សហភាពអឺរ៉ុប ប្រយុទ្ធប្រឆាំងនឹងការរើសអើងតាមអ៊ីនធ័រនែត
រដ្ឋមន្ត្រីក្រសួងយុត្តិធម៌នៃបណ្តាប្រទេសជាសមាជិកសហភាពអឺរ៉ុបទាំងអស់ កំពុងជួយប្រជុំគ្នា នៅថ្ងៃសុក្រនេះ នៅប្រទេសលុចសំបួរ ដើម្បីរិះរកមធ្យោបាយទប់ស្កាត់ការរើសអើងតាមប្រព័ន្ធអ៊ីនធ័រនែត។ ប្រឈមនឹងវិបត្តិអន្តោប្រវេសន៍ដ៏គំហុកមិនធ្លាប់ អឺរ៉ុបពេលនេះ កំពុងព្រួយបារម្ភយ៉ាងខ្លាំងនឹងការរីករាលដាល នៃពាក្យ និងសារញុះញង់ ឱ្យមានការរើសអើង និងស្អប់ខ្ពើមពូជសាសន៍ តាមប្រព័ន្ធសង្គមផ្សេងៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
“យើងសង្កេតឃើញមានពាក្យសំដី និងសារស្អប់ខ្ពើម បែបឧក្រិដ្ឋផង លើប្រព័ន្ធសង្គម” នេះជាប្រសាសន៍របស់រដ្ឋមន្ត្រីក្រសួងយុត្តិធម៌អាល្លឺម៉ង់ Heiko Maas ពេលទៅដល់ប្រទេសលុចសំបួរ។ លោកMass ត្រូវធ្វើរបាយការណ៍មួយ ប្រាប់សមភាគីអឺរ៉ុប អំពីកិច្ចពិភាក្សារបស់អាល្លឺម៉ង់ជាមួយបណ្តាញសង្គមហ្វេសប៊ូក និងបណ្តាញវិបសៃតិ៍ផ្សេងទៀត ព្រមទាំងអំពីវិធានការរបស់អាល្លឺម៉ង់ ក្នុងប្រយុទ្ធប្រឆាំងនឹងអ្វីដែលជាបញ្ហារបស់អឺរ៉ុបទាំងមូល។
“អំពាវនាវឱ្យស្អប់ខ្ពើម ឱ្យសម្លាប់ ជនភៀសខ្លួន ឬដុតជនជាតិអ៊ីស្រាអែល...” ទាំងនេះមិនមែនជាសេរីភាពនៃការបញ្ចេញមតិទេ ! គឺជាអំពីឧក្រិដ្ឋដែលត្រូវផ្តន្ទាទោសតាមច្បាប់ ! នេះជាការអះអាងរបស់រដ្ឋមន្ត្រីក្រសួងយុត្តិធម៌អាល្លឺម៉ង់ដដែល ដោយថែមទាំងបានសម្តែងការសោកស្តាយថា Facebook Google Youtube Twitter ត្រូវតែមានទំនួលខុសត្រូវ លុបចោលនូវរាល់ពាក្យសំដីឃ្លាឃ្លោងញុះញង់ឱ្យមានការរើងអើងនិងស្អប់ខ្ពើមគ្នា។ ហ្វេសប៊ូកអាចលុបអស់រូបភាពអាសអាភាសអាណាចារលើកុមារបាន ហេតុអ្វីមិនអាចលុបពាក្យញុះញង់គ្នាមិនបាន។
កាលពីខែមុន ក្នុងខណៈដែលអាល្លឺម៉ង់ទទួលជនភៀសខ្លួនយ៉ាងច្រើនសន្ធឹកសន្ធាប់ ក្រោមក្រសែភ្នែកក្តៅក្រហាយនិងរិះគន់ពីសំណាក់ក្រុមអ្នកជាតិនិយមជ្រុល ហ្វេសប៊ូកសន្យាថានឹងធ្វើការប្រយុទ្ធប្រឆាំងនឹងរាល់គ្រប់ទម្រង់នៃសារខំម៉ិនដែលមានលក្ខណៈប្រកាន់ពូជសាសន៍ជាភាសាអាល្លឺម៉ង់ចោល។
សម្រាប់ស្នងការអឺរ៉ុបទទួលបន្ទុកផ្នែកយុត្តិធម៌ គេត្រូវតែបែងចែកឱ្យដាច់រវាង ពាក្យសំដី ឃ្លាឃ្លោងញុះញង់ឱ្យមានការស្អប់ខ្ពើម ដែលមានអាចទទួលយកបានសោះ និងសេរីភាពនៃការបញ្ចេញមតិ ដែលជាតម្លៃគ្រឹះជាមូលដ្ឋានរបស់អឺរ៉ុប។
យ៉ាងណាក៏ដោយ សម្រាប់បារាំង គឺដល់វេលាដែលអឺរ៉ុបត្រូវផ្ទៀងផ្ទាត់ ធ្វើច្បាប់ឱ្យស៊ីសង្វាក់ ថ្នាក់អឺរ៉ុបតែម្តង ទើបមានប្រសិទ្ធិភាព ភាពតឹងតែង និងការពារជនរងគ្រោះបានស្មើគ្នាពេញផ្ទៃអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ