រុស្ស៊ី បានទម្លាយឲ្យដឹងថា មានកងកុម្ម៉ង់ដូខ្លួន សកម្មនៅលើដីស៊ីរីផ្ទាល់
ចុះផ្សាយនៅថ្ងៃ៖
ស្តាប់ - ០៥:៤៨
គឺជាលើកទី១ ដែលក្នុងសម្ភាសន៍ ទៅកាសែតរដ្ឋាភិបាលរុស្ស៊ី លេខថ្ងៃ ២៤ មីនា លោកឧត្តមសេនីយឯករុស្ស៊ី ដែលអស់សឹងកន្លះឆ្នាំ បានធ្វើជាមេបញ្ជាការ ក្រុមទ័ពរុស្ស៊ីនៅស៊ីរី បានទទួលស្គាល់ថា ក្រៅពីប្រតិបត្តិការវាយប្រហារដោយ ក្រុមយន្តហោះចម្បាំងរុស្ស៊ី ទៅលើទីតាំងពួកភេរវជននៅលើដែនដីស៊ីរី ក៏មានទាំងអង្គភាពខ្លះ នៃកងកុម្ម៉ង់ដូរុស្ស៊ី បាននិងបន្តបំពេញភារកិច្ចពិសេសៗ នៅលើដីស៊ីរីផ្ទាល់តែម្តង។
ក្នុងបទសម្ភាសន៍ ដែលត្រូវកាសែតរដ្ឋាភិបាលរុស្ស៊ី គឺកាសែត Rossiskaya Gazeta លើកជាចំណងជើងថា “ផ្គររុស្ស៊ី លាន់នៅស៊ីរី“ លោកឧត្តមសេនីយឯក Alexandre Dvornikov ដែលជាមេបញ្ជាការរងទី១ នៃយោធាភូមិទ័ពរុស្ស៊ីប្រចាំភូមិភាគកណ្តាលសហព័ន្ធរុស្ស៊ី និងអស់ ៥ខែកន្លះ ពីថ្ងៃ៣០កញ្ញាឆ្នាំមុន ថ្ងៃដែលកងអាកាសរុស្ស៊ី បានចាប់ផ្តើមប្រតិបត្តិការនៅស៊ីរី រហូតដល់ ថ្ងៃ១៥មីនាឆ្នាំនេះ ថ្ងៃដែលរុស្ស៊ី ចាប់ផ្តើមដកក្រុមទ័ពរុស្ស៊ីនោះមួយភាគធំចេញមកវិញ ទៅតាមបទបញ្ជារបស់លោកប្រធានាធិបតីពូទីន បានពន្យល់បំភ្លឺជាអាទិ៍ ៖
ខ្ញុំមិនលាក់បាំងឡើយ ថាសកម្មនៅលើដែនដីស៊ីរី ក៏ទាំងអង្គភាពក្រុមទ័ពរុស្ស៊ី ខាងបំពេញប្រតិបត្តិការពិសេសៗ ហៅថា ក្រុមកុម្ម៉ង់ដូ។ ក្រុមនេះ ជាប់ដៃរវល់នៅស៊ីរី គឺ ខាងឈ្លបយកការណ៍ឲ្យឃើញមែនពិត ទីតាំងរបស់ពួកភេរវជនសម្រាប់រងនូវការវាយប្រហារ ពីអាកាសនៃយន្តហោះយោធារុស្ស៊ី ខាងណែនាំតម្រង់ទិសយន្តហោះរុស្ស៊ី ឲ្យទៅទម្លាក់គ្រាប់បែក នៅតាមតំបន់ឆ្ងាយៗនៃប្រទេសនោះ ខាងដោះស្រាយចំណោទពិសេសផ្សេងៗទៀត។ ព្រមជាមួយនេះ សូមកុំភ្លេចឡើយថា ភារកិច្ចប្លែកៗបែបនេះនៅលើដីស៊ីរី ក៏កំពុងបំពេញដែរ ដោយក្រុមកុម្ម៉ង់ដូអាមេរិកាំង និងប្រទេសឯទៀត ក្នុង “សម្ព័ន្ធប្រយុទ្ធទល់នឹងភេរវនិយម“ ដែលដឹកនាំដោយស.រ.អា.។
តាមប្រសាសន៍ឧត្តមសេនីយនោះ បច្ចុប្បន្នស្ថិតនៅស៊ីរី ក៏ទាំងពួកទីប្រឹក្សាយោធារុស្ស៊ី ដែលជួយកងទ័ពស៊ីរី ឲ្យចេះគ្រោងយុទ្ធនាការ ឲ្យចេះប្រើគ្រឿងបច្ចេកទេសសឹករុស្ស៊ី។
លោកឧត្តមសេនីយឯក Dvornikov បន្ថែមថា ក្រុមទ័ពរុស្ស៊ីដែលនៅសល់នៅស៊ីរី គឺគ្រប់គ្រាន់ សម្រាប់ត្រួតពិនិត្យលើដំណើរបំពេញតាមបទឈប់បាញ់ក្នុងប្រទេសនេះ និងសម្រាប់ការពារមូលដ្ឋានទ័ពអាកាសរុស្ស៊ី នៅព្រលានយន្តហោះ “ខ្មេមីម” នៅស៊ីរី ព្រមទាំងមូលដ្ឋានកងម៉ារីន រុស្ស៊ី នៅក្រុងផែស៊ីរី “តារទុស” មាត់សមុទ្រមេឌីទែរ៉ាណេ។ ប្រភពក្នុងក្រសួងការពារជាតិរុស្ស៊ី បានបង្ហើបឲ្យដឹងថា ក្រុមទ័ពរុស្ស៊ី បូកទាំងពួកទីប្រឹក្សារុស្ស៊ី ដែលនៅបន្តវត្តមានក្នុងប្រទេសស៊ីរី គឺប្រមាណ ១.០០០នាក់។
កាសែត Rossiskaya Gazeta កត់សម្គាល់ថា ឈ្មោះឧត្តមសេនីយរុស្ស៊ី Alexandre Dvornikov មិនដែលត្រូវបានប្រព័ន្ធផ្សព្វផ្សាយ លើកយកមកនិយាយឡើយ ពាក់ព័ន្ធនឹងប្រតិបត្តិការ ក្រុមទ័ពរុស្ស៊ីនៅស៊ីរី។ ហើយចំណុចសម្ងាត់ៗភាគច្រើននៃប្រតិបត្តិការនេះ មិនដែលត្រូវបានបង្ហើបឲ្យដឹងឡើយ។ ចំណែកលោក Dvornikov លើកយកមករៀបរាប់ គឺតែភិនភាគខ្លះប៉ុណ្ណោះ។
គួររំលឹកថា លោកប្រធានាធិបតីពូទីន តែងបានថ្លែងថា “គ្មានហើយមិនអាចមានទៅកើតឡើយ ប្រតិបត្តិការអ្វីណានៅស៊ីរី ដែលថាមានទ័ពជើងគោករុស្ស៊ីចូលរួម។
ថ្ងៃ១៤មីនាកន្លងទៅ លោកពូទីនស្រាប់តែបានថ្លែងដោយគ្មាននរណានឹកស្មានឡើយថា ៖
កងអាកាសរុស្ស៊ី ចេះបំពេញបានរួចទៅហើយ រាល់ភារកិច្ចដែលចោទនៅពីមុខគេ ក្នុងប្រទេស ស៊ីរី ម៉្លោះហើយបានជាខ្ញុំសម្រេចឲ្យដកក្រុមទ័ពនោះមួយភាគធំចេញពីស៊ីរីត្រឡប់មករុស្ស៊ីវិញ។
សេចក្តីថ្លែងការណ៍លោកពូទីន បន្លឺឡើងក្នុងផ្ទៃនៃការចូលជាធរមាន នូវបទឈប់បាញ់ ជាលើកទី១ បើគិតក្នុងសង្គ្រាមដែលបានពន្យារទៅនៅស៊ីរីអស់៥ឆ្នាំ - បទឈប់បាញ់នោះដែល ចុះហត្ថលេខា ដោយគ្រប់ភាគីជាប់ក្នុងជម្លោះនៅស៊ីរី គឺមានសម្រេចបានដោយរុស្ស៊ីនិងស.រ.អា. ក្រោយពីកិច្ចចរចាអស់យ៉ាងយូរ។ គិតមកទល់ឥឡូវ បានចុះហត្ថលេខាយល់ព្រមទទួលយកល័ក្ខខ័ណ្ឌនៃបទឈប់បាញ់នោះ គឺ ក្រុមបដិបក្ខ ៤៣ក្រុម និង អភិបាល ៥១ទីប្រជុំជន។ ពិតជានៅនឹងមូលដ្ឋានទ័ពអាកាសរុស្ស៊ី “ខ្មេមីម“ ដែលបច្ចុប្បន្នដំណើរការ គឺ មជ្ឈមណ្ឌលរុស្ស៊ីខាងផ្សះផ្សាជាតិស៊ីរី ធ្វើការដោយពួកនាយទាហានរុស្ស៊ី ៦០នាក់។
ដោយសារអន្តរាគមន៍កងអាកាសរុស្ស៊ី កងទ័ពស៊ីរីចេះរំដោះបាន ភូមិឃុំចំនួន៤០០កន្លែង ឯណោះ ហើយអ្នកស្រុកស៊ីរីជាច្រើននាំគ្នាត្រឡប់ទៅផ្ទះគេវិញរៀងៗខ្លួន។ ក្នុងប្រតិបត្តិការនោះ ក្រុមទ័ពរុស្ស៊ីបានកំទេចពួកភេរវេជនអស់ ប្រមាណ ២.០០០នាក់។
គួរនិយាយថា ក្នុងប្រតិបត្តិការនៅស៊ីរី រយៈពេល៥ខែកន្លះនោះ តាមដែលអ្នកនាំពាក្យវិមានក្រេមឡាំង ថ្លែងទទួលស្គាល់ជាផ្លូវការ ក្រុមទ័ពរុស្ស៊ីបានបាត់បង់យោធាខ្លួន សរុបទៅគឺ ចំនួន ៥នាក់ និយាយឲ្យចំ៖
-ថ្ងៃ៣០តុលា គឺ មួយខែក្រោយពីចាប់ផ្តើមប្រតិបត្តិការនោះ យោធាឈ្មោះ Vadim Kostenko អាយុ១៩ឆ្នាំ បានធ្វើអត្តឃាតសម្លាប់ខ្លួនឯង។
-ថ្ងៃ២៤វិច្ឆិកា ពីឡុតរុស្ស៊ី ឈ្មោះ Oleg Peshkov នៃយន្តហោះទម្លាក់គ្រាប់បែក Su-24 ធ្លាក់ខ្លួនស្លាប់ ដោយការវាយប្រហារនៃយន្តហោះប្រមាញ់តួកគី F-16។
-ក្នុងប្រតិបត្តិការសង្គ្រោះពីឡុតរុស្ស៊ីម្នាក់ទៀត ដែលចេះលោតតាមឆ័ត្រយោង ចុះដល់ដី នាវិករុស្ស៊ីឈ្មោះ Alexandre Pozynich ស្រាប់តែអភ័ព្វត្រូវពួកភេរវជនបាញ់ស្លាប់។
-ថ្ងៃ៣កុម្ភៈឆ្នាំនេះ ក្រសួងការពារជាតិរុស្ស៊ី បានផ្សាយដោយមិនបញ្ចេញឈ្មោះ អំពីមរណភាពទីប្រឹក្សារុស្ស៊ីម្នាក់ ដែលរបួសដល់ជីវិត ដោយត្រូវគ្រាប់បែកត្បាល់។ ប៉ុន្តែកាសែតចុះផ្សាយថា អ្នកដែលស្លាប់ទៅនោះគឺ វរសេនីយឯក Ivan Tcheremissin។
-ថ្ងៃ១៧មីនា ក្នុងពិធីបំពាក់គ្រឿងឥស្សរិយយស នៅវិមានក្រេមឡាំង ជូនយោធា៧០០នាក់ ដែលមានគុណូបការនៅពីមុខរដ្ឋរុស្ស៊ី ចំពោះការបំពេញភារកិច្ចខ្លួននៅស៊ីរី លោកប្រធានាធិបតី ពូទីន បានលើកឡើងឈ្មោះយោធារុស្ស៊ីទី៥ ដែលបានស្លាប់នៅស៊ីរី គឺនាយទាហាន Fedor Juravlev ដោយបានប្រគល់ គ្រឿងឥស្សរិយយស ជូនភរិយាគាត់ ក្លាយជាស្ត្រីមេម៉ាយ។
គឺក្នងពិធីនោះ ដែលលោកពូទីន បានប្រកាសថា សម្រាប់ប្រតិបត្តិការរយៈពេល១៦៧ថ្ងៃ នៅ ស៊ីរី ម៉ូស្គូ បានចំណាយអស់ ៣៣.០០០លានរូប្ល គិតតាមអត្រាសព្វថ្ងៃ គឺ ៤៧៨ លានដុល្លារ ឬ ជាមធ្យម គឺ ២លាន៨សែនដុល្លារក្នុង១ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ