីថ្ងៃចន្ទសប្តាហ៍មុនម្ល៉េះ ដើម្បីសាកល្បងបញ្ចុះបញ្ចូលជាពិសេសរុស្ស៊ី និងចិន កុំឱ្យបោះឆ្នោតប្រឆាំង គោលការណ៍ធ្វើប្រតិបត្តិការជើងទឹកប្រឆាំងនឹងនាវាឈ្មួញអន្តោប្រវេសន៍មកពីលីប៊ី។ ក្នុងន័យនេះ អឺរ៉ុបបានបញ្ជាក់ហើយបញ្ជាក់ទៀត ថាបេសកកម្មក្នុងសមុទ្ទ ធ្វើឡើងដើម្បីមនុស្សធម៌ ដើម្បីសង្គ្រោះជីវិតមនុស្ស។
នៅក្នុងគម្រោងសេចក្តីសម្រេចចិត្តស្នើទៅអង្គការសហប្រជាជាតិ សុំការគាំទ្រផ្នែកផ្លូវច្បាប់ដើម្បីចេញធ្វើប្រតិបត្តិការយោធា អឺរ៉ុបបានមិនបានប្រើពាក្យថាកម្ទេចទូកទេ ហើយក៏គ្មានដែរហេតុផលអឺរ៉ុបសុំចេញទៅធ្វើប្រតិបត្តិការយោធានៅក្នុងដែនដីលីប៊ី គឺសុំត្រឹមប្រតិបត្តិការយោធាក្នុងសមុទ្ទ សម្រាប់ទាក់ចាប់ទូកឈ្មួញ។ រុស្ស៊ីហាក់ដូចជាត្រៀមចិត្តនឹងគាំទ្រអឺរ៉ុប។ អង្គការសហប្រជាជាតិអាចនឹងចេញសេចក្តីសម្រេចចិត្តនៅសប្តាហ៍នេះ ឬសប្តាហ៍ខាងមុខ។
ប៉ុន្តែប្រសិនបើក្រុមប្រឹក្សាសន្តិសុខមិនផ្តល់ការអនុញ្ញាត អឺរ៉ុបមិនអាចចូលធ្វើសកម្មភាពក្នុងដែនទឹកលីប៊ីបានទេ ប្រតិបត្តិការត្រូវមានកំរិតត្រឹមតែក្នុងដែនទឹកអន្តរជាតិ និងអាចចុះទៅឆែកឆរ ត្រួតពិនិត្យទូកគ្មានអត្តសញ្ញាណបានតែក្នុងដែនទឹកអន្តរជាតិប៉ុណ្ណោះ។ អាជ្ញាធររបស់បណ្តាប្រទេសនៅអឺរ៉ុប អាចរំពឹងត្រឹមប្រមូល បាននូវព័ត៌មាន ពាក់ព័ន្ធនឹង អង្គការឧក្រិដ្ឋកម្មជួញដូរអន្តោប្រវេសន៍ និងស្រាវចាប់ក្នុងទឹកដីខ្លួន។ វិធានការបែបនេះមានប្រសិទ្ធិភាព ត្រឹមកាត់បន្ថយចរន្តលំហូរជនភៀសខ្លួនតាមទូក មកទ្វីបអឺរ៉ុប ប៉ុន្តែមិនអាចហាមឃាត់ជនអន្តោប្រវេសន៍មិនឱ្យចាកចេញពីប្រទេសកំណើតកំពុងមានសង្គ្រាមរបស់ពួកគេបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ