ទស្សនកិច្ចជាប្រវត្តិសាស្ត្ររបស់សម្តេចប៉ាបនៅ ម៉ិចស៊ិក
បន្ទាប់ពីបានចារក្នុងទំព័រប្រវត្តិសាស្ត្រ តាមរយៈជំនួបជាលើកដំបូង គិតចាប់តាំងពីជិតមួយពាន់ឆ្នាំ ជាមួយសម្តេចសង្ឃអ័រតូដុករុស្ស៊ី នៅប្រទេសគុយបា កាលពីថ្ងៃសុក្រម្សិលមិញមក សម្តេចប៉ាប ហ្វ្រង់ស័រ ត្រូវផ្តើមបំពេញទស្សនកិច្ចជាប្រវត្តិសាស្ត្រមួយទៀត ចាប់ពីថ្ងៃសៅរ៍ទី ១៣កុម្ភៈ នៅម៉ិចស៊ិក ប្រទេសដែលមានពលរដ្ឋកាន់សាសនាកាតូលិកច្រើនជាងគេទីពីរលើពិភពលោក។
ចុះផ្សាយនៅថ្ងៃ៖
ស្តាប់ - ០៧:០៨
សម្តេចប៉ាប ហ្វ្រង់ស័រ បានផ្តើមបំពេញទស្សនកិច្ចរយៈពេល៥ថ្ងៃ នៅប្រទេសម៉ិចស៊ិក។ ជាទស្សនកិច្ចដែលគ្រប់គ្នាចាត់ទុកថាមានលក្ខណៈជាប្រវត្តិសាស្ត្រផង និងប្រកបដោយនិមិត្តរូប ព្រមទាំងការរង់ចាំខ្លាំងបំផុត ! ព្រោះ នៅថ្ងៃសៅរ៍នេះ ជាលើកទីមួយ សម្តេចប៉ាបនឹងត្រូវទទួលស្វាគមន៍ ដោយរូបប្រធានាធិបតីផ្ទាល់តែម្តង នៅវិមានជាតិកាតូលិករបស់ម៉ិចស៊ិក។ ម៉ិចស៊ិកជាប្រទេសកាតូលិកធំទីពីរ នៅលើពិភពលោក ប៉ុន្តែ អ្នននយោបាយប្រទេសនេះ មានគ្មានប្រពៃណីនិងរឹងទទឹងខ្លាំងខាងការប្រកាន់សាសនា ដោយទើបតែព្រមភ្ជាប់ទំនាក់ទំនងការទូត ជាមួយបុរីវ៉ាទីកង់ នៅឆ្នាំ១៩៩២តែប៉ុណ្ណោះ។
ទស្សនកិច្ចរបស់សម្តេចប៉ាប គឺបិទទំព័រប្រវត្តិសាស្ត្រតានតឹង ៖ តាំងពីយូរយាណាស់មកហើយ នៅក្នុងអំឡុងសតវត្សរ៍ទី ១៩ និងរហូតដល់ជាងពាក់កណ្តាលសតវត្សរ៍ទី២០ ទំនាក់ទំនងម៉ិចស៊ិកជាមួយវ៉ាទីកង់មានភាពតានតឹងខ្លាំងណាស់ សឹងថាមានជម្លោះនឹងគ្នាផង ជាពិសេសនៅពេលម៉ិចស៊ិកមានរដ្ឋាភិបាលបង្កើតចេញពីបដិវត្ត។
សម្តេចប៉ាប បរិហារ ភាពក្រីក្រ អន្តោប្រវេសន៍ និងអំពើហិង្សា នៅម៉ិចស៊ិក
ម្យ៉ាងវិញទៀត បើយើងក្រលេកទៅមើល កម្មវិធីទស្សនកិច្ចរបស់សម្តេចប៉ាបវិញ ពីមួយដំណាក់ទៅមួយដំណាក់ មានបង្កប់ទៅដោយអត្ថន័យជានិម្មិតរូបដូចគ្នា។ នៅថ្ងៃស្អែក សម្តេចនឹងសូត្រធម៌នៅតំបន់ជាយក្រុងដែលអំពើហិង្សា សម្លាប់ស្ត្រី កើនឡើងជារៀងរាល់ថ្ងៃ។ បន្ទាប់មក សម្តេចប៉ាបនឹងនិមន្តទៅតំបន់ភាគខាងត្បូងប្រទេសក្នុងរដ្ឋដែលក្រីក្រជាងគេបំផុត មានជនជាតិដើមភាគតិចរស់នៅច្រើន ដោយសូត្រធម៌ជាភាសាជនជាតិ (បីភាសា) និងចុងក្រោយ នៅក្រុងជាប់ព្រំដែនអាមេរិក ដែលជាច្រកដ៏គ្រោះថ្នាក់បំផុត។
ម៉ិចស៊ិកជាប្រទេសដែលរងការរិះគន់ច្រើន ខាងផ្នែកសិទ្ធិមនុស្ស ជាប្រទេសហិង្សា ពុករលួយ ជាប្រទេសជួញដូរអាភៀន បងធំ ជាប្រទេសក៏ក្រីក្របំផុតមួយនៅលើលោក និងជាប្រទេសដែលមានអន្តោប្រវេសន៍រាប់ពាន់ម៉ឺននាក់រស់ត្រដាបត្រដួសចាំរត់ឆ្លងព្រំដែនទៅអាមេរិក សង្ឃឹមលើវត្តមាន៥ថ្ងៃ របស់សម្តេចប៉ាប ក្នុងការប្រោះព្រំ នាំ សណ្តាប់ធ្នាប់ នាំដំណោះស្រាយជានិរន្តមួយមកឱ្យប្រទេសនេះ។ សម្តេចប៉ាបបានសន្យាតាំងពីមុនចេញដំណើរម្ល៉េះ ថានឹងផ្សព្វផ្សាយធម៌ឱ្យច្បាស់ៗ ចំៗ។
ជំនួបជាប្រវត្តិសាស្ត្ររវាងសម្តេចសង្ឃកាតូលិកនិងអ័រតូដុក
សាសនាគ្រិស្ត បានបំបែកគ្នាជាពីរ ជាអ័រតូដុក និងកាតូលិក នៅឆ្នាំ១០៥៤មក គឺទើបតែនៅសុក្រម្សិលមិញនេះទេ ដែលប្រមុខដឹកនាំសាសនាទាំងពីរនិកាយ បានជួបប្រាស្រ័យគ្នា នៅទីក្រុងឡាហាវ៉ាន ក្នុងបន្ទប់ទទួលភ្ញៀវនៃអាកាសយានដ្ឋាន ជាដែនដីអព្យាក្រឹត្យ និងដែលឆ្ងាយដាច់ស្រឡះពីដែនដីកំណើតដើមកំណើតនៃសាសនានិងជម្លោះ។
ជម្លោះកាលពីជិតមួយពាន់ឆ្នាំមុន បានធ្វើសាសនាគ្រិស្ត បែងចែកជានិកាយពីរធំៗ ដែលប្រៀបបានទៅនឹងការបែងចែងភូមិសាស្ត្រជាពីរ គឺគ្រិស្តសាសនានៅភាគខាងលិចជា អ្នកកាតូលិក គ្រប់គ្រងដោយក្រុងរ៉ូម បុរីវ៉ាទីកង់ និងគ្រិស្តសាសនានៅប៉ែកខាងកើត ជាអ្នកអ័រតូដុក គ្រប់គ្រងដោយម៉ូស្គូ ដែលមានអ្នកគោរពសាសនានិកាយនេះចំនួន១៣០លាននាក់ ក្នុងចំណោមជាង២៥០លាននាក់ នៅលើពិភពលោក។ ប៉ុន្តែសម្តេចសង្ឃអ័រតូដុក មានដែនអំណាចគ្រប់គ្រងដោយផ្ទាល់លើអ្នកកាន់សាសនានេះប្រមាណតែជាងបីលាននាក់កន្លះប៉ុណ្ណោះ។
ជំនួបរវាងប្រមុខនិកាយសាសនាទាំងពីរនេះ ជាលទ្ធផលនៃការខិតខំប្រឹងប្រែងតាំងពីជាង២០ឆ្នាំមកហើយ។ ប្រធានាធិបតីគុយបា លោក រ៉ាអ៊ូល កាស្ត្រូ អ្នកគ្មានប្រកាន់លើជំនឿសាសនា បានឆ្លៀតប្រើឱកាសដែលសម្តេចប៉ាបហ្វ្រង់ស័រ ត្រូវនិមន្តទៅបំពេញទស្សនកិច្ចនៅម៉ិចស៊ិក ឯសម្តេចសង្ឃអ័រតូដុក Kirill ត្រូវនិមន្តទៅបំពេញទស្សនកិច្ចនៅគុយបា ប៉ារ៉ាហ្គាយ និងប្រេស៊ីល រយៈពេល១០ថ្ងៃ ដើម្បីរៀបចំឱ្យមានជំនួបរវាងប្រមុខដឹកនាំសាសនានិកាយទាំងពីរ។
“នៅទីបំផុត យើងបានជួបគ្នា” នេះអំណរដំបូងដែលគេបានឮផុសចេញពីមាត់សម្តេចប៉ាប ហ្វ្រង់ស័រ ទៅកាន់សម្តេចសង្ឃអ័រតូកដុក ដែលតបវិញថា “មែនហើយ ! បច្ចុប្បន្ន អ្វីៗមានលក្ខណៈស្រួលជាងមុន”។ ប្រមុខវិហារកាតូលិកទាំងពីរនិកាយ ដែលបានជួបពិភាក្សា គ្នារយៈពេលពីរម៉ោង ដោយភាសាត្រង់ទៅត្រង់មក បានចេញសេចក្តីថ្លែងការណ៍រួម ស្វែងរកការផ្សះផ្សា និងរួមរស់ជាមួយគ្នារវាងនិកាយអ័រតូដុក ក្នុងមានជាបងប្អូន មិនមែនជាគូប្រជែង និងជាពិសេស ដើម្បីការពារអ្នកកាន់សាសនាគ្រិស្តនៅដើមបូព៌ា នៅស៊ីរី នៅអ៊ីរ៉ាក់។
ការការពារអ្នកកាន់សាសនាគ្រិស្តនៅដើមបូព៌ា ដែលជាកត្តាដ៏ចំបងមួយជំរុញឱ្យប្រមុខសាសនាទាំងពីរអាចខិតមករកគ្នាបានសម្រេចនៅថ្ងៃនេះ។ ព្រោះសូមបញ្ជាក់ថា ប្រមុខវិហារអ័រតូដុកម៉ូស្គូ បានគាំទ្រយ៉ាងពេញទំហឹងអន្តរាគមន៍យោធារបស់រុស្ស៊ី នៅស៊ីរី តែក៏មានអាទិភាពនិងប្រឹងគ្រប់យ៉ាង ការពារទប់ស្កាត់ អំពើប្រល័យពូជសាសន៍គ្រិស្តនៅដើមបូព៌ា នៅអាហ្វ្រិកកណ្តាល និងខាងជើង។
ចំណែកសម្តេចប៉ាបហ្វ្រង់ស័រវិញ ព្រះអង្គយល់ និងជឿជាក់ថា មានតែការរួមរួបជាមួយប្រមុខសាសនាម៉ូស្គូទេ ទើបអាចមានទម្ងន់ខ្លាំង ដាក់សម្ពាធលើសហគមន៍អន្តរជាតិឱ្យជួយគិតគូរដោះស្រាយវិបត្តិនៅដើមបូព៌ានេះបាន។ សម្រាប់សម្តេចប៉ាប រុស្ស៊ី អាចធ្វើអ្វីបានច្រើនដើម្បីសន្តិភាព។ សម្តេចធ្លាប់ទាំងបានទទួលជួបប្រធានាធិបតីរុស្ស៊ីដល់បីលើក គិតចាប់ពីព្រះអង្គបានក្លាយជាសម្តេចប៉ាបមក។
ប៉ុន្តែសម្តេចសង្ឃអ័រតូដុក Kirill ដែលបើទោះបីមានភាពស្និទ្ធស្នាលខ្លាំងនឹងប្រធានាធិបតីរុស្ស៊ី ពូទីនក៏ដោយ ក៏បានបដិសេធ នៅចំពោះមុខសម្តេចប៉ាប ហ្វ្រង់ស័រថាមិនធ្វើការជៀតជ្រែកនយោបាយទេ។ វិហារអ័រតូដុក គ្មានពាក់ព័ន្ធនឹងសេចក្តីសម្រេចចិត្តរបស់រដ្ឋាភិបាលរុស្ស៊ីទេ។ នេះជាសារដ៏ច្បាស់លាស់មួយ ដែលបញ្ជាក់ថាវិហារអ័រតូដុកនិងកាតូលិក មានជំហររួមតែមួយ គឺការពារអ្នកកាន់សាសនាគ្រិស្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ