ប្រជាមតិក្រិក៖ ជម្រើសចុងក្រោយ ដែលមានផលវិបាកធ្ងន់សម្រាប់គ្រប់គ្នា
ប្រជាមតិទូទៅមួយ និងត្រូវធ្វើឡើងដើម្បីឲ្យប្រជាជនក្រិក សម្រេចចិត្តទទួល រឺមិនទទួល គម្រោងកំណែទម្រង់របស់សហភាពអឺរ៉ុប ជាថ្នូរនឹងប្រាក់កម្ចី។ ព្រម រឺមិនព្រម ប្រជាជនក្រិក នឹងត្រូវសម្រេចចិត្ត នៅថ្ងៃអាទិត្យទី ៥កក្កដានេះ។ ទោះបីជាខាងណាឈ្នះក្តី ក៏ការសម្រេចចិត្តនេះ និងជះឥទ្ធិពលដ៏ធំ ទៅលើនយោបាយ និងសេដ្ឋកិច្ចរបស់ក្រិកទាំងមូល។ រដ្ឋាភិបាលក្រិក ដែលអំពាវនាវឲ្យប្រជាជនបោះឆ្នោតបដិសេធ អាចនឹងត្រូវបង្ខំចិត្តចុះចេញពីដំណែង បើសិនជាសម្លេងបោះឆ្នោតខាងក្រុម យល់ព្រម បានទទួលជ័យជំនៈ។
ចុះផ្សាយនៅថ្ងៃ៖
ស្តាប់ - ០២:៣៧
នៅមិនប៉ុន្មានម៉ោងទៀតប៉ុណ្ណោះ ប្រជាជនក្រិកនឹងចាប់ផ្តើមទៅការិយាល័យបោះឆ្នោត ដើម្បីធ្វើការសម្រេចចិត្ត ថាព្រម រីមិនព្រម ក្នុងការទទួលយកសំណើររបស់សហភាពអឺរ៉ុប។ យោងតាមការស្ទាបស្ទង់មតិ សម្លេងទាំងសងខាង មានសន្ទុះប្រហាក់ប្រហែលគ្នា ដែលនេះ ធ្វើឲ្យម្នាក់ៗ មិនថាប្រជាជនក្រិកផ្ទាល់ ឬក៏ថ្នាក់ដឹកនាំសហភាពអឺរ៉ុប មានការភ័យបុកពោះទាំងអស់គ្នា។ ភ័យ ក៏ដោយសារតែ លទ្ធផលដែលនឹងស្តែងចេញ វានឹងជះឥទ្ធិពល យ៉ាងមហិមា ទោះបីជាខាងណា ឈ្នះក៏ដោយ។
បើសិនជាសម្លេង មិនយល់ព្រមឈ្នះ គឺមានន័យថា រវាង សហភាពអឺរ៉ុប និងក្រិក គឺត្រូវចប់គ្នាត្រឹមហ្នឹងហើយ។ ក្នុងន័យនេះ មានន័យថា ប្រជាជនក្រិកសុខចិត្តបដិសេធសហភាពអឺរ៉ុប និងប្រទេសសមាជិកផ្សេងទៀត ហើយដើរចេញពីតំបន់ចាយលុយអឺរ៉ូ ដើម្បីក្តាប់វាសនាខ្លួនឯង ដោយដៃខ្លួនឯងផ្ទាល់។ ប៉ុន្តែបើសម្លេង យល់ព្រម បានជោគជ័យវិញ នោះមានន័យថា ប្រជាជនក្រិក កំពុងដង្ហើយហៅរកជំនួនពីអឺរ៉ុប ដើម្បីជួយរំដោះប្រទេសខ្លួន ឲ្យងើបពីភពអន្ធកាលសេដ្ឋកិច្ច ដែលបានអូសបន្លាយ ៥-៦ឆ្នាំមកហើយ។ ក្នុងន័យនេះ រដ្ឋាភិបាលលោក អាឡិចស៊ីស ស៊ីប្រា ដែលអំពាវនាវឲ្យប្រជាជនបោះឆ្នោត មិនយល់ព្រម ប្រាកដជាត្រូវបង្ខំចិត្ត រំលាយរដ្ឋាភិបាល ហើយចុះចេញពីដំណែង ជាក់ជាមិនខាន។
ពាក្យសំដីផ្ចាញ់ផ្ចាល រវាង រដ្ឋាភិបាលក្រិក និង ភាគីម្ចាស់បំណុល ដែលមានសហភាពអឺរ៉ុប នៅតែបន្តមាន។ អឺរ៉ុបចោទរដ្ឋាភិបាលក្រិក ថាមិនដែលមានចេតនាធ្វើកំណែរទម្រង់ទាល់តែសោះ។ ចំណែកក្រិកវិញ តាមរយៈប្រសាសន៍រដ្ឋមន្ត្រីក្រសួងហិរញ្ញវត្ថុ បានចោទថាទង្វើរបស់សហភាពអឺរ៉ុប គឺមិនខុសពី អំពើភេរវកម្មនោះទេ។ លោកពន្យល់ថា អឺរ៉ុបបញ្ជាឲ្យបិទធនាគារ ធ្វើឲ្យមនុស្សផ្អើល មនុស្សភ័យថាគ្មានអឺរ៉ុប អ្វីៗនឹងរលាយខ្សុល។ នយោបាយបំភ័យស្មារតីមនុស្សបែបនេះ គឺជានយោបាយភេរវកម្ម។
ក្រុមអ្នកដែលរិះគន់ការធ្វើប្រជាមតិ មានអំណះអំណាងថា ប្រជាមតិនេះ មានលក្ខណៈមិនប្រក្រតី ពីរចំណុច។ ទីមួយទាក់ទិននឹងប្រធានបទដែលលើកឡើង ដើម្បីឲ្យប្រជាជនសម្រេចចិត្ត ពោលគឺទៅលើសំណើររបស់សហភាពអឺរ៉ុប ដែលបានធ្វើកាលពីថ្ងៃទី ២៥ មិថុនា។ ប៉ុន្តែសំណើរនេះ ត្រូវបានរដ្ឋាភិបាលក្រិកទាត់ចោទទៅហើយ។ ចំណុចទីពីរ គឺប្រជាមតិនេះ ធ្វើឡើងក្នុងកាលៈទេសៈតក់ក្រហល់ ដែលមិនបានទុកពេលវេលា ឲ្យមានការផ្សព្វផ្សាយ ឲ្យទូលំទូលាយ ដើម្បីឲ្យប្រជាជនយល់ច្បាស់ និងសម្រេចចិត្តឲ្យបានត្រឹមត្រូវ មុននឹងទៅបោះឆ្នោត។
ប៉ុន្តែទោះបីជាយ៉ាងណា នេះជាឱកាស ដែលប្រជាជនក្រិក ត្រូវសម្រេចលើជោគវាសនាប្រទេសខ្លួន ថាត្រូវគួរដើរផ្លូវណា។ ព្រោះថាចង់មិនចង់ អស់រយៈពេល ជិត១០ ឆ្នាំមកហើយ ដែលអឺរ៉ុប ដាក់គំនៀប បញ្ជាឲ្យក្រិកធ្វើអញ្ចេះ ធ្វើអញ្ចោះ ដើម្បីស្តារសេដ្ឋកិច្ច តែស្ថានការណ៍គ្មានបានល្អប្រសើរសោះ មានតែដុនដាបទៅ។ វាមិនខុសអី ពីគ្រូពេទ្យម្នាក់ ដែលព្យាបាលអ្នកជំងឺមិនជា ហើយនៅតែបន្តឲ្យថ្នាំដដែល។ ជម្រើសដ៏ល្អ គឺគួរតែដូរគ្រូពេទ្យថ្មី ក្រែងលោហ៍ អាចមានសង្ឃឹមខ្លះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ