ក្រិកកំពុងក្លាយជាទ្រុងដាក់ជនភៀសខ្លួនឬ ?
ជនភៀសខ្លួនប្រមាណ៦៥០០នាក់ កំពុងជាប់គាំងនៅព្រំប្រទល់ក្រិក-ម៉ាសេដ្វាន។ ពួកគេចង់បន្តដំណើរទៅអឺរ៉ុបភាគខាងជើង ប៉ុន្តែ ស្លូវ៉ានី ក្រូអាស៊ី សែរប៊ី និងម៉ាសេដ្វាន បើកច្រកឱ្យអន្តោប្រវេសន៍ឆ្លងកាត់ក្នុងមួយថ្ងៃតែ៥៨០នាក់ និងសម្រាប់តែជនជាតិស៊ីរី ឬអ៊ីរ៉ាក់ មានអត្តសញ្ញាណប័ត្រជាប់ខ្លួនទេ។ រដ្ឋាភិបាលក្រិក រំពឹងថានឹងអាចមានដំណោះស្រាយឆាប់រហ័ស ព្រោះពុំនោះទេ ក្រិកនឹងត្រូវរងថ្មបាក់ម្នាក់ឯងទទួលមើលជនភៀសខ្លួនដែលអាចឡើងដល់៧ម៉ឺននាក់។
ចុះផ្សាយនៅថ្ងៃ៖
ចំនួនជនភៀសខ្លួនជាប់កុនក្នុងប្រទេសក្រិកកើនឡើងជារៀងរាល់ថ្ងៃ និងអាចឡើងរហូតដល់៧ម៉ឺននាក់នៅខែមីនា ព្រោះក្នុងមួយថ្ងៃៗ ពីចន្ទដល់សុក្រ ក្រិកមានចំណូលជនភៀសខ្លួនប្រមាណពី១៦០០ទៅ៣៥០០នាក់ ឯលំហូរចេញមានកាន់តែតិចទៅៗ។
ស្ថានភាពធ្លាក់កាន់តែដុនដាបបែបនេះ ដោយមកពីបណ្តាប្រទេសនៅតំបន់បាល់កង់ ចំនួន៤ ស្លូវេនី និងក្រូអាស៊ី ជាសមាជិកសហភាពអឺរ៉ុប ព្រមទាំងសែរប៊ីនិងម៉ាសេដ្វាន បានយកគំរូតាមប្រទេសអូទ្រីស ដោយកំណត់កូតាបរិមាណជនភៀសខ្លួនឆ្លងព្រំដែន តែត្រឹម៥៨០នាក់ក្នុងមួយថ្ងៃ ហើយកាលពីថ្ងៃសៅរ៍ម្សិលមិញ ម៉ាសេដ្វាន បើកទ្វារឱ្យតែ៣០០នាក់ប៉ុណ្ណោះ។
ជាលទ្ធផល ជនភៀសខ្លួនដែលភាគច្រើនជាជនជាតិស៊ីរី អ៊ីរ៉ាក់ និងអាហ្វហ្កានីស្ថាន ធ្វើដំណើរឆ្លងកាត់មកពីតួកគី ត្រូវជាប់គាំងនៅក្នុងជំរំរខេករខាកក្នុងប្រទេសក្រិក។ អនុរដ្ឋមន្ត្រីក្រសួងអន្តោប្រវេសន៍ បានអះអាងថានឹងមានដំណោះស្រាយក្នុងរយៈពេល១៥ថ្ងៃទៀត ដោយបង្កើតជំរំទទួលជនភៀសខ្លួននៅគ្រប់ទិសទីនៃប្រទេស និងបើកយុទ្ធនាការឃោសនាផ្សព្វផ្សាយព័ត៌មាន។ ក្រិកសង្ឃឹមថា បន្ថែមពីលើការពង្រាយនាវាអូតង់ចាំស្ទាក់ចាំទូកអន្តោប្រវេសន៍នៅសមុទ្ទអេហ្សេលំហូរអន្តោប្រវេសន៍នឹងត្រូវបន្ថយបាន៧០% នៅពេលដំណឹងស្តីអំពីការរឹតបន្តឹងព្រំដែនបានរសាត់ដល់តួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ