ទីផ្សារភាគហ៊ុន និង ទីផ្សារប្រាក់រូប្ល រុស្ស៊ីដាំដូង ជាមួយ ការធ្លាក់ចុះនៃតម្លៃប្រេង
ទីផ្សារហិរញ្ញវត្ថុរុស្ស៊ី បានធ្លាក់ចុះយ៉ាងខ្លាំង ថ្ងៃចន្ទម្សិលមិញ ដោយទ្រនិចលេខ នៃទីផ្សារភាគហ៊ុន RTS ក្រុងម៉ូស្គូ បានបាត់បង់តម្លៃអស់ ជាង៥% ចំណែកអត្រាប្រាក់រូប្ល បានធ្លាក់ចុះទាបបំផុត បើគិតក្នុងរយៈពេលជាង១ឆ្នាំចុងក្រោយ ធ្លាក់ចុះនេះគឺ ក្រោមឥទ្ធិពលធ្លាក់ចុះនៃទីផ្សារអាស៊ី និង នៃ តម្លៃប្រេងលើទីផ្សារពិភពលោក។
ចុះផ្សាយនៅថ្ងៃ៖
ស្តាប់ - ០២:១០
ភាពច្របល់នេះ ដែលកើតឡើងគឺនៅចំថ្ងៃចូលកងវិញ ក្រោយពីវិស្សមកាលអស់១០ថ្ងៃ ពាក់ព័ន្ធនឹងបុណ្យចូលឆ្នាំថ្មី និង បុណ្យណូអែលតាមគ្រិស្តសាសនាអ័រថូដុក្ស សម្រាប់ពលរដ្ឋរុស្ស៊ីជាច្រើន គឺបញ្ជាក់ឲ្យឃើញថា នៅឆ្ងាយនៅឡើយ ក្តីសង្ឃឹមរបស់អាជ្ញាធរ ស្តារឡើងវិញ ដំណើរដើរថយក្រោយនៃសេដ្ឋកិច្ចរុស្ស៊ីអស់ជាង១ឆ្នាំហើយ ដូច្នេះវិធានការថ្មីកាន់តែតឹងរ៉ឹង មុខជានឹងត្រូវចាត់ឡើងចៀសមិនផុតទេ។
ទីផ្សារភាគហ៊ុន RTS ក្រុងម៉ូស្គូជួញជាដុល្លារ បានបិទបញ្ចប់ម្សិលមិញ គឺដោយបាត់តម្លៃអស់ ៥,១២% ហើយធ្លាក់ដល់ទ្រនិចលេខ ៦៩៩ ពោលគឺទៅនៅក្រោមទ្រនិចលេខ៧០០ ដែលជាលើកទី១ បើគិតពីខែធ្នូឆ្នាំ២០១៤មក។ ទីផ្សារភាគហ៊ុនមួយទៀតនៅក្រុងម៉ូស្គូ ឈ្មោះ Micex ជួញជាលុយរូប្ល គឺបានរងការប៉ះពាល់តិចជាង ហើយធ្លាក់ចុះតែ ៣,៧៨%។ ក្នុងចំណោម តម្លៃធំៗផ្សេងទៀត គឺធនាគារទី២នៅរុស្ស៊ី Sberbank បានធ្លាក់ចុះអស់៥,៩៧% គូប្រជែងវា គឺធនាគារ VTB បានធ្លាក់ចុះអស់ ៣,៦៨% បណ្តុំក្រុមហ៊ុនយក្សខាងឧស្ម័ន Gazprom បានធ្លាក់ចុះអស់ ៣,៥០% និងក្រុមហ៊ុនប្រេងឯកជន Lukoil បានធ្លាក់ចុះអស់ ៤,៩៩%។
លើទីផ្សារដូរប្រាក់ ថ្ងៃចន្ទម្សិលមិញ ១ដុល្លារដូរបាន៧៦រូប្ល ហើយ១អឺរ៉ូដូរបាន ៨៣រូប្ល - នេះជាលើកទី១ បើគិតពីខែធ្នូឆ្នាំ២០១៤មក។ ជាការកត់សម្គាល់ កាលណោះ ពេល ដែលប្រទេសរុស្ស៊ី បានលង់ខ្លួនទៅក្នុងវិបត្តិ ១ដុល្លារ ដូរបានដល់ទៅ ៧៦,៤៩រូប្ល ហើយ ១អឺរ៉ូ ដូរបានដល់ទៅ ៨៣,៧៩រូប្ល។
តាមពួកអ្នកវិភាគ បើតម្លៃប្រេងដែលជាខ្ទង់ចំណូលក្រាស់ក្រែល សម្រាប់ថវិការុស្ស៊ីបន្តធ្លាក់ចុះ នោះអត្រាប្រាក់រូប្ល ក៏អាចបន្តធ្លាក់ចុះតទៅទៀត។
ប្រទេសរុស្ស៊ី កំពុងតែឆ្លងកាត់ ដំណើរដើរថយក្រោយយ៉ាងជ្រៅ ជាងមួយឆ្នាំហើយ ។ មូលហេតុ មកពី ការស្រុតចុះគ្មានឈប់នៃទីផ្សារប្រេងលើពិភពលោក និង មកពីទណ្ឌកម្មបស្ចិមលោក ប្រឆាំងរុស្ស៊ី ដែលប្រកាន់គោលជំហរឥតប្រែប្រួលចំពោះស្ថានការណ៍នៅអ៊ុយក្រែន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ