FIFA ព្យួរ តំណែងលោក Blatter និង លោក Platini រយៈពេល៣ខែ
គណៈកម្មការពិសេសដែលមានតួនាទីពិនិត្យក្រមសីលធម៌ ផ្ទៃក្នុងរបស់សហព័ន្ធកីឡាបាល់ទាត់ពិភពលោកFIFA ទើបបានសម្រេច កាលពីថ្ងៃព្រហស្បតិ៍ ម្សិលមិញ ដោយបានព្យួរមុខតំណែងលោក ហ្សូហ្សិប ប្លាធឺ អគ្គនាយក FIFA បច្ចុប្បន្ន ព្រមទំាងលោក មីឈែល ប្លាទីនី ប្រធានសហព័ន្ធកីឡាបាល់ទាត់អឺរ៉ុប ជាបណ្តោះអាសន្ន រយៈពេល ៣ខែ។ សេចក្តីសម្រេចនេះ បានធ្វើឲ្យគេ មានការភ្ញាក់ផ្អើលជាខ្លាំង ព្រោះវានឹងរារាំងដោយប្រយោល មិនឲ្យលោក មីឈែល ប្លាទីនី អាចឈរឈ្មោះបោះឆ្នោត សម្រាប់ការជ្រើសរើសប្រធានFIFA ថ្មីបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ព្យុះភ្លៀង នៅក្នុងសហព័ន្ធកីឡាបាល់ទាត់ពិភពលោក នៅមិនទាន់ស្ងប់ទេ ផ្ទុយទៅវិញ វាកំពុងតែបោកបក់ កាន់តែខ្លាំង ដោយសារតែសេចក្តីសម្រេចរបស់គណៈកម្មការក្រមសីលធម៌ កាលពីថ្ងៃព្រហស្បតិ៍ ទី ៨តុលា ដែលបានសម្រេចព្យួរមុខតំណែងបណ្តោះអាសន្ន លើថ្នាក់ដឹកនាំជាច្រើនរូប ក្នុងនោះ រួមមានលោក ហ្សូហ្សិប ប្លាធឺ ប្រធានFIFA បច្ចុប្បន្ន និង លោក មីឈែល ប្លាទីនី ប្រធានសហព័ន្ធកីឡាបាល់ទាត់អឺរ៉ុប។
ក្រៅពីមនុស្ស ដ៏សំខាន់ទាំងពីរនាក់នេះ FIFA ក៏បានព្យួរ លោក ហ្សេរ៉ូម វាល់កឺ បុរសខ្លាំងទីពីរ និងជាដៃស្តាំរបស់លោក ប្លាធឺ ផងដែរ។ ប៉ុន្តែអ្នកដែលរងទោសធ្ងន់ជាងគេ គឺ លោក ឈុន មុងជុន ជនជាតិកូរ៉េ អតីតអនុប្រធាន FIFA ដែលត្រូវបាន គណកម្មការនេះ លុបឈ្មោះចោលរយៈពេល៦ឆ្នាំ។
សូមបញ្ជាក់ថា លោកហ្សូហ្សិប ប្លាធឺ កំពុងតែត្រូវបានតុលាការស្វីសចោទប្រកាន់ជាផ្លូវការ ពីករណីពុករលួយ ស៊ីសំណូកជាច្រើនករណី។ ចំណែកលោក ប្លាទីនី ក៏មិនទាន់រួចខ្លួនផងដែរ ដោយសារតុលាការកំពុងបើកការស៊ើបអង្កេត ស្តីពីករណី ទទួលប្រាក់២លានហ្រ្វង់ស្វីស ដោយខុសច្បាប់។ ទោះបីជាលោក ប្លាទីនី អះអាងថាមានភស្តុតាងគ្រប់គ្រាន់ បញ្ជាក់ពីភាពស្អាតស្អំរបស់លោកក៏ដោយ ក៏ការសម្រេចព្យួរមុខតំណែងរបស់លោកនាពេលនេះ នឹងបង្ករជាឧបសគ្គថ្មីមួយទៀតសម្រាប់លោក ក្នុងការដាក់បែបបទ ឈរជាបេក្ខភាពប្រធាន FIFA ក្នុងអាណត្តិថ្មី។
ការព្យួរមុខតំណែងនេះ គឺមានន័យថា បុគ្គលពាក់ព័ន្ធ ត្រូវបានហាមឃាត់ មិនឲ្យធ្វើសកម្មភាព រឺការងារណា ដែលពាក់ព័ន្ធនឹងកីឡាបាល់ទាត់ មិនថានៅថ្នាក់ជាតិ រឺអន្តរជាតិ ក្នុងរយៈពេលកំណត់ ពោលគឺ ៩០ថ្ងៃ ហើយអាចបន្ត ៤៥ថ្ងៃបន្ថែមទៀត បើសិនជាចាំបាច់។ ក្នុងន័យនេះ បើសិនជា គ្មានសេចក្តីសម្រេចថ្មីណាមួយ ឲ្យបានមុន ថ្ងៃ ២៦តុលា ថ្ងៃផុតកំណត់ ដាក់បេក្ខភាពឈរឈ្មោះ នោះមានន័យថា លោកប្លាទីនី នឹងមិនអាចឈរឈ្មោះបោះឆ្នោតជាប្រធាន FIFA ទេ។
សម្រាប់ពេលនេះ គឺលោកអ៊ីសា ហាយ៉ាទូ ប្រធានសហព័ន្ធកីឡាបាល់ទាត់ទ្វីបអាហ្វ្រិក ត្រូវកាន់មុខតំណែងប្រធាន FIFA បណ្តោះអាសន្នសិន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ