អាល្លឺម៉ង់រៀបសំណើឱ្យក្រិកចេញពីតំបន់អឺរ៉ូជាបណ្តោះអាសន្ន៥ឆ្នាំ
កិច្ចចរចាដោះស្រាយវិបត្តិបំណុលក្រិក បានស្គាល់ភាពតានតឹងកាន់តែខ្លាំងឡើងៗ ក្រោយពីកិច្ចប្រជុំថ្នាក់រដ្ឋមន្រ្តីហិរញ្ញវត្ថុត្រូវទទួលបរាជ័យកាលពីល្ងាចថ្ងៃសៅរ៍ម្សិលមិញ។ កិច្ចប្រជុំនេះគ្រោងនឹងបើកធ្វើឡើងវិញ នៅរសៀលថ្ងៃអាទិត្យនេះ ហើយអាចបន្តអូសបន្លាយពេលវេលាយូរ ដើម្បីស្វែងរកលទ្ធផល ក៏ប៉ុន្តែ ជំនួបកំពូលវិសាមញ្ញថ្នាក់ប្រមុខរដ្ឋ/ប្រមុខរដ្ឋាភិបាលនៃក្រុមប្រទេសចាយលុយអឺរ៉ូ ដែល គ្រោងធ្វើ ពីដំបូងនៅថ្ងៃអាទិត្យនេះដែរ ទើបនឹងត្រូវបានប្រធានគណៈកម្មការអឺរ៉ុបប្រកាស នៅព្រឹកមិញ លុបចោលទៅវិញ។ ចំណែកអាល្លឺម៉ង់វិញ គេកំពុងតែរៀបចំផែនការឲ្យក្រិកចេញពីតំបន់ចាយលុយអឺរ៉ូជាបណ្តោះអាសន្ន សម្រាប់រយៈពេល ៥ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:១៣
កិច្ចប្រជុំថ្នាក់រដ្ឋមន្ត្រីរបស់ក្រុមប្រទេសចាយប្រាក់អឺរ៉ូ ម្សិលមិញ ត្រូវបានរៀបចំឡើងដើម្បីស្វែងរកចម្លើយរួមថា តើត្រូវបន្តជួយក្រិក ដោយផ្តល់ប្រាក់កម្ចី (ប្រមាណ ៧៤ពាន់លានអឺរ៉ូ) ដើម្បីកុំប្រទេសនេះក្ស័យធន និងដើម្បីបញ្ចៀសសេណារីយោក្រិកដើរចេញពីតំបន់អឺរ៉ូ ព្រោះឥលូវក្រិកបានលើកផែនការថ្មីហើយ។ តែគ្មានបានទទួលលទ្ធផលអ្វីទាំងអស់ បើទោះបីជា គម្រោងធ្វើកំណែទម្រង់ក្រិកស្រដៀងនឹងអ្វីដែល អឺរ៉ុប ធនាគារកណ្តាលអឺរ៉ុប ឬមូលនិធិរូបិយវត្ថុអន្តរជាតិចង់បានក៏ដោយ។ នៅពេលពិភាក្សាគ្នាអស់រយៈពេល ជាង៩ម៉ោង អឺរ៉ុបនាំគ្នាស្រែកថា មិនគ្រប់គ្រាន់ទេ ! គ្មានសេចក្តីថ្លែងការណ៍រួម ! មិនតែប៉ុណ្ណោះ ក្រុមប្រទេសចាយលុយអឺរ៉ូភាគច្រើន បានបង្ហាញភាពមិនទុកចិត្ត ភាពសង្ស័យចំពោះលទ្ធភាពឈានដល់កិច្ចព្រមព្រៀង ជាសាធារណៈតែម្តង។
តើត្រូវទុកចិត្តលើរដ្ឋាភិបាលក្រិកយ៉ាងដូចម្តេច ?
ប្រតិភូក្រិកមានអារម្មណ៍ថា ការជំទាស់របស់ក្រុមប្រទេសក្នុងតំបន់អឺរ៉ូជាច្រើន គ្មានពាក់ព័ន្ធនឹងខ្លឹមសារនៃសំណើធ្វើកំណែទម្រង់ទេ !
ចំណុចសំខាន់ដែលខ្ទាស់ស្ទះក្រុមចាយលុយអឺរ៉ូមិនឱ្យចេញកិច្ចព្រមព្រៀង គឺបញ្ហាទំនុកចិត្ត ! ពួកគេ មិនទុកចិត្តលើរដ្ឋាភិបាលក្រិកតែម្តង។ តើមាននរណាអាចជឿបាន លើរដ្ឋាភិបាលមួយដែលធ្លាប់បានធ្វើប្រជាមតិប្រឆាំងឈ្នះនោះ?! ម្យ៉ាងទៀត សំណើថ្មីរបស់ក្រិកពេលនេះ មានន័យដូចអ្វីសំណើម្ចាស់បំណុលដែលពលរដ្ឋក្រិក ដ៏សន្ធឹកសន្ធាប់បដិសេធមិនទទួលយកតាមសំឡេងឆ្នោតប្រជាមតិមែន តែសុំលុយច្រើនជាងមុនឆ្ងាយ។ ហេតុដូច្នេះហើយទើបប្រទេសជាច្រើនក្នុងតំបន់អឺរ៉ូ នាំគ្នាសម្តែងការមិនទុកចិត្ត។ មិនទុកចិត្តព្រោះ ខ្លាចក្រែងថានឹងនៅពេលទទួលលុយជំនួយដល់ដៃ លែងសូវមានសម្ពាធ ក្រិកលែងធ្វើកំណែទម្រង់ ដូចមានចែងក្នុងផែនការ។
ដើម្បីដោះស្រាយបញ្ហាមិនទុកចិត្តគ្នា អឺរ៉ុបត្រូវរង់ចាំមើលក្រិកអនុម័តផែនការធ្វើកំណែទម្រង់មួយខ្សែដំបូង ដូចជាកំណែទម្រង់ចូលនិវត្តន៍ ឬពន្ធដារ។ ពេលសភាអនុម័តហើយ ទើបអឺរ៉ុបចាប់ផ្តើមមកជជែកពីផែនការផ្តល់កម្ចីជាមួយក្រិកវិញ ប៉ុន្តែមធ្យោបាយនេះត្រូវការប្រើពេលយូរ ឯសេដ្ឋកិច្ច និងប្រព័ន្ធធនាគារក្រិកមានដង្ហើមចង្រិតទៅហើយ មិនអាចរង់ចាំបានទេ។
អាល្លឺម៉ង់គិតគូរឱ្យក្រិកចេញពីតំបន់អឺរ៉ូជាបណ្តោះអាសន្ន
ក្រុមប្រទេសដែលមានជំហរតឹងរ៉ឹងខ្លាំង ដូចជាប្រទេសអាល្លឺម៉ង់ ហ្វាំងឡង់ ស្លូវាគី បែលហ្សិក បាននិយាយត្រង់ៗពីដំណើរចេញពីតំបន់អឺរ៉ូ និងបានដាក់កំហិតឱ្យក្រិកព្រមទទួលធ្វើកំណែទម្រង់ បន្ថែម និងបង្វែរធនធានបានមកពីការធ្វើឯកជនភាវូបនីកម្ម ក្រុមហ៊ុនរដ្ឋ ចំនួន ៥០ពាន់លានទៅដាក់ផ្ញើទុកក្នុងមូលនិធិនៅបរទេស បង្កើតឡើងសម្រាប់ត្រួតពិនិត្យ ថាពិតជាមានការធ្វើកំណែទម្រង់ត្រឹមត្រូវ ហើយម្ចាស់បំណុលអាចទាញលុយសំណងបានដោយផ្ទាល់។ សម្រាប់អាល្លឺម៉ង់ មូលនិធិនេះ ប្រៀបដូចជាប្រាក់កក់ សម្រាប់ធានាសុវត្ថិភាព និងទំនុកចិត្តរវាងគ្នា តែបើមិនព្រមទេ គឺមានតែដើរចេញ។ ដើរចេញជាបណ្តោះអាសន្ន រយៈពេល៥ឆ្នាំ ដើម្បីអាចរុះរើបំណុលឡើងវិញ ហើយដាក់ឱ្យដំណើរការជំនួយមនុស្សធម៌ ដល់ក្រិកវិញ។
គម្រោងឯកសារលម្អិតរៀបដំណើរឱ្យក្រិកដើរចេញពីអឺរ៉ូ ធ្វើហើយតាំងពីថ្ងៃ១០កក្កដា តែទើបបង្ហើបជាសាធារណៈនៅថ្ងៃម្សិលមិញ។ ក្រុមការងារអឺរ៉ុបកំពុងពិនិត្យមើល តែ គម្រោងនេះមិនទាន់ត្រូវបានលើកមកដាក់នៅលើតុប្រជុំក្រុមប្រទេសក្នុងតំបន់អឺរ៉ូ នៅឡើយទេ។
ក៏ប៉ុន្តែការដើរចេញ ទោះជាលក្ខណៈបណ្តោះអាសន្ន ឬជារហូតក្តី គឺត្រូវតែមានការព្រមព្រៀងពីក្រិក ទើបអាចទៅរួច។ បើតាមប្រភពអឺរ៉ុប គេមិនអាចចេញក្រិត្យបណ្តេញក្រិកទេ គ្មានច្បាប់ចែងក្នុងសន្ធិសញ្ញាឡើយ តែបើតាមមាត្រា២៥៣ ក្រុមប្រឹក្សាអឺរ៉ុបអាចឆ្លងកាត់សភាអនុម័ត ដោយសំឡេងជាព្រមព្រៀងជាឯកច្ឆន្ទ ចាត់វិធានការសមស្របសុំធនាគារកណ្តាលអឺរ៉ុបឱ្យក្រិកមានលុយផ្សេងក្រៅពីអឺរ៉ូប្រើប្រាស់ក្នុងប្រទេស។ ធ្វើដូច្នេះ ក្រិកនៅតែស្ថិតក្នុងតំបន់អឺរ៉ូ ហើយរូបភាពអឺរ៉ូក៏មិនត្រូវប៉ះពាល់។
យ៉ាងណាក៏ដោយ មុននឹងឈាននឹងដល់ដំណាក់កាលនេះ គេត្រូវរង់ចាំមើលកិច្ចប្រជុំ រដ្ឋមន្ត្រីហិរញ្ញវត្ថុអឺរូសិន។ កិច្ចប្រជុំនេះនឹងត្រូវបើកបន្តធ្វើទៀត នៅរសៀលនេះ។ លោកប្រធានគណៈកម្មការអឺរ៉ុប បានប្រកាសលុបចោលជំនួបកំពូលវិសាមញ្ញថ្នាក់ប្រមុខរដ្ឋ-រដ្ឋាភិបាលតំបន់អឺរ៉ូសិន ដោយរក្សាទុកតែកិច្ចប្រជុំថ្នាក់រដ្ឋមន្ត្រីក្រសួងហិរញ្ញវត្ថុ អោយបន្តពិភាក្សាគ្នា លុះណាតែអាចចេញជាលទ្ធផលបានល្អ ដើម្បីសាកល្បងបញ្ចៀសឱ្យបាន ដំណើរក្រិកដើរចេញពីតំបន់អឺរ៉ូ។ ព្រោះក្រៅអំពីក្រុមប្រឆាំងដឹកមុខដោយអាល្លឺម៉ង់ ក្រិកសង្ឃឹមលើបារាំងនិងអ៊ីតាលី ក្នុងការបញ្ចុះបញ្ចូលតំបន់អឺរ៉ូ ស្វែងរកកិច្ចព្រមព្រៀងរវាងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ