សន្និសីទស្តីពីជំងឺអេដស៍កំពុងចាប់អារម្មណ៍ករណីយុវតីបារាំងផ្ទុកមេេរោគពីកំណើត លែងព្យាបាល តែមានសុខភាពល្អ
ជាករណីតែមួយគត់ និងជាលើកទីមួយនៅលើពិភពលោក ដែលយុវតីបារាំងម្នាក់ បានឆ្លងមេរោគអេដស៍ពីម្តាយ (តាំងពីនៅក្នុងពោះ ឬនៅពេលកើត) លែងបានទទួលការព្យាបាលតាំងពី១២ឆ្នាំមកហើយ ប៉ុន្តែបច្ចុប្បន្នមានអាយុ១៨ឆ្នាំ នាងមានសុខភាពល្អ គ្មានរោគសញ្ញាជំងឺអ្វីទាំងអស់។ វត្តមានវីរ៉ុស មាននៅក្នុងកោសិកាឈាមនាងជានិច្ច តែភាពកំណាចរបស់វីរ៉ុសបានសាបរលាប។ ដំណឹងល្អ និងគួរឱ្យចាប់អារម្មណ៍ខ្លាំងនេះ ត្រូវបានក្រុមអ្នកស្រាវជ្រាវបារាំងលើកយកទៅបង្ហាញប្រាប់អង្គសន្និសីទអន្តរជាតិស្តីពីជំងឺស៊ីដា ឬអេដស៍ នៅទីក្រុងវេនកូវ័រ ប្រទេសកាណាដា ទីដែលក្រុមអ្នកវិទ្យាសាស្ត្រសុខាភិបាលមកពីទូទាំងពិភពលោក កំពុងជួបប្រជុំគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២៦
សុំមិនបញ្ចេញអត្តសញ្ញាណ ជានិស្សិត មានអាយុ១៨ឆ្នាំកន្លះ ជាយុវវ័យពេញរូបរាង មានជីវិតធម្មតាដូចយុវវ័យដទៃ នាងបានឆ្លងមេរោគស៊ីដា ឬអេដស៍ពីម្តាយ តាំងពីកំណើត (ឆ្លងតាំងពីក្នុងពោះនៅត្រីមាសចុងក្រោយ ឬឆ្លងពេលប្រសូត ព្រោះម្តាយនាងមានផ្ទុកមេរោគអេដស៍ ប្រើថ្នាំពេលសម្រាលហើយនៅតែមិនអាចគ្រប់គ្រងវីរ៉ុសកុំឱ្យចម្លងបានទៅកូនបាន)។
ពេលនៅជាទារក នាងបានទទួលការតាមដានពីសំណាក់គ្រូពេទ្យជាប់រហូតដល់អាយុ៦ឆ្នាំ។ ការឈប់លេបឆ្នាំពន្យារជីវិត Trithérapie –quathérapie កាលណោះជាសេចក្តីសម្រេចចិត្តរបស់គ្រួសារនាង។ បាត់មុខអស់ជាងមួយឆ្នាំ នាងបានត្រលប់មកជួបក្រុមគ្រូពេទ្យវិញ តែដូចមានអភិនិហា បើទោះបីជាគ្មានលេបថ្នាំសោះ តាំងពីមួយឆ្នាំមកហើយក្តី ក៏វីរ៉ុសគ្មានវិវឌ្ឍន៍ គ្មានការកើនឡើងសោះ ?! វីរ៉ុសហាក់សាបរលាបភាពកំណាចនិងភាពចម្លងរបស់វា ពុំធ្វើការវិវឌ្ឍន៍បំបែកខ្លួនច្រើនឡើងៗ ដូចករណីវីរ៉ុសហ៊ីវក្នុងខ្លួនអ្នកមានផ្ទុកមេរោគអេដស៍ផ្សេងទៀតសោះ។ ក្រុមគ្រួសារនិងគ្រូពេទ្យក៏បានព្រមព្រៀងគ្នា ឈប់បន្តការព្យាបាលរហូតទៅ។
ប្រវត្តិនៃការព្យាបាល
ប្រសូតចេញភ្លាម គ្រូពេទ្យបានផ្តល់ការព្យាបាលដោយប្រើថ្នាំ antirétroviral zidovudine (AZT) ភ្លាម។ ៦សប្តាហ៍ក្រោយលទ្ធផលនៃការវិភាគឈាមបង្ហាញថា នាងមានផ្ទុកវីរ៉ុសហ៊ីវ តែចំនួនវីរ៉ុសបានចុះពាក់កណ្តាល។ ពីរខែក្រោយមកទៀត ដល់ពេលដែលត្រូវបញ្ឈប់ការព្យាបាល វីរ៉ុសបែរជាបានកើនឡើងខ្លាំង ទើបក្រុមគ្រូពេទ្យសម្រេចព្យាបាលដោយប្រើថ្នាំពន្យារជីវិតបីមុខ បន្ទាប់មកបួនមុខបញ្ចូលគ្នា។ គឺថ្នាំនេះហើយដែលនាងលេបរហូតដល់អាយុ៦ឆ្នាំ។ កាលណោះក្រុមគ្រូពេទ្យយល់ថាបើមិនផ្តល់ថ្នាំពន្យារជីវិត អង់ទីរេត្រូវេរ៉ូភ្លាមទេ ទារកអាចនឹងស្លាប់បានព្រោះប្រព័ន្ធការពារខ្លួននៅខ្សោយ។ តាំងពីនោះមកនាងលែងលេបរហូត។
ករណីទារកឆ្លងមេរោគហ៊ីវ ពេលកើត បច្ចុប្បន្នមានតិចតួចណាស់ នៅប្រទេសជឿនលឿន ប៉ុន្តែបើមាន អាចធ្វើឱ្យទារកឆាប់ស្លាប់ប្រសិនបើគ្មានការព្យាបាលទាន់ពេលវេលានិងត្រឹមត្រូវទេ។ កាលពីឆ្នាំ២០១០ ទារកអាមេរិកម្នាក់ បានទទួលព្យាបាលតាំងពីដំបូងដែរ ក្នុងរយៈពេលពីរឆ្នាំ បានធ្វើឱ្យមេរោគស៊ីដាសាបឥទ្ធិពលវា ប៉ុន្តែដល់ពេលបញ្ឈប់ការព្យាបាលបានតែ២៧ខែប៉ុណ្ណោះក៏ស្រាប់តែរើឡើងវិញខ្លាំង។ គឺទើបតែករណីនាងបារាំងនេះតែ ដែលមេរោគសាបរលាប គ្មានផ្តល់រោគសញ្ញាជំងឺដល់ទៅជាង១២ឆ្នាំ។
មិនមែនជាការ « ជាសះស្បើយ » ទេ
អ្នកស្រាវជ្រាវ អ្នកឯកទេសបានប្រើពាក្យច្បាស់លាស់ណាស់ ថានាងគ្មានរោគសញ្ញាជំងឺអ្វីទាំងអស់ វីរ៉ុសមិនបានធ្វើការវិវឌ្ឍន៍ មិនបំបែកបង្កើនចំនួនរីកសាយភាយ ពេលខ្លួនមនុស្ស ដូចករណីមនុស្សមានផ្ទុកវីរ៉ុសអេដស៍គ្មានលេបថ្នាំពន្យារជីវិតមែន ប៉ុន្តែមិនបានប្រើសោះពាក្យថា ជាសះស្បើយ។ សាស្ត្រាចារ្យបារាំង លោក នាយកស្រាវជ្រាវបានបញ្ជាក់ហើយបញ្ជាក់ទៀតថា មិនឱ្យភ្ជាប់ពាក្យធូរស្បើយ ទៅនឹងពាក្យថាជាពីជំងឺអេដស៍ទេ។ ហេតុអ្វី ? ពីព្រោះ វីរ៉ុសហ៊ីវមានវត្តមានជានិច្ចនៅក្នុងកោសិកាឈាម។គ្មាននរណាម្នាក់អាចទស្សទាយ ឬព្យាករអំពីស្ថានភាពសុខភាពនាង នៅថ្ងៃអនាគតបានទេ។ មេរោគអេដស៍របស់នាងសាបរលាបភាពកំណាចរបស់ខ្លួននៅថ្ងៃនេះ តែវាអាចនឹងកំរើកឡើងវិញបានគ្រប់ពេលវេលា ព្រោះបើតាមការវិភាគ នៅពេលគេធ្វើតេស្តបណ្តុះកោសិកាខ្លះ ដោយរំញោចវាចុះឡើង វីរ៉ុសហ៊ីវក៏មានសកម្មភាពឡើងវិញ។ ដោយហេតុតែគេមិនដឹងថ្ងៃវីរ៉ុសរើឡើងវិញនេះហើយ បានជាមិនប្រើពាក្យថា « ជា » នោះ។
ប៉ុន្តែករណីយុវតីបារាំងនេះ បានធ្វើពិភពលោកអ្នកស្រាវជ្រាវ មានទស្សនវិស័យភ្លឺស្វាងជាងមុន និងចូលរួចចំណែកការស្រាវជ្រាវកាន់តែលឿនទៅមុខ។ សម្រាប់អ្នកវិទ្យាសាស្ត្រា ភាពអសកម្មនៃវីរ៉ុសហ៊ីវរយៈពេលយូរ ក្នុងខ្លួនយុវតីបារាំង អាចកើតមានបាន ដោយសារតែគេបានផ្តល់ការព្យាបាល បានឆាប់ដល់ទារក តាំងពីកើតភ្លាម ព្រោះការព្យាបាលកាន់តែឆាប់ កាន់តែអាចការពារបានល្អប្រព័ន្ធការពារខ្លួន ដែលទៅត្រួតត្រាវីរ៉ុសមិនឱ្យពង្រីកខ្លួនបាន។
តាមរយៈលទ្ធផលសុខភាពរបស់យុវតីបារាំង អ្នកស្រាវជ្រាវមានក្តីសង្ឃឹមថ្មីមួយទៀតក្នុងការស្វែងរកថ្នាំវ៉ាក់សាំង ប្រឆាំងនឹងការបង្ករោគ។ គ្រប់គ្នាកំពុងផ្ចង់ការសិក្សាទៅយន្តការនៃសរីរាង្គកាយ និងប្រព័ន្ធការពារខ្លួនរបស់យុវតី ទៅលើវីរ៉ុស។ ប៉ុន្តែមិនមែនជាងាយស្រួលឡើយ។
ក្នុងពេលរង់ចាំ សារដ៏សំខាន់មួយ គឺបើវិភាគរកឃើញមានផ្ទុកមេរោគអេដស៍ភ្លាម ត្រូវផ្តល់ការថ្នាំពន្យារជីវិតភ្លាម ដោយមិនបង្អង់ ដល់មនុស្សធំ និងដល់ទារកទើបនឹងកើតភ្លាម បើម្តាយមានផ្ទុកមេរោគហ៊ីវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ