តំបន់អឺរ៉ូ ព្រមព្រៀងជាឯកច្ឆ័ន្ទសង្គ្រោះក្រិកចេញពីវិបត្តិ
កិច្ចព្រមព្រៀងជាឯកច្ឆ័ន្ទមួយបានប្រសូតចេញនៅព្រឹកថ្ងៃចន្ទនេះ បន្ទាប់ពីការចរចាដ៏តានតឹងអស់រយៈពេលជាង១៧ម៉ោង។ គ្រប់ភាគីសុទ្ធការពារជំហរ និងផលប្រយោជន៍របស់ខ្លួនរៀងខ្លួនៗ រហូតដល់នាទីចុងក្រោយ តែនៅទីបំផុត គឺភាគីក្រិកជាអ្នកទម្លាក់ដៃ សុខចិត្តទទួលយកលក្ខខណ្ឌគ្រប់បែបយ៉ាងពីម្ចាស់បំណុល រាប់ទាំងគោលការណ៍បង្កើតមូលនិធិនៅបរទេស។ ជាកិច្ចព្រមព្រៀងដ៏លំបាក តែអាចធានាបាននូវ ស្ថិរភាពហិរញ្ញវត្ថុ។ នេះជាប្រសាសន៍របស់នាយករដ្ឋមន្ត្រីក្រិក ក្រោយកិច្ចប្រជុំ។
ចុះផ្សាយនៅថ្ងៃ៖
ស្តាប់ - ០៦:០៦
ការចរចាដោះស្រាយវិបត្តិក្រិកលើកនេះ មានលក្ខណៈតានតឹងខ្លាំងណាស់ ! នៅល្ងាចមិញនេះសោះ មុនពេលដែលថ្នាក់ដឹកនាំប្រទេសនៃតំបន់អឺរ៉ូ ទាំង១៩ ចូលតុប្រជុំ គេមើលឃើញតែសេណារីយោ ក្រិកដើរចេញពីតំបន់អឺរូ។ ជាវិបត្តិក្រិកទេ ប៉ុន្តែវាហាក់ដូចជាបានឆ្លុះបញ្ចាំងឱ្យឃើញពីភាពប្រេះឆាគ្នាក្នុងរង្វង់សមាជិកតំបន់អឺរ៉ូ រវាងក្រុមប្រទេសដែលមានជំហរតឹងរ៉ឹងដាច់ខាត ដឹកនាំដោយអាល្លឺម៉ង់ ជាមួយក្រុមប្រទេសផ្សេងទៀតនៅប៉ែកខាងជើងអឺរ៉ុប និងក្រុមប្រទេសសម្របសម្រួល ដឹកនាំដោយបារាំង អ៊ីតាលី អេស្ប៉ាញ គាំទ្រក្រិកឱ្យនៅក្នុងតំបន់អឺរ៉ូ។
ពីជំនួបកំពូលតំបន់អឺរ៉ូ ទៅជំនួបចតុភាគី
ប៉ុន្តែបន្ទាប់ពីបានជជែកគ្នាយ៉ាងតឹងមាត់ អស់មួយយប់ រួចបន្តធ្វើទៀត តាំងពីព្រហាមម៉ោង៤ភ្លឺ ជាក្រុមចំនួន១៩ប្រទេស បន្ទាប់មកជាក្រុមតូចៗ ផ្តុំតែមេៗ ដូចជា បារាំង អាល្លឺម៉ង់ ក្រិក និងក្រុមប្រឹក្សាអឺរ៉ុប នៅទីបំផុត នៅព្រឹកមិញនេះ ប្រធានគណៈកម្មការអឺរ៉ុប បានចេញមុខប្រកាសថាក្រុមប្រទេសនៃតំបន់អឺរ៉ូ បានព្រមព្រៀងគ្នាជាឯកច្ឆ័ន្ទ បើកការចរចាលើផែនការទីបីដើម្បីសង្គ្រោះក្រិក និងទុកក្រិកឱ្យនៅជាប្រទេសចាយលុយអឺរ៉ូដដែល។
ប្រធានាធិបតីបារាំង លោកហ្វ្រង់ស័រហូឡង់ បានថ្លែងសុន្ទរកថាភ្លាម ថាជាសេចក្តីសម្រេចចិត្តប្រវត្តិសាស្ត្រ តែអ្វីៗនៅមិនទាន់ដាច់ស្រេចទេ រដ្ឋមន្ត្រីក្រសួងហិរញ្ញវត្ថុកំពុងតែកំណត់ចំណុចលម្អិតសិន មុនចុះហត្ថលេខាចេញជាកិច្ចព្រមព្រៀងពេញលេញ។ ម្យ៉ាងទៀត រាល់គ្រប់ប្រទេសជាសមាជិកអឺរ៉ូ ត្រូវបញ្ជូនផែនការសង្គ្រោះក្រិក ទៅសុំការព្រមព្រៀងពីសភាសិននៅសប្តាហ៍នេះ។ ចំណែកលោកស្រីប្រមុខរដ្ឋាភិបាលអាល្លឺម៉ង់ រីករាយនឹងគម្រោងកិច្ចព្រមព្រៀង តែឆ្លៀតព្រមានក្រិកថា ផ្លូវដើរមានវែងឆ្ងាយនិងបន្លារច្រើនណាស់ មិនត្រូវភ្លេចខ្លួនឡើយ។
ក្រិកព្រមទទួលយកគ្រប់លក្ខខណ្ឌរបស់ម្ចាស់បំណុល
ជាគម្រោងកិច្ចព្រមព្រៀងដែលផ្អែកលើយន្តការស្ថិរភាពអឺរ៉ុប ដែលអង្គការមូលនិធិរូបិយវត្ថុក៏ត្រូវមានចំណែកជាមួយក្រុមប្រទេសចាយលុយអឺរ៉ូ ក្នុងផែនការសង្គ្រោះក្រិក ទំហំដល់ទៅប្រមាណពី ៨២ទៅ៨៦ពាន់លានអឺរ៉ូ។ ជាថ្នូរមកវិញ ក្រិក ត្រូវ ធ្វើកំណែទម្រង់ភ្លាម នៅ ដោយសភាត្រូវអនុម័តជាច្បាប់កំណែទម្រង់ ប្រព័ន្ធពន្ធដារ ប្រព័ន្ធចូលនិវត្តន៍ ចាប់ពីថ្ងៃទី ពុធទី ១៥កក្កដានេះទៅ។ កំណែទម្រង់ដាក់ដោយអឺរ៉ុបលើកនេះ មានលក្ខណៈធ្ងន់ធ្ងរខ្លាំងមែនទែន ដោយត្រូវធ្វើឯកជនភារវូបនីកម្ម កែទម្រង់ប្រព័ន្ធទីផ្សារការងារ រាល់គម្រោងច្បាប់ត្រូវឆ្លងកាត់យោបល់ម្ចាស់បំណុលជាចាំបាច់។
ដាក់ឱ្យដំណើរការមូលនិធិនៅប្រទេសលុចសំបួរ។ ជាមូលនិធិឯករាជ្យ និងនៅក្រៅប្រទេស ដែលក្រិកត្រូវបង្វែរលុយ បានមកពីការលក់ក្រុមហ៊ុនរដ្ឋទៅឱ្យឯកជន ចំនួន៥០ពាន់លានអឺរ៉ូ បញ្ចូលក្នុងហិបនេះ សម្រាប់ជាទុនដល់ធនាគារក្រិក សងបំណុល និងការវិនិយោគក្នុងប្រទេស តែមូលនិធិត្រូវគ្រប់គ្រងដោយស្ថាប័នអឺរ៉ុប។ តាមការពិត គំនិតបង្កើតមូលនិធិនេះ និងដែលជាការចង់បានរបស់អាល្លឺម៉ង់នៅលើកនេះ មិនមែនថ្មីថ្មោងទេ ! មូលនិធិបង្កើតឡើងតាំងពីឆ្នាំ២០១២ ក្នុងក្របខ័ណ្ឌយន្តការស្ថិរភាពអឺរ៉ុប សម្រាប់ជួយសមាជិកជួបការលំបាក តែចាត់ចែងដោយក្រិកទើបក្រៀមស្វិតដូច្នេះ។
ការដាក់ដំណើរការមូលនិធិនៅបរទេស និងវត្តមានមូលនិធិរូបិយវត្ថុអន្តរជាតិក្នុងវិបត្តក្រិក ត្រូវប្រធានាធិបតីក្រិក ប្រឆាំងជំទាស់រហូតមក ប៉ុន្តែលោកគ្មានជម្រើសទៀតទេ លោកបានប្រកាសទទួលស្គាល់ថាប្រឹងអស់សមត្ថភាព និងជាការចរចាដ៏លំបាកបំផុត ដែលក្រិកត្រូវសុខចិត្តទទួលយកគ្រប់យ៉ាងពីម្ចាស់បំណុល។
លក្ខខណ្ឌតឹងតែង តែផលក៏បានធំ
បើនិយាយអំពីផ្នែកនយោបាយវិញ ជាមួយនឹងការព្រមព្រៀងថ្ងៃនេះ ប្រមុខរដ្ឋាភិបាលក្រិក លោក អាឡិចស៊ី ស៊ីប្រាស ពិតជាត្រូវពិបាកដោះស្រាយបន្តិចហើយ នៅចំពោះមុខពលរដ្ឋ និងចលនានយោបាយក្នុងប្រទេសផ្សេងទៀត។ ស្ថានភាពបែបនេះ ប្រមុខដឹកនាំណាក៏ពិបាកជ្រើសរើសដែរ ដូចមនុស្សម្នាក់នៅពេលកាំភ្លើងបើកកៃដាក់ចំសៀតផ្កាហើយ ចង់មិនចង់ក៏ត្រូវព្រម។
នេះបើនិយាយពីទម្រង់ តែបើនិយាយអត្ថន័យវិញ ជាការពិតម្ចាស់បំណុលដាក់លក្ខខណ្ឌតឹងខ្លាំង តែពេលនេះសេណារីយោក្រិកដើរចេញពីតំបន់អឺរ៉ូ ត្រូវរសាត់ទៅឆ្ងាយ មិនមែនជារបៀបវារៈទៀតទេ។ ម្យ៉ាងទៀត ក្រិកបានទទួលមកវិញ នូវ ប្រាក់កម្ចីដ៏ច្រើនសន្ធឹកសន្ធាប់ជាងមុន និងសម្រាប់រយៈពេលដល់ទៅបីឆ្នាំ មិនមែន៦ខែដូចលើកមុនឡើយ។ មិនតែប៉ុណ្ណោះ ក្រិកអាចសើរើអំពីរយៈពេលសងបំណុលទៀត អឺរ៉ុបមិនព្រមលុបបំណុលចោលមែន តែអឺរ៉ុបបានពន្យារពេលសងលុយ។ ក្រិកបានទទួលប្រាក់កម្ចីជាង៣៥ពាន់លាន សម្រាប់ស្តារសេដ្ឋកិច្ច ឱ្យមានកំណើន។ និយាយជារួម បើតាមលោកស៊ីប្រាស កិច្ចព្រមព្រៀងយ៉ាប់យឺនបន្តិចមែន ប៉ុន្តែធានាបានស្ថិរភាពហិរញ្ញវត្ថុ ក្រិកមានខ្សល់អាចដង្ហើមបាន គ្មានចំណងរឹតកដូចលើកមុនពេក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ