បារាំងនិងប្រទេសជិតខាង ជួបនិយាយគ្នា ដើម្បីរិតបន្តឹងសន្តិសុខតាមរថភ្លើង
ជាងមួយសប្តាហ៍ ក្រោយហេតុការណ៍ប៉ុនប៉ងធ្វើភេរវកម្ម ក្នុងរថភ្លើង នៅប្រទេសបារាំង រដ្ឋាភិបាលបារាំង និងប្រទេសជិតខាង៨ ដែលមានបណ្តាញខ្សែរថភ្លើងជាប់គ្នា បានជួបប្រជុំគ្នា នៅទីក្រុងប៉ារីស នាល្ងាចថ្ងៃសៅរ៍ ទី ២៩ សីហា ដើម្បីពិភាក្សាគ្នា រិះរកវិធី ក្នុងការបន្ថែមការត្រួតពិនិត្យ សន្តិសុខ នៅតាមស្ថានីយ៍ និងខ្សែរថភ្លើង។ ខ្សែរថភ្លើងឆ្លងប្រទេស ដែលដឹកអ្នកដំណើររាប់ពាន់អ្នក ក្នុងមួយថ្ងៃៗ គឺជាទីវាយប្រហារភេរវកម្ម ដ៏ងាយស្រួល របស់ក្រុមអ៊ីស្លាមជីហាដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ការប៉ុនប៉ង ធ្វើភេរវកម្មលើខ្សែរថភ្លើង Thalys ភ្ជាប់ពីទីក្រុងអាំស្ទែដាំ មកទីក្រុងប៉ារីស កាលពីថ្ងៃទី ២១សីហា កន្លងទៅ បានធ្វើឲ្យអ្នកដំណើរ ខ្លាចឡើងព្រឺឆ្អឹងខ្នង មិនទាន់បាត់ ដោយសារតែភេរវជន បាននាំយកកាំភ្លើង AK និងគ្រាប់ជាច្រើនបង់ ឡើងទៅលើរថភ្លើង បានយ៉ាងងាយស្រួល។ ជាសំណាងល្អ អ្នកដំណើរ ៤នាក់ បីនាក់ជាជនជាតិអាមេរិក និងម្នាក់ ជាជនជាតិបារាំង បានព្រួតគ្នា វាយដណ្តើមកាំភ្លើងពីជនដៃដល់។ ហេតុការណ៍នេះ បានធ្វើឲ្យបារាំង និងប្រទេសជិតខាងទាំង៨ ដែលមានខ្សែរថភ្លើងតភ្ជាប់គ្នា នាំគ្នាចាប់ផ្តើមគិតគូរ ដើម្បីធានាសុវត្ថិភាព អ្នកដំណើរតាមរថភ្លើង។
ថ្ងៃសៅរ៍ ទី ២៩សីហា លោក Bernard Cazeneuve រដ្ឋមន្ត្រីមហាផ្ទៃបារាំង បានជួបប្រជុំនៅក្រុងប៉ារីស ជាមួយ រដ្ឋមន្រ្តីក្រសួងដឹកជញ្ជូន មកពីប្រទេស៨ មាន អង់គ្លេស អាល្លឺម៉ង់ ប៊ែលហ្សិក ហូឡង់ អេស្ប៉ាញ អ៊ីតាលី ស្វីស និង លុចហ្សំបួរ។ លោករដ្ឋមន្ត្រីបារាំង បានលើកចេញ នូវវិធានការជាច្រើនចំណុច ដែលលោកចង់ឲ្យប្រទេសទាំងអស់ សហការគ្នា ក្នុងការទប់ស្កាត់ អំពើភេរវកម្មតាមរថភ្លើង។
វិធានទាំងនោះមានជាអាទិ៍ ការត្រួតពិនិត្យសន្តិសុខ ឲ្យបានស្របគ្នា និងបណ្តាក់គ្នា ពីប្រទេសមួយទៅប្រទេសមួយ ដែលរថភ្លើងឆ្លងកាត់។ ក្នុងន័យនេះ លោករដ្ឋមន្ត្រីចង់សំដៅ ដល់ការសហការគ្នា ក្នុងការផ្តល់ព័ត៌មាន រវាងគ្នាទៅវិញទៅមក ដើម្បីធ្វើការឆែកឆេរ ឲ្យមានប្រសិទ្ធិភាព។ បន្ថែមពីនោះ នៅមានគម្រោងបង្កើន ការត្រួតពិនិត្យ ឆែកឆេរ អ្នកដំណើរណា ដែលធ្វើឲ្យមានការសង្ស័យ មុនពេលរថភ្លើងចេញដំណើរ។ ក្នុងករណីនេះ គេអាចនឹងពង្រីកតួនាទីការងារ របស់នគរបាលផ្លូវដែក ឲ្យមានសិទ្ធិឆែកឆេរសំភារៈ របស់អ្នកដំណើរ ក្នុងករណីមានការសង្ស័យ។
សូមបញ្ជាក់ថា ក្នុងមួយថ្ងៃៗ អ្នកដំណើរតាមរថភ្លើងនៅអឺរ៉ុប មានចំនួនលើសអ្នកដំណើរតាមយន្តហោះដល់ទៅ ២០ដងឯណោះ។ ដូច្នេះគំនិតដែលចង់ដាក់ការត្រួតពិនិត្យឆែកឆេរ ដូចនៅតាមព្រលានយន្តហោះ គឺមិនអាចធ្វើទៅរួចទេ។ ចង់ធ្វើឲ្យមានប្រសិទ្ធិភាព ទាល់តែដាក់ការត្រួតពិនិត្យនៅគ្រប់ស្ថានីយ៍រថភ្លើងទាំងអស់ ហើយដែលតម្រូវ ឲ្យមានបំពាក់ម៉ាស៊ីនស្គែន និងបន្ថែមបុគ្គលិក នៅតាមស្ថានីយ៍ទាំងនោះ។ លោក អគ្គនាយកក្រុមហ៊ុនដឹកជញ្ជូនផ្លូវដែកបារាំង SNCF បានច្រានចោលគំនិតនេះទាំងស្រុង ដោយបានលើកឡើងថា ការធ្វើបែបនេះ គឺត្រូវចំណាយប្រាក់ រាប់ពាន់លានអឺរ៉ូ ហើយគេមិនប្រាដកថា វាមានប្រសិទ្ធិភាពនោះទេ។
តាមប្រភពពីនគរបាល បានអះអាងថា ការយាមកាមសុវត្ថិភាព នៅតាមស្ថានីយ៍រថភ្លើង នៅបារាំង គឺមានកំរិតខ្ពស់ខ្លាំងណាស់ទៅហើយ។ ក្រៅពីការបន្ថែមចំនួនកម្លាំងត្រួតពិនិត្យសន្តិសុខ និងយាមល្បាត ឲ្យបានច្រើន គេមិនអាចធ្វើអ្វីបាន ឲ្យលើសនេះទៀតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ