យានអវកាស Soyouz នាំអ្នកអាវកាស៣រូប ត្រឡប់មកវិញដោយសុវត្ថិភាព
អ្នកអវកាសបីរូប ម្នាក់ជាជនជាតិរុស្ស៊ី ម្នាក់ជាជនជាតិអាមេរិក និងម្នាក់ទៀតជាជនជាតិជប៉ុន បានត្រឡប់ចុះចត មកដល់ភពផែនដីយើងវិញ ដោយសុវត្ថិភាព នៅថ្ងៃព្រហស្បតិ៍ ម្សិលមិញ បន្ទាប់ពីបានបំពេញបេសកកម្ម នៅឯស្ថានីយអវកាសអន្តរជាតិ ដែលស្ថិតនៅលើខ្សែអកប៊ីត ផែនដី ក្នុងលំហអាកាស អស់រយៈពេល ១៤១ថ្ងៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ក្បាលកាប់ស៊ុល របស់យានអវកាស Soyouz បានហោះមកដល់ផែនដីវិញ ដោយសុវត្ថិភាព ដោយបាននាំត្រឡប់មកវិញ នូវអ្នកវិទ្យាសាស្ត្រអវកាសបីរូប។ យាននេះ បានត្រឡប់មកដល់ផែនដី យើងនៅវេលាម៉ោង ១៩ និង ១៨នាទី យប់ នៅលើតំបន់ដីវាល ក្នុងប្រទេសកាហ្សាក់ស្ថាន។ ការចុះចតមកដល់ក្នុងពេលយប់របៀបនេះ គឺជាការចុះចតដោយកម្រ ហើយដែលទាមទារឲ្យក្រុមការងារ មានការប្រុងប្រយ័ត្នខ្ពស់។
ក្នុងចំណោមអ្នកអវកាសទាំងបីនាក់ គឺមានជនជាតិរុស្ស៊ី ឈ្មោះ Oleg Kononenko ដែលជាមេបញ្ជាការបេសកកម្ម ជនជាតិអាមេរិក ឈ្មោះ Kjell Norwood Lindgren អ្នកអវកាសជនជាតិជប៉ុន ឈ្មោះ Kimiya Yui។ សម្រាប់អ្នកអវកាសទាំងពីរនាក់ចុងក្រោយនេះ គឺជាលើកទីមួយសម្រាប់ពួកគេ ដែលបានចេញទៅធ្វើបេសកកម្មនៅ ស្ថានីយ៍អវកាសអន្តរជាតិ ហៅកាត់ថា ISS។
ក្រុមអ្នកអវកាសទាំងបីនាក់នេះ បានហោះទៅកាន់ស្ថានីយ៍ ISS កាលពីថ្ងៃទី២៣ កក្កដា ដើម្បីបំពេញបេសកកម្មដែលមានរយៈពេល១៤១ថ្ងៃ។ ក្នុងអំឡុងពេលបេសកកម្មនេះ ក្រុមការងារបានធ្វើការសាកល្បង បទពិសោធន៍វិទ្យាសាស្ត្រជាច្រើនចំណុច ដើម្បីឈានទៅ ធ្វើការបញ្ជារម៉ាស៊ីនរ៉ូបូ ពីចម្ងាយ ដោយមិនចាំបាច់ចាំចេញពីស្ថានីយ៍អវកាសអន្តរជាតិ។ ក្រៅពីនេះ អ្នកអវកាសដែលជាជនជាតិរុស្ស៊ី ហើយដែលធ្លាប់ ចេញទៅធ្វើបេសកកម្មនៅលំហអាកាសច្រើនលើកមកហើយនោះ បានសន្យាជាមួយអ្នកនិយមតាមដានស្វែងយល់ ពីលំហអាកាស ថានឹងធ្វើការពិសោធន៍ លើចរិកលក្ខណៈ នៃពពុះសាប៊ូ នៅពេលដែលវានៅក្នុងលំហអាកាស។
ស្ថានីយ៍អវកាសអន្តរជាតិ ត្រូវបានស្ថាបនាឡើង និងបាញ់បង្ហោះ យកទៅដាក់ ស្ថិតនៅពីលើខ្សែOrbite របស់ផែនដី។ ដោយមានការចូលរួមជាពិសេស របស់រុស្ស៊ី និងអាមេរិក ព្រមទាំងប្រទេស១៤ផ្សេងទៀត ស្ថានីយ៍ពិសោធន៍មួយ ត្រូវបានកសាងឡើង កាលពីឆ្នាំ ១៩៩៨ នៅលើស្ថានីយ៍នេះ ដោយចំណាយប្រាក់អស់១០០ពាន់លានដុល្លារ។ សំណង់ស្ថានីយ៍អវកាសនេះ ត្រូវបានស្ថាបនាឡើង ដោយតួខ្លួនសំខាន់ និងម៉ាស៊ីនបាញ់បង្ហោះ គឺជាស្នាដៃរបស់រុស្ស៊ី។
សូមបញ្ជាក់ផងដែរថា សព្វថ្ងៃនេះ មានតែយានអវកាស Soyouz របស់រុស្ស៊ីមួយគត់ ដែលនៅតែធ្វើបេសកកម្ម ទៅមក រវាងផែនដី និងស្ថានីយ៍អវកាសអន្តរជាតិ។ យានអវកាសអាមេរិក បានឈប់ដំណើរការទៅហើយ។ យានអវកាសរុស្ស៊ីនេះ មានតួនាទីដឹកជញ្ជូន អ្នកអវកាសអន្តរជាតិ និងគ្រឿងបរិក្ខាផ្សេងៗ សម្រាប់ដំណើរការស្ថានីយ៍អវកាសអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ