ភេរវកម្មនៅប៉ារីស បន្សល់ទុកនូវផលវិបាកសេដ្ឋកិច្ចធ្ងន់ធ្ងរនិងយូរខែ
ក្រុមហ៊ុនអាកាសចរណ៍ជប៉ុន បានប្រកាសនៅថ្ងៃអង្គារទី១៥ ធ្នូនេះ ផ្អាកជើងហោះហើរ ប៉ារីស-តូក្យូណារីតា មួយរយៈ ដោយហេតុតែក្រោយការវាយប្រហារភេរវកម្មអត្តឃាតជីហាតនៅប៉ារីស ការដឹកជញ្ជូនអ្នកដំណើរបានធ្លាក់ចុះខ្លាំងពេក។ ចំណែកនៅប៉ារីស ចំនួនអ្នកទេសចរ និងការធ្វើដំណើរតាមយន្តហោះ បានថយចុះគួរឱ្យព្រួយបារម្ភ។ សេដ្ឋកិច្ចបារាំង ពិសេសវិស័យត្រដររស់យ៉ាងលំបាកលំបិនបំផុត។
ចុះផ្សាយនៅថ្ងៃ៖
ស្តាប់ - ០២:០៤
ជប៉ុនដែលខ្លាចរអាបំផុតពាក្យថាអសន្តិសុខ មិនខា្លចនឹងសម្រេចចិត្តបែបជ្រុលនិយមទេ។ នៅថ្ងៃអង្គារនេះ ក្រុមហ៊ុនអាកាសចរណ៍ជប៉ុន Japan airlines បានប្រកាសផ្អាក ការហោះហើរប្រចាំថ្ងៃ ប៉ារីស-តូក្យូណារីតា ចាប់ពីថ្ងៃទី ១២មករា រហូតដល់ថ្ងៃទី ២៩កុម្ភៈ។
មូលហេតុ ក្រោយភេរវកម្មជីហាតនៅក្រុងប៉ារីស ការដឹកជញ្ជូនអ្នកដំណើរ ប៉ារីស-តូក្យូណារីតា បានធ្លាក់ចុះ អស់ ៦០% ប៉ារីស-តូក្យូហានេដា ៤០%។ ក្រុមហ៊ុនអាចនឹងប្តូរចិត្តវិញ នៅខែមីនា ប្រសិនបើស្ថានការណ៍ជាក់ស្តែង ដើមឆ្នាំ ២០១៦អនុគ្រោះ។
នេះគឺជាផលវិបាកមួយថ្មីបន្ថែមទៀតសម្រាប់ប៉ារីស ! ព្រោះសូមបញ្ជាក់ថា តាំងពីបានរងភេរវកម្មថ្ងៃទី ១៣វិច្ឆិកាមក ក្រុងប៉ារីសស្ងាត់ ទេសចររបេះរប៉ោះ ភោជនីដ្ឋានគ្មានមនុស្សចូល សណ្ឋាគារគ្មានអ្នកកក់ នៅក្នុងរយៈពេល១៥ថ្ងៃចុងក្រោយនៃខែវិច្ឆិកានេះ ចំនួនអ្នកមកទស្សនាក្រុងប៉ារីសបានថយចុះយ៉ាងខ្លាំង។
សកម្មភាពនៅអាកាសយានដ្ឋានប៉ារីសបានធ្លាក់ចុះ៦% ដោយមានអ្នកដំណើរតិចជាងឆ្នាំមុនដល់ជាង១សែន២ម៉ឺននាក់ បើប្រៀបក្នុងរយៈពេលដូចគ្នានៅឆ្នាំ២០១៤។ ពោលគឺជាធ្លាក់ចុះមិនធ្លាប់មានគិតចាប់ពីឆ្នាំ ២០១០ ក្រោយហេតុការណ៍ផ្ទុះភ្នំភ្លើងនៅអ៊ីស្លង់មក។ ឯការវាយប្រហារភេរវកម្មប្រឆាំងនឹងទស្សនាវដ្តីCharlie Hebdo កាលពីខែមករា បានប៉ះពាល់ចរាចរណ៍ផ្លូវអាកាសតែ០,១%ប៉ុណ្ណោះ។
កាន់តែគួរឱ្យកត់សម្គាល់ទៀតនោះ គឺគេគ្មានឃើញសញ្ញារើបឡើងវិញទេ។ ការកក់សំបុត្រធ្វើដំណើរពីបរទេសចូលក្រុងប៉ារីស នៅតែបន្តថយចុះជាលំដាប់ ក្នុងល្បឿន២៨%។ នេះបើតាមទិន្ន័យព័ត៌មានវិទ្យារបស់ក្រុមហ៊ុនទេសចរណ៍ពិភពលោក។
ថ្វីបើសន្និសីទអន្តរជាតិស្តីពីអាកាសធាតុ COP21 បាននាំភ្ញៀវអន្តរជាតិ អ្នកមុខអ្នកការ អ្នកជំនួញមកបំពេញសណ្ឋាគារប្រណិតៗ បានពីរសប្តាហ៍មែន ប៉ុន្តែចំនួនទេសចរបរទេសមានតិចតួចណាស់ និងបន្តធ្លាក់ចុះទៀតប្រមាណពី ៣០ទៅ៤០%នៅខែធ្នូ។ ខាងភោជនីដ្ឋានធ្លាក់ចុះជាមធ្យម២០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ