បារាំងគ្រប់គ្រងចំណាយសាធារណៈបានល្អ តែបំណុលជាតិនៅតែធ្ងន់
ចុះផ្សាយនៅថ្ងៃ៖
ស្តាប់ - ០៤:៤៣
នៅថ្ងៃពុធទី ៣០ កញ្ញានេះ បារាំងត្រូវអនុម័តគម្រោងថវិកាឆ្នាំ២០១៦ ដែលជាឆ្នាំសំខាន់ចុងក្រោយក្នុងអាណត្តិលោកហ្វ្រង់ស័រ ហូឡង់។ ជាវេលានយោបាយដ៏សំខាន់ នៅទីស្តីការរដ្ឋមន្ត្រីបារាំងនិងសម្រាប់គណៈកម្មការអឺរ៉ុប។ អឺរ៉ុបម្ចាស់សន្ធិសញ្ញា និងជាអ្នកមើលការខុសត្រូវលើកស្ថិរភាពនិងកំណើនសេដ្ឋកិច្ច សង្ឃឹមថាប៉ារីស ដែលជាសិស្សមិនល្អរបស់សហភាពក្នុងរយៈពេលប៉ុន្មានឆ្នាំចុងក្រោយ កែខ្លួន ធ្វើតាមដំបូន្មានអឺរ៉ុប។ ហើយនេះជាឱកាសដែលយើងត្រលប់មកក្រលេកមើលបំណុលរបស់បារាំងឡើងវិញដែរ។
បញ្ចុះពន្ធដារ បន្តផ្តល់ជំនួយដល់សហគ្រាសនិងក្រុមហ៊ុន ទន្ទឹមគ្នានឹងការកំហិតចំណាយសាធារណៈ រដ្ឋាភិបាលបារាំងបានបង្ហាញគម្រោងថវិកាឆ្នាំ២០១៦ ដែលអាចចាត់ទុកថាជាគម្រោងដ៏សមស្របមួយ និងស្របតាមពាក្យធ្លាប់សន្យារបស់ប្រធានាធិបតីទៀត។
សម្រាប់ឆ្នាំ២០១៦ កំរិតឱនភាពសាធារណៈបារាំងនឹងធ្លាក់មកនៅ ត្រឹម៣,៤% នៃផលិតផលសរុបក្នុងស្រុក។ ហើយនៅឆ្នាំ២០១៧ ឱនភាពនឹងត្រូវធ្លាក់មកត្រឹម២,៨% ពោលគឺដូចវិន័យមានចែងដោយគណៈកម្មការអឺរ៉ុប។
កាលពីឆ្នាំទៅ ក្នុងអំឡុងពេលដូចគ្នានេះ ប៉ារីស បានបង្កភាពភ្ញាក់ផ្អើលដល់ប្រទេសដៃគូក្នុងអឺរ៉ុប និងស្ថាប័នអឺរ៉ុប តាមរយៈការប្រកាសបង្ហាញឱនភាពសាធារណៈដល់ទៅ៤,៤% នៅឆ្នាំ២០១៥ និង៤,៣%នៅឆ្នាំ២០១៥ បើទោះបីជាបារាំងទើបបានទទួលការអនុគ្រោះពីរឆ្នាំ(គិតចាប់ពី២០១៣មក) ដើម្បីស្រោចស្រង់មុខមាត់ក្តី។
តាមធម្មតាបារាំងត្រូវទទួលទណ្ឌកម្មយ៉ាងអាម៉ាស ប៉ុន្តែដោយមានហេតុផល និងអំណះអំណាង ព្រមទាំងបញ្ជីធ្វើកំណែទម្រង់មួយដំណោតមក គណៈកម្មការអឺរ៉ុបក៏បានផ្តល់ឱកាសឱ្យរដ្ឋាភិបាលលោក ម៉ានុយអែល វ៉ាល្ស ពីរឆ្នាំបន្ថែមទៀត។
ឆ្នាំនេះបារាំងបានងើបមុខឡើងវិញបន្តិច នាយករដ្ឋមន្ត្រីបារាំងបានបញ្ជាក់ប្រាប់ប្រធានគណៈកម្មការអឺរ៉ុប តាំងពីម្សិលមិញ មុនការបង្ហាញគម្រោងថវិកាប្រចាំឆ្នាំជាផ្លូវការទៀតថា ប៉ារីសគោរពបានកិច្ចសន្យាថវិកា បញ្ចុះឱនភាពជាតិឱ្យក្រោម៣%នៅឆ្នាំ២០១៧។ ប្រធានគណៈកម្មការអឺរ៉ុប លោក Juncker ពិតជាមិនចង់ឃើញសំណុំរឿងបារាំងមានវិបត្តិហិរញ្ញវត្ថុ ឡើងមកបំពុលបរិយាកាសអឺរ៉ុប ដែលកំពុងស្រអាប់ស្រាប់នោះទេ។
បើគេជឿលើគម្រោងថវិកាឆ្នាំ២០១៦ ដែលរដ្ឋាភិបាលអះអាងថាគ្រប់គ្រងថវិកាបានទាំងស្រុង ព្រោះបានគិតគូរដោយផ្អែកលើកំណើនសេដ្ឋកិច្ច ១,៥% លើតម្លៃប្រេងឆៅធ្លាក់ថ្លៃ ប្រាក់អឺរ៉ូទាប… បារាំងកំពុងដើរត្រង់ផ្លូវបន្តិចហើយ។ ប៉ុន្តែចំណាយរដ្ឋ នៅកើនឡើងគួរឱ្យកត់សម្គាល់ដដែល ៣៦៦,៣ពាន់លានអឺរ៉ូ នៅឆ្នាំ២០១៥ទល់នឹង៣៧៤,៨ពាន់លានអឺរ៉ូ សម្រាប់ឆ្នាំ២០១៦។ ឯប្រាក់ចំណូលកើនឡើងពី២៩២,៣ ទៅ៣០១,៧ ពាន់លាន។ ជាសរុបមក ឱនភាពជាតិបានធ្លាក់ចុះបន្តិចមែន តែមិនទាន់ឈ្នះកម្មវត្ថុដ៏ចម្បង ដែលចង់បញ្ចុះប្រាក់បំណុលជាតិទេ ! បំណុលសាធារណៈ នៅតែធ្ងន់ខ្លាំងដដែល។
តើបារាំងមានបំណុលប៉ុណ្ណា ?
បារាំងសព្វថ្ងៃមានបំណុលជាង ២០០ម៉ឺនលាន។ ជាចំនួនដ៏ច្រើន ហួសនឹងគិត ! ពោលគឺស្មើនឹងតម្លៃនាវាផ្ទុកយន្តហោះCharles De Gaulle ៥០០គ្រឿង ឬបីដងតម្លៃទីផ្សារភាគហ៊ុនក្រុមហ៊ុនApple។ កូនបារាំងកើតម្នាក់ ស្មើនឹងបង្កើតបំណុលជាងបីម៉ឺនអឺរ៉ូ ប្រៀបដូចជាការចែកកេរ្ត៍បន្តៗគ្នាយ៉ាងដូច្នោះ។ ព្រោះសូមបញ្ជាក់ថា តាំងពី៤០ឆ្នាំមកហើយដែលរដ្ឋបារាំង ចាយ ច្រើន ចំណូល។ ហើយបើទោះបីជាតាំងពីឆ្នាំ២០០៩មក ឱនភាពជាតិបានស្គាល់ថាថយចុះជាលំដាប់ (ពី៧,២%នៅឆ្នាំ២០០៩ មក៤%នៅឆ្នាំ២០១៤)ក៏ដោយ ក៏បំណុលសាធារណៈនៅតែធ្ងន់ដដែល។ ជាឧទាហរណ៍ជាក់ស្តែង នៅឆ្នាំ២០១៥នេះ ចំណូលដែលរដ្ឋបារាំងរកបាន ត្រូវចំណាយគ្រប់ នៅត្រឹមថ្ងៃ១៧តុលា។ ចាប់ពីថ្ងៃទី ១៨ទៅ រដ្ឋបារាំងត្រូវ ចាយ ខ្ចីលុយគេ។ តែជាសំណាងល្អ ដោយរដ្ឋបារាំងអាចនិងងាយរកខ្ចីលុយ ក្នុងតម្លៃការប្រាក់ទាបណាស់ ត្រឹមប្រមាណតែ ០,៦២%ប៉ុណ្ណោះជាមធ្យមនៅឆ្នាំ២០១៥នេះ។ ហើយម្យ៉ាងទៀត ម្ចាស់បំណុលបារាំង ភាគច្រើន (២/៣)ជាបរទេស។ គ្រាន់ការប្រាក់ បារាំងត្រូវចំណាយអស់ដល់ទៅ ៤៤ពាន់លានអឺរ៉ូ គឺស្មើនឹងចំណាយរបស់ក្រសួងការពារជាតិ ក្រសួងយុត្តិធម៌ ក្រសួងបរិស្ថាន និងវប្បធម៌បូកបញ្ចូលគ្នា។
ក្នុងមួយនាទីៗ បារាំងត្រូវខ្ចីលុយគេដល់ទៅ៣៦ម៉ឺនអឺរ៉ូ សម្រាប់ដោះស្រាយវិបត្តិបំណុល។ តែថ្វីបើគម្រោងថវិកាឆ្នាំថ្មី មិនអាចជួយបន្ថយបំណុលសាធារណៈបានធូរស្បើយ ដោយបានត្រឹមតែជួយបន្ថយឱនភាពបន្តិចបន្តួចក្តី ក៏យ៉ាងហោចណាស់ រដ្ឋាភិបាលបានបន្ធូរបន្ថយពន្ធដារពីពលរដ្ឋនិងក្រុមហ៊ុនបានខ្លះ។ សូមបញ្ជាក់ថា កាលពីដើមអាណត្តិ នៅឆ្នាំ២០១២ រដ្ឋាភិបាលរបស់លោកប្រធានាធិបតីបារាំង ហ្វ្រង់ស័រ ហូឡង់ បានដំឡើងពន្ធដារយ៉ាងខ្លាំង ជាហេតុធ្វើឱ្យគ្រប់គ្នាបាក់ទឹកចិត្ត ស្អប់រដ្ឋាភិបាល។ ក្នុងឆ្នាំបន្តបន្ទាប់មកទៀត ពន្ធដារលែងឡើង តែប្រជាប្រិយភាពប្រធានាធិបតី មិនបានប្រសើរទេ។ ពលរដ្ឋបារាំងបីភាគបួននៅតែយល់ថាលោកហ្វ្រង់ស័រ ហូឡង់ជាប្រធានាធិបតីមិនល្អ។ នេះបើតាមការស្ទង់មតិកាលពីថ្ងៃអង្គារ។ ហើយក្រៅអំពីពន្ធដារ អសមត្ថភាពរបស់រដ្ឋាភិបាលក្នុងការបញ្ចុះអត្រាអ្នកអត់ការងារធ្វើក៏ជាបុព្វហេតុនាំឱ្យលោកហូឡង់ អប្រជាប្រិយភាពដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ