រុស្ស៊ី ៖ យន្តហោះបានបែកខ្ចាយជាបំណែកៗ តាំងពីក្នុងអាកាសម៉្លេះ
មុនធ្លាក់ដល់ដី នៅខេត្តស៊ីណៃខាងជើងនៃប្រទេសអេហ្ស៊ីប កាលពី២ថ្ងៃមុន យន្តហោះរុស្ស៊ី បានបែកខ្ចាយជាបំណែកៗតាំងពីក្នុងអាកាសនៅកំពស់ខ្ពស់ ម៉្លោះហើយបានជា បំណែកៗទាំងនោះ សាចទៅលើផ្ទៃដីដល់ជាង ២០ គីឡូម៉ែត្រក្រឡាឯណោះ - សេចក្តីសន្និដ្ឋាននេះ ធ្វើដោយប្រធានក្រុមអង្កេតរុស្ស៊ី ដែលបានទៅឃើញ កន្លែងធ្លាក់នោះដោយផ្ទាល់ភ្នែក។ មកពីមូលហេតុនេះ បានជាគាត់មិនបដិសេធឡើយ អំពីការបកស្រាយ ដែលមានធ្វើឡើង ជុំវិញសោកនាដកម្មនេះ ដែលបានផ្តាច់ជីវិតអ្នកដំណើរក្នុងយន្តហោះ ទាំង២២៤នាក់។
ចុះផ្សាយនៅថ្ងៃ៖
ស្តាប់ - ០២:១៦
ប្រធានក្រុមអង្កេត ដែលជានាយកប្រតិបត្តិ នៃ គណៈកម្មាធិការអាកាសចរណ៍អន្តររដ្ឋ លោក Victor Sorochenko ក្រោយពីបានឃើញកន្លែងធ្លាក់នៃយន្តហោះរុស្ស៊ី ដោយផ្ទាល់ភ្នែក បានថ្លែងទៅពួកអ្នកកាសែតថា ៖ កន្លែងដែលបំណែកៗរបស់យន្តហោះនោះ បែកសាចលើដី មានរាងជាពងក្រពើ បណ្តោយដល់ទៅ៨គ.ម. និង ទទឹង ៤គ.ម. គឺ ក្នុងផ្ទៃក្រឡា ដល់ទៅជាង ២០គ.ម.ការ៉េ ហេតុដែលសឲ្យឃើញថា តួយន្តហោះ មុនធ្លាក់ដល់ដី បានបែកសាចជា បំណែកៗ តាំងពីនៅក្នុងអាកាសកំពស់ខ្ពស់។
ទីភ្នាក់ងារពត័មានផ្លូវការរុស្ស៊ី Itar-Tass យោងទៅលើប្រភពខ្លួន ផ្សាយថាយន្តហោះនោះ មិនគ្រាន់តែបែកសាចតួខ្លួនវាជាបំណែកៗប៉ុណ្ណោះទេ ប៉ុន្តែថែមទាំងអាចឆេះក្នុងអាកាសទៀតផង។
តាមលោកប្រធានក្រុមអង្កេត នៅពីមុខស្ថានការណ៍ថ្មី គប្បីតែលើកយកមកពិនិត្យមើល ដោយកុំរំលងឡើយ គ្រប់តែសេណារីយ៉ូ នៃការបកស្រាយជុំវិញសោកនាដកម្មនេះ។
កាសែតក្រុងម៉ូស្គូ Kommersant លេខថ្ងៃនេះ ចុះផ្សាយសេណារីយ៉ូ ៣ បកស្រាយដោយពួកអ្នកជំនាញពាក់ព័ន្ធនឹងការបែកបាក់តួខ្លួនយន្តហោះ តាំងពីនៅក្នុងអាកាសម៉្លេះ គឺថា ៖
ទី១- មិនអាចបដិសេធឡើយ អំពីការផ្ទុះដែលមានកម្លាំងខ្សោយ ក្នុងឥវ៉ាន់ដែលគរទុក ក្នុងបន្ទប់វ៉ាលីសរបស់យន្តហោះ។ គេលើកជាឧទាហរណ៍គឺការផ្ទុះក្នុងយន្តហោះ Boeing-747 ក្រុមហ៊ុន អាកាសចរណ៍អាមេរិកាំង Pan American ក្នុងអាកាសលើទីប្រជុំជនអង់គ្លេស Lockerby កាលក្នុងឆ្នាំ១៩៨៨។ ក្រោយពីអង្កេតអស់៣ឆ្នាំ ទៅលើគ្រប់បំណែកទាំងអស់របស់យន្តហោះ ទើបគេបានរកឃើញថា នៅត្រង់បំណែកមួយ មានប្រហោង ប៉ុនផ្លែឪឡឹក ដែលបណ្តាលមកពី ការផ្ទុះនៃគ្រាប់បែកមួយតូច លាក់ទុកដោយភេរវជន ជាតិលីប៊ី ក្នុងកូនរ៉ាដ្យ៉ូ នៅក្នុងវ៉ាលីស នៃបន្ទប់សម្រាប់រក្សាទុកឥវ៉ាន់ របស់អ្នកធ្វើដំណើរ។
ទី២- អាចមកពីតួខ្លួនយន្តហោះ សឹករិល ហើយបណ្តាលឲ្យមានស្នាមប្រេះ។ គេចាប់អារម្មណ៍ថា យន្តហោះ Airbus 321 នោះ កាលក្នុងឆ្នាំ២០០១ ពេលចុះចតនៅក្រុង Caire បានថ្លោះធ្លោយ ឲ្យ កន្ទុយវាបុកប៉ះដី។
ទី៣-មកពីម៉ូទ័រវា ដើរខុសទាស់ ហើយប៉ែលយន្តរបស់ម៉ូទ័រ ដែលវិលដោយល្បឿនសែនខ្លាំង ស្រាប់តែកាត់ចៀរមុនដំបូងគឺស្លាបយន្តហោះ រួចបន្ទាប់មក តួខ្លួនវា តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ