ចៅក្រមសួរចម្លើយអតីតប្រធានាធិបតីបារាំង នីកូឡា សាកូហ្ស៊ី រឿងចំណាយជ្រុលពេលឃោសនាបោះឆ្នោត
លោក នីកូឡា សាកូហ្ស៊ី អតីតប្រធានាធិបតីបារាំង ពីឆ្នាំ ២០០៧-២០១២ និងជាប្រធានបក្សប្រឆាំងសាធារណរដ្ឋ ត្រូវបានចៅក្រមកោះហៅឱ្យចូលឆ្លើយបំភ្លឺ ក្នុងសំណុំរឿងបន្លំវិក័យប័ត្រនិងគណនីសម្រាប់បោះឆ្នោតប្រធានាធិបតីឆ្នាំ២០១២។ ថ្ងៃនេះការជាសាកសួរទេ ប៉ុន្តែលោកនីកូឡា សាកូហ្ស៊ី អាចនឹងត្រូវជាប់ចោទ ក្នុងសំណុំរឿងនេះផងក៏ថាបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ជាអតីតប្រធានាធិបតី ដែលមានមហិច្ឆតាចង់វិលត្រលប់មកប្រកួតប្រជែងដណ្តើមតំណែងប្រធានាធិបតីបារាំងជាថ្មី នៅឆ្នាំ២០១៧ ! តែរឿងក្តីមានច្រើនឥតដាច់។ នៅថ្ងៃនេះ សាកូហ្ស៊ី បានបង្ហាញខ្លួននៅតុលាការសាលាដំបូងក្រុងប៉ារីសជាថ្មី ដើម្បីឆ្លើយបំភ្លឺចៅក្រមនូវបញ្ហាមួយចំនួនទាក់ទងនឹងការចំណាយខុសច្បាប់ក្នុងពេលធ្វើយុទ្ធនាការឃោសនាបោះឆ្នោត។
ក្នុងអំឡុងពេលឃោសនាបោះឆ្នោតប្រធានាធិបតី គណបក្សនីមួយៗមានសិទ្ធិចំណាយត្រឹម ២២,៥លានអឺរ៉ូប៉ុណ្ណោះ។ ប៉ុន្តែលោក សាកូហ្ស៊ី បានចាយហួស។ ក្រុមហ៊ុនBygmalion អ្នកគ្រប់គ្រងយុទ្ធនាការឃោសនា ធ្វើវិក័យប័ត្របន្លំ ដើម្បីលាក់ចំណាយលើសប្រមាណជិតពីរដង (១៨,៥លានអឺរ៉ូ) បន្លំជាចំណាយរបស់បក្សស្តាំនិយមUMP បច្ចុប្បន្នមានឈ្មោះថា បក្សសាធារណរដ្ឋ។
តុលាការធ្លាប់បានកោះហៅលោកនីកូឡាសាកូហ្ស៊ី ទៅសួរចម្លើយម្តងហើយកាលពីខែកញ្ញា ២០១៥។ នៅពេលនោះលោកសាកូហ្ស៊ី បានធានាអះអាងថាមិនបានចាំ និងមិនដឹងថាមានបន្លំ ឬចំណាយខុសច្បាប់ទេ ដោយទម្លាក់កំហុសទៅប្រធានបក្សUMP ដែលមានក្រុមគ្រួសារជាម្ចាស់ក្រុមហ៊ុនBygmalion។
ប៉ុន្តែនៅពេលធ្វើការអង្កេតយូរៗទៅ ចៅក្រមរកឃើញចំណុចខ្ទាស់ផ្សេងទៀត ដែលអាចពាក់ព័ន្ធនឹងលោកនីកូឡាសាកូហ្ស៊ី ដូចជានៅក្នុងគម្រោងថវិកា២០១២ របស់បក្សមានចំណាយដល់ទៅ ១៣,៥លានអឺរូ តែមានបីលានប៉ុណ្ណោះដែលចុះនៅក្នុងគណនីឃោសនាបោះឆ្នោត។ លោកអតីតប្រធានាធិបតី បានស្នើសុំរៀបចំមិទ្ទិញ ច្រើនហួសកំរិត នៅខែមីនា ២០១២ តើបានលុយមកពីណា ? វិក័យប័ត្រចំណាយបាត់ទៅណា ? ហិរញ្ញិករបស់គណបក្សបានទទួលស្គាល់ថាមានការបន្លំចំណាយខុសច្បាប់ ប៉ុន្តែគ្មានភស្តុតាងអ្វីអាចបញ្ជាក់បានថាតើលោកនីកូឡាសាកូហ្ស៊ី ជាអ្នកបញ្ជាឬបានដឹងឮអំពីការបន្លំនោះទេ។
មានអ្នកទទួលខុសត្រូវ១៣នាក់ហើយ ដែលជាប់ចោទនៅក្នុងសំណុំរឿងBygmalionនេះ ក្នុងបទបន្លំ ប្រើអំណាច លួច និងចំណាយខុសច្បាប់។ ក្រៅអំពីអាចត្រូវជាប់ចោទដែរ ក្នុងសំណុំរឿងនេះ លោក នីកូឡាសាកូហ្ស៊ី ក៏កំពុងជាប់ចោទក្នុងបទប្រព្រឹត្តអំពើពុករលួយ ជំនួញឥទ្ធិពល និងទទួលផលពីការរំលោភបំពានលើអាថ៌កំបាំងវិជ្ជាជីវៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ