អង្គការOCDE ផ្តល់អនុសាសន៍ប្រឆាំងនឹងអំពើពុករលួយក្នុងជំនួបG២០
អគ្គលេខាអង្គការសហប្រតិបត្តិការនិងអភិវឌ្ឍន៍សេដ្ឋកិច្ច ឬហៅកាត់ថា OCDE បានបង្ហាញ អនុសាសន៍ណែនាំអំពីរបៀបអនុវត្តប្រឆាំងនឹងអំពើពុករលួយ នៅថ្ងៃសៅរ៍នេះ នៅក្នុងអង្គជំនួបប្រជុំក្រុមប្រទេសមានសេដ្ឋកិច្ចលូតលាស់ខ្លាំង២០ដំបូងគេ (G២០) ដែលបាននិងកំពុងប្រព្រឹត្តទៅនៅ តួកគី។ តួកគី ធ្លាប់រងការរិះគន់ខ្លាំងដែរពីសំណាក់អង្គការតម្លាភាពអន្តរជាតិស្តីពីបញ្ហាពុករលួយនេះ។
ចុះផ្សាយនៅថ្ងៃ៖
ស្តាប់ - ០១:៣៩
គ្មានប្រទេសណាមួយស្អាតស្អំជាងប្រទេសណាទេ ! នេះជាការគូសបញ្ជាក់របស់លោកអគ្គលេខាអង្គការសហប្រតិបត្តិការនិងអភិវឌ្ឍន៍សេដ្ឋកិច្ច Gurria នាឱកាសធ្វើសន្និសីទកាសែតរួមជាមួយឧបនាយករដ្ឋមន្ត្រីតួកគី លោក Cevdet Yilmaz។ ប៉ុន្តែនៅក្នុងប្រទេសខ្លះ ស្ថាប័ន និងប្រព័ន្ធដឹកនាំមានលក្ខណៈប្រសើរជាង ទើបអាចបិទខ្ទប់កុំឱ្យមនុស្សលោភលន់ប្រាថ្នាប្រព្រឹត្តអំពើពុករលួយព្រោះអាចនឹងត្រូវមានទោសទណ្ឌកម្ម។ នេះគឺជាគូសបញ្ជាក់បន្ថែមរបស់ប្រធានអង្គការOCDE ដែលជាអង្គការប្រមូលផ្តុំប្រទេសអ្នកមានជាងគេលើពិភពលោកទាំងជាង៣០ប្រទេស។
អនុសាសន៍ ប្រឆាំងនឹងអំពើពុករលួយដែលគ្មានលក្ខណៈបង្ខិតបង្ខំនេះ បានតាក់តែងឡើង ដើម្បីជាជំនួយដល់ក្រុមអ្នកដឹកនាំ/ទទួលខុសត្រូវនយោបាយទាំងអស់ ក្នុងការវាយតម្លៃនិងធ្វើឱ្យប្រសើរឡើងច្បាប់ប្រឆាំងនឹងអំពើពុករលួយ ដោយអង្គការបានសង្កត់ធ្ងន់ទៅលើសកម្មភាពរបស់ក្រុមហ៊ុនល្បីៗធំៗរកស៊ីក្នុងប្រទេស។
ក្នុងអត្ថន័យនេះ អង្គការបានផ្តល់សេចក្តីណែនាំមួយចំនួនធំ មានជាអាទិ៍ ធ្វើឱ្យប្រសើរឡើងសិទ្ធិជាម្ចាស់ភាគហ៊ុន ពង្រឹងទំនួលខុសត្រូវរបស់ថ្នាក់ដឹកនាំ ឬធ្វើឱ្យកាន់តែមានតម្លាភាព ក្នុងការកំណត់តម្លៃទំនិញ។
តួកគី ដែល ឆ្នាំនេះ ជាម្ចាស់ផ្ទះទទួលរៀបចំជំនួបប្រជុំ គ្រប់ជាន់ថ្នាក់របស់G២០ ក្រុមប្រទេសមានសេដ្ឋកិច្ចលូតលាស់ខ្លាំងជាងគេបំផុតនៅលើពិភពលោក ត្រូវបានអង្គការតម្លាភាពអន្តរជាតិ ផ្តល់ចំណាត់ថា្នក់លេខ៦៤ ក្រោយប្រទេសណាម៉ីប៊ី ឬគុយបា ផង ក្នុងបញ្ហាពុករលួយនេះ។ កាលពីឆ្នាំទៅ តួកគី និងចិន ព្រមទាំងអង់ហ្គោឡា ជាប្រទេសបីដែលធ្លាក់ចំណាត់ថ្នាក់យ៉ាងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ