បារាំង ប្រកាសបេក្ខភាពសុំធ្វើម្ចាស់ផ្ទះទទួលរៀបចំកីឡាអូឡាំពិកឆ្នាំ២០២៤
នៅថ្ងៃអង្គារទី ២៣មិថុនា នេះ អាជ្ញាធរក្រុងប៉ារីស បានប្រកាសជាផ្លូវការ ដាក់បេក្ខភាពសុំធ្វើជាម្ចាស់ផ្ទះទទួលរៀបចំកីឡាអូឡាំពិករដូវក្តៅ JO-២០២៤។ ជាសេចក្តីសម្រេចដែលបានសិក្សាពិចារណាយ៉ាងល្អិតល្អន់អស់ពេលជាយូរខែថ្ងៃ ព្រោះបន្ទាប់ពីធ្លាប់ទទួលបរាជ័យបីដងផ្ទួនគ្នា ប៉ារីសចង់ផ្តល់សេចក្តីសង្ឃឹមថ្មី ដល់ពលរដ្ឋបារាំងនៅឆ្នាំ២០២៤។ យុទ្ធនាការឃោសនា មានរយៈពេលពីរឆ្នាំ ឯលទ្ធផលនឹងត្រូវប្រកាសនៅឆ្នាំ២០១៧។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ប្រកាសបេក្ខភាពផ្លូវការថ្ងៃទី ២៣មិថុនា ជាជម្រើសប្រកបដោយនិមិត្តរូបបំផុត ព្រោះថ្ងៃនេះជាទិវាអូឡាំពិកពិភពលោក រំលឹកដល់ថ្ងៃបង្កើតកីឡាអូឡាំពិកដំបូង កាលពីថ្ងៃ២៣មិថុនា ១៨៩៤។ កម្មវិធីប្រកាសបេក្ខភាពបានប្រព្រឹត្តទៅនៅម៉ោង១២ថ្ងៃត្រង់ ក្រោមវត្តមានកីឡាករលំដាប់ពិភពលោកបារាំងដ៏ល្បីៗ។ ចាប់ពីពេលនេះទៅ ប៉ារីស មានពេលពីរឆ្នាំសម្រាប់ធ្វើការឃោសនាស្វែងរកការគាំទ្របេក្ខភាពខ្លួន ដែលនឹងដឹងលទ្ធផលតាមរយៈការបោះឆ្នោតនៅទីក្រុងលីម៉ាប្រទេស ប៉េរ៉ូ ឆ្នាំ២០១៧។
នេះគឺជាលើកទីបួនហើយដែលបារាំងបានដាក់បេក្ខភាពសុំធ្វើជាម្ចាស់ផ្ទះទទួលរៀបចំកីឡាអូឡាំពិក ដោយមានមេរៀន ធ្លាប់ចាញ់ដល់ទៅបីលើក នៅឆ្នាំ១៩៩២-២០០៨-២០១២ បេក្ខភាពប៉ារីសលើកនេះ មានលក្ខណៈបច្ចេកទេសជាងនយោបាយ។ សំណុំឯកសារដាក់ពាក្យសុំ គ្រប់គ្រងដោយអ្នកមានឯកទេសកីឡា ស្គាល់ច្បាស់គណៈកម្មការកីឡាអូឡាំពិក មិនមែនដឹកនាំដោយអ្នកនយោបាយដូចសម័យឆ្នាំ២០០៨ឬ២០១២ទេ។
ជាមួយស្មារតីថ្មី ប៉ារីសបានជ្រើសរើសយុទ្ធសាស្ត្រឃោសនាថ្មី ដោយផ្តោតខ្លាំងទៅលើភាពប្រកួតប្រជែង។ ជាក្រុងចំណាស់ មានហេដ្ឋារចនាសម្ព័ន្ធល្អ មានស្តាត មានមជ្ឈមណ្ឌលកីឡាគ្រប់ប្រភេទរួចជាស្រេច ខ្វះតែបុរីសម្រាប់ទទួលអ្នកកីឡាមួយ ប៉ារីសអាចធ្វើម្ចាស់ផ្ទះដោយត្រូវការកញ្ចប់ថវិកាដ៏តូច ក្នុងទំហំតែ៦ពាន់លានអឺរូ ពោលគឺតិចជាងពាក់កណ្តាលបើប្រៀបទៅនឹងអង់គ្លេស២០១២ ឬប៉េកាំង ២០០៨។ ជាអំណះអំណាងដ៏គួរឱ្យទាក់ទាញ !
សំណុំឯកសារប៉ារីសមានទម្ងន់ជាងគូប្រជែង ក្រុងហំបួររបស់អាល្លឺម៉ង់ ឬ បូស្តុន របស់អាមេរិក និងរ៉ូមរបស់អ៊ីតាលី។ សង្ឃឹមថាប៉ារីសអាចភ្ជាប់ខ្លួនជាមួយគណៈកម្មការកីឡាអូឡាំពិកជាថ្មីនៅឆ្នា២០២៤ ព្រោះសូមរំលឹកថាប៉ារីសធ្លាប់ធ្វើជាម្ចាស់ផ្ទះរៀបចំកីឡាអូឡាំពិកប្រភេទនេះម្តងកាលពីឆ្នាំ១៩២៤ ឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ