បោះឆ្នោតប្រធានាធិបតីនៅបេឡារុស្ស៊ី អាណត្តិទីប្រាំរបស់លោក លូកាឆិនកូ
ថ្ងៃអាទិត្យ ទី ១១ តុលានេះ ប្រជាជនបេឡារុស្ស៊ី ត្រូវទៅកាន់បន្ទប់បោះឆ្នោត ដើម្បី ជ្រើសរើស ប្រធានាធិបតី អាណត្តិ ថ្មី។ លោកប្រធានាធិបតីចប់អាណត្តិ អាឡិចសង់ដ្រ៍ លូកាឆិនកូ បាន ឈរ ឈ្មោះ សម្រាប់ អាណត្តិ ទី៥ របស់ ខ្លួន ម្តងទៀត។ តាមការរំពឹងទុក លទ្ធផលវានឹងមិនធ្វើឲ្យគេភ្ញាក់ផ្អើលទេ ដោយសារលោក លូកាឆិនកូ អាច នឹងជាប់ឆ្នោតជាថ្មីម្តងទៀត ព្រោះគ្រប់យ៉ាងត្រូវបានរៀបចំ ដើម្បី ឲ្យ លោក បន្តក្តោបក្តាប់អំណាច ដោយគ្មានបារម្ភ ព្រោះក្រុមគណបក្សប្រឆាំង ត្រូវបានគេហាមឃាត់មិនឲ្យចូលរួមបោះឆ្នោតទេ។ ការបោះឆ្នោតនេះដែរ ក៏គឺជាការកំណត់វាសនារបស់ប្រទេសបេឡារុស្ស៊ី ថាត្រូវបោះដៃទៅចាប់អ្នកណា រវាងសហភាពអឺរ៉ុប និងមហាយក្សរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:០៣
ប្រទេសបេឡារុស្ស៊ី កន្លងមកមិនសូវជាមានគេដឹងឮច្រើនទេ ដោយសារប្រទេសនេះវាស្ថិតនៅក្នុងម្លប់របស់រុស្ស៊ី។ សម្រាប់សហភាពអឺរ៉ុប គេហៅប្រទេសនេះថា ជាប្រទេសផ្តាច់ការ អតីតកូនចៅរបស់សហភាពសូវៀត ដែលនៅសល់ចុងក្រោយគេនេះ នៅទ្វីបអឺរ៉ុបសព្វថ្ងៃ។ លោក ប្រធានាធិបតី អាឡិចសង់ដ្រ៍ លូកាឆិនកូ កាន់ដំណែងតាំងពីឆ្នាំ ១៩៩៤មក ហើយបោះឆ្នោតអាណត្តិថ្មីនេះ គឺជាអាណត្តិទី៥ហើយ។
លោកលូកាឆិនកូ ផ្អែម តែផ្តាច់ការ៖
លោកស្រី ស្វេតឡាណា អាឡិចស៊ីវិឆ ជនជាតិបេឡារុស្ស៊ី ដែល ជាជ័យលាភីណូបែល អក្សសិល្ប៍ ឆ្នាំ២០១៥នេះ បានហៅរបបរបស់លោក ប្រធានាធិបតីលូកាឆិនកូ ថា ជារបស់ផ្អែម តែផ្តាច់ការ។ ផ្អែមយ៉ាងម៉េច?គឺថា រដ្ឋាភិបាល លោក លូកាឆិនកូ ធ្វើគ្រប់យ៉ាង ដើម្បីទិញទឹកចិត្តប្រជាជន ដោយយកលេសថា ដោយសារគេហើយ ទើបមានសន្តិភាព។
បន្តែនៅពីក្រោយខ្នង របបនេះ បានចាប់អ្នកប្រឆាំង បំបិទមាត់សម្លេងរិះគន់ទាំងអស់។ ជាក់ស្តែង ការបោះឆ្នោតអាណត្តិមុន កាលពីឆ្នាំ ២០១០ រដ្ឋាភិបាលលោក លូកាឆិនកូ បានប្រើធម៌ក្តៅ ចាប់ក្រុមសកម្មជនគណបក្សប្រឆាំង ប្រហែល៧០០នាក់ ដាក់ឃុំ។ ផ្អែមម្យ៉ាងទៀត គឺផ្អែមត្រង់ថា លោកលូកាឆិនកូ ចេះយកចិត្តទាំងសហភាពអឺរ៉ុប ទាំងខាងរុស្ស៊ី។
ប្រកួតតែម្នាក់ឯង ឈ្នះតែម្នាក់ឯង៖
សម្រាប់ការបោះឆ្នោតអាណត្តិថ្មីនេះ ក្រៅពីលោកលូកាឆិនកូ គឺមានបេក្ខជនបីផ្សេងទៀត ដែលតាមការសន្និដ្ឋាន មិនសូវមានគេស្គាល់ទេ។ ពោលគឺគេដាក់ឈ្មោះមក ដើម្បីឲ្យគ្រាន់តែល្អមើលប៉ុណោ្ណះ។ មានបេក្ខជនម្នាក់ដែរ ដែលគេសង្កេតឃើញថា បានធ្វើការឃោសនាបោះឆ្នោត រាងសកម្ម គឺលោកស្រី តាត្យ៉ាណា កូរ៉ូកឺវិឆ អាយុ៣៨ឆ្នាំ។ បើតាមការស្ទាបស្ទង់ស្ថិតិ លោកស្រីអាចបានសម្លេងឆ្នោត ប្រហែល១៨%។ ផ្ទុយទៅវិញ សកម្មជនខាងបក្សប្រឆាំង ដែលមានការគាំទ្រច្រើននោះ ត្រូវបានគេហាមឃាត់ មិនឲ្យឈរឈ្មោះទេ។ គណកម្មការរៀបចំការបោះឆ្នោត បានធ្វើគ្រប់មធ្យោបាយ ដើម្បីរារាំង ក្រុមគណបក្សប្រឆាំង មិនឲ្យឈរឈ្មោះបាន។ ដូច្នេះហើយ បានជាគណបក្សប្រឆាំង បានធ្វើពហិកា មិននាំគ្នាទៅបោះឆ្នោត។
សកម្មជនគណបក្សប្រឆាំងដ៏ល្បីម្នាក់ឈ្មោះ មីកូឡា ស្តាតកឺវិឆ ដែលទើបត្រូវគេដោះលែងពីគុក កាលពីខែសីហាកន្លងទៅ ក៏ត្រូវបានគេបដិសេធមិនឲ្យឈរឈ្មោះដែរ។ សកម្មជនប្រឆាំងរូបនេះ បានបញ្ជាក់ដែរថា តាមពិតការធ្វើពហិកា វាគឺជាយុទ្ធសាស្ត្រមួយទន់ជ្រាយ ក៏ប៉ុន្តែលោកថា តើទៅបោះឆ្នោតមានន័យអ្វី បើខាងគណបក្សប្រឆាំង គ្មានបេក្ខជនរបស់ខ្លួនសូម្បីតែម្នាក់។ តើឲ្យប្រជាជនបោះឲ្យអ្នកណា? វាច្បាស់ណាស់ ដែលថា លោក ប្រធានាធិបតី លូកាឆិនកូ នឹងជាប់ឆ្នោតម្តងទៀត។
រុស្ស៊ី រឺសហភាពអឺរ៉ុប? លូកាឆិនកូ ជើងមួយជាន់ទូកពីរ៖
ទាក់ទិន នឹងចំណុចនេះ គឺយើងសង្កេតឃើញថា នយោបាយរបស់លោក លូកាឆិនកូ ហាក់កំពុងតែផ្លាស់ប្តូរ ក៏ប៉ុន្តែមានការប្រុងប្រយត្ន័។ បើនិយាយទៅ គឺថាវាជាជម្រើសមួយ ដែលត្រូវតែធ្វើដោយប្រថុយប្រថានណាស់ ព្រោះថា បេឡារុស្ស៊ី បានឃើញគម្រូរបស់អ៊ុយក្រែន រួចមកហើយ។ ដោយសារតែអ៊ុយក្រែន រត់ទៅឱបជើងសហភាពអឺរ៉ុប នឹងហើយ បានជារុស្ស៊ី ចាប់ខោក ស្ទើរស្លាប់ស្ទើររស់។ ហើយបេឡារុស្ស៊ី ក៏មិនសូវជាសង្ឃឹមដែរ ថាពេលមានការអីទៅ តើសហភាពអឺរ៉ុប មានកម្លាំងគ្រប់គ្រាន់ មកជួយការពារខ្លួនរឺអត់។
តាំងពីដើមមក លោកលូកាឆិនកូនេះ តែងតែព្យាយាមនៅកណ្តាល ឯករាជ្យ ហើយក្រេបយកផលចំណេញទាំងសងខាង។ ជាឧទាហរណ៍ ទាក់ទិននឹងសង្រ្គាមនៅភាគខាងកើតអ៊ុយក្រែន លោកលូកាឆិនកូ បានធានាខ្លួនជាប្រទេសម្ចាស់ផ្ទះ ដោយយកទីក្រុងមីនស្គ៍ ជាកន្លែងចរចាសន្តិភាពនៅអ៊ុយក្រែន។ ក្នុងសំណុំរឿងអ៊ុយក្រែនដដែលនេះ យើងសង្កេតឃើញថា លោកលូកាឆិនកូ មានទំនោរទៅកាន់អឺរ៉ុបជាងទៅខាងរុស្ស៊ី ដោយសារ លោកលូកាឆិនកូ បានចេញមុខប្រឆាំងទៅនឹងការឈ្លានពានតំបន់គ្រីម៉េ ដែលរុស្ស៊ីលើកទ័ព ទៅដណ្តើមពីអ៊ុយក្រែន កាលពីឆ្នាំទៅ។
ហើយថ្មីៗចុងក្រោយនេះ រុស្ស៊ីបានស្នើទៅបេឡារុស្ស៊ី ថាសុំធ្វើសហប្រតិបត្តិការយោធា ដោយបើកដែនអាកាស ឲ្យយន្តហោះចម្បាំងរុស្ស៊ីហោះកាត់ ហើយនឹងបង្កើតមូលដ្ឋានយោធារុស្ស៊ីមួយ នៅបេឡារុស្ស៊ី។ សំណើរទាំងនេះ ត្រូវលោក លូកាឆិកូ បដិសេធទាំងអស់។ តាមរយៈគោលជំហរនេះ លោកលូកាឆិនកូ ចង់បង្ហាញថា លោកមិនមែនជាអាយ៉ងរបស់រុស្ស៊ីទេ ហើយរដ្ឋាភិបាលលោក មាននយោបាយអព្យាក្រិត្យ ត្រឹមត្រូវ។
ដើរចេញពីរុស្ស៊ី ដូចផ្កាប់ឆ្នាំងបាយខ្លួនឯង៖
ការនាំចូលស្ទើរតែទាំងស្រុង នៅបេឡារុស្ស៊ី គឺរំពឹងលើផលិតផលរបស់រុស្ស៊ី ជាពិសេសគឺវត្ថុធាតុដើមសំខាន់ៗ ដូចជាឧស្ម័នហ្គាស និងប្រេងឥន្ធនៈជាដើម។ ការនាំចេញនាំចូល ជាមួយរុស្ស៊ី វាសំខាន់មួយហើយ តែមួយទៀត គឺលុយឥណទាន រឺប្រាក់កម្ចី ដែលរុស្ស៊ីផ្តល់ឲ្យរៀងរាល់ឆ្នាំ ឲ្យរដ្ឋាភិបាលរបស់លូកាឆិនកូ។ ពោលគឺដូចជារុស្ស៊ីព្យួរសេរូមឲ្យអញ្ចឹង។
ក៏ប៉ុន្តែឆ្នាំ២០១៥នេះ រុស្ស៊ីមានបញ្ហាដែរ ដោយសារតែទណ្ឌកម្ម ពីសំណាក់សហភាពអឺរ៉ុប ទាក់ទិននឹងសង្រ្គាមអ៊ុយក្រែន។ ឆ្នាំនេះ រុស្ស៊ីបានផ្តាច់ជំនួយ ទីមួយដោយសារគេអត់លុយដែរ ហើយទីពីរគឺគេចង់ធ្វើបាបបេឡារុស្ស៊ី ដែលមិនព្រមធ្វើតាមគេបង្គាប់។ លោក អាឡិចសង់ដ្រ៍ ឈូព្រីក សេដ្ឋវិទូបេឡារុស្ស៊ីម្នាក់បញ្ជាក់ថា ឆ្នាំ២០១៥នេះ រដ្ឋអត់មានសល់លុយក្នុងរតនាគារទេ។ ហើយនេះ ក៏ជាសញ្ញាមួយអាសន្នសម្រាប់ លោកលូកាឆិនកូ បើសិនជាលោកចង់បន្ត ទិញទឹកចិត្តប្រជាជន មិនឲ្យគេបះបោរ គឺត្រូវរកវិធីយ៉ាងណា រកប្រាក់ឲ្យគ្រប់គ្រាន់ ដើម្បីធានាឲ្យមានសេវាសាធារណៈ។
លូកាឆិនកូ កំពុងតែកាច់ចង្កូត បត់ទៅរកសហភាពអឺរ៉ុប៖
ក្នុងបរិបទដែលរុស្ស៊ី ធ្វើបាប យើងសង្កេតឃើញថា លោក លូកាឆិនកូ ដូចជាចាប់ផ្តើម មើលឃើញគ្រោះថ្នាក់ បើសិនជានៅតែតាំងចិត្តនៅកណ្តាល មិនព្រមខិតទៅជិតសហភាពអឺរ៉ុប។ កាលពីឆ្នាំ២០១០ ក្រោយហេតុការណ៍ហឹង្សា ចាប់អ្នកប្រឆាំងដាក់គុក ខាងសហភាពអឺរ៉ុប បានដាក់ចេញជាទណ្ឌកម្មសេដ្ឋកិច្ចជាច្រើន ទៅលើបេឡារុស្ស៊ី។ លោកលូកាឆិនកូ ក៏គេសង្កេតឃើញថា ប្រឹងបន្ទន់ឥរិយាបថច្រើនដែរដើម្បីយកចិត្តសហភាពអឺរ៉ុប តួយ៉ាង តាមរយៈ ការដោះលែងសកម្មជនប្រឆាំង៦នាក់ កាលពីខែសីហាកន្លងទៅ។
តាមការស្មាន សហភាពអឺរ៉ុប កំពុងតែស្ទាក់ស្ទើរ ថាត្រូវដកទណ្ឌកម្មចេញវិញរឺអត់ ដើម្បីអូសបេឡារុស្ស៊ី ឲ្យមកនៅខាងខ្លួនវិញ ឆ្លៀតពេលដែលប្រទេសនេះកំពុងតែត្រូវការជំនួយ។ បើអឺរ៉ុបបើកផ្លូវ នោះបេឡារុស្ស៊ី និងមានលទ្ធភាពរកប្រាក់ឥណទាន ពី មូលនិធិរូបិយវត្ថុអន្តរជាតិ ហើយអ្នកវិនិយោគ ក៏ដោយមកទៅតាមនឹងដែរ។
យ៉ាងណាក៏ដោយ អាណត្តិទី៥ របស់លោក លូកាឆិនកូ គឺលោកសង្ឃឹមឈ្នះយ៉ាងស្រួល ក៏ប៉ុន្តែឈ្នះហើយ មិនប្រាកដថាស្រួលទេ ព្រោះរុស្ស៊ី ប្រាកដជាមិនទុកបេឡារុស្ស៊ី ឲ្យនៅបានសុខទេ បើសិនជាប្រទេសនេះហ៊ាន តែក្បត់រុស្ស៊ីពេញមុខ បត់ក្បាលទៅខាងអឺរ៉ុប។ គ្រោះថ្នាក់ នៅមានតទៅទៀត សម្រាប់លោក លូកាឆិនកូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ