ប្រមុខការទូតបារាំងនិងអាល្លឺម៉ង់កាន់ដៃគ្នាទៅគាំទ្រលីប៊ី ក្នុងនាមអឺរ៉ុប
រដ្ឋមន្ត្រីការបរទេសបារាំង និងអាល្លឺម៉ង់ បានអញ្ជើញទៅដល់ក្រុងទ្រីប៉ូលីហើយ នៅថ្ងៃសៅរ៍នេះ ដើម្បីបំពេញទស្សនកិច្ច ក្នុងក្របខ័ណ្ឌអឺរ៉ុប។ អឺរ៉ុបដែលចង់បង្ហាញវត្តមាន និងផ្តល់ការគាំទ្រដល់រដ្ឋាភិបាលលីប៊ីថ្មី ដែលមានភារៈបង្រួបបង្រួមជាតិ និងស្រោចស្រង់ប្រទេសចេញពីភាពហិង្សា ប្រកួតប្រជែងដណ្តើមអំណាចគ្នា អូសបន្លាយតាំងពីរបបកាដាហ្វីបានដួលរលំទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ទស្សនកិច្ចរបស់ប្រមុខការទូតបារាំង លោក ហ្សង់ម៉ាកអេរ៉ូ Jean-Marc Ayrault និងសមភាគីអាល្លឺម៉ង់ លោក ស្តាំងមៃអឺ Frank-Walter Steinmeier គឺជាតំណាងនៃកិច្ចខិតខំប្រឹងប្រែងរបស់សហភាពអឺរ៉ុប ដែលចង់ដើរតួនាទីសកម្មស្វែងរកដំណោះស្រាយឱ្យវិបត្តិនយោបាយលីប៊ី។ សមភាគី អ៊ីតាលី ដែលធ្លាប់ធ្វើអាណានិគមន៍លើប្រទេសនេះ ក៏បានធ្វើដំណើរមកគាំទ្រ រដ្ឋាភិបាលថ្មីលីប៊ីដែរ កាលពីដើមសប្តាហ៍។ ព្រោះប្រសិនបើលីប៊ីគ្មានស្ថិរភាព និងសណ្តាប់ធ្នាប់នយោបាយទេ នោះលីប៊ីអាចក្លាយជាប្រភពបញ្ហាជនភៀសខ្លួនមួយបន្ថែមទៀតសម្រាប់អឺរ៉ុប។ ហើយដោយមានវិបត្តិស៊ីរីជាមេរៀន សហភាពអឺរ៉ុបពិតជាមិនត្រូវការឃើញមានសេណារីយោ ដៃគូរុស្ស៊ី-អាមេរិក ដើរតួតែឯងទៀតទេ។
រដ្ឋាភិបាលបង្រួបបង្រួមជាតិលីប៊ី ទើបប្រសូតចេញ ក្រោយពីដំណើរការចរចាដ៏វែងឆ្ងាយ រវាងចរន្តនយោបាយប្រឆាំងគ្នាធំៗពីរនៅក្នុងប្រទេស។ រដ្ឋាភិបាលនេះបានទទួលស្វាគមន៍ពីអង្គការសហប្រជាជាតិនិងពិសេសពីសហភាពអឺរ៉ុប ដែលយល់ថា រដ្ឋាភិបាលបង្រួបបង្រួមជាតិជាជម្រើសតែមួយគត់ សម្រាប់នាំលីប៊ីទៅរកសន្តិសុខ ស្ថិរភាពនយោបាយ និងទប់ស្កាត់បានពួកអង្គការរដ្ឋអ៊ីស្លាម មិនឱ្យពង្រីកឥទ្ធិពលលើទឹកដីលីប៊ីបាន។
ថ្វីបើកងសម្ព័ន្ធមិត្តអន្តរជាតិ និងបារាំង បានបញ្ចេញយន្តហោះឆ្វែលដៅកំណត់ទីតាំង និងបានបញ្ជូនក្រុមជំនាញយោធាទៅលីប៊ី ជាច្រើននាក់មែន តែគ្រប់មេដឹកនាំ សុទ្ធតែចង់ផ្តល់សំណាងដល់ដំណោះស្រាយនយោបាយ និងរក្សាការប្រុងប្រយ័ត្នខ្លាំងចំពោះជម្រើសយោធា។ ប្រមុខការទូតបារាំង ដែលចង់សំដៅលើបទពិសោធន៍អន្តរាគមន៍យោធាទម្លាក់របបផ្តាច់ការកាដាហ្វី នៅឆ្នាំ២០១១ បានអះអាងថាមិនដើរលើដានចាស់ឡើយ។ បារាំងត្រៀមជាស្រេចនឹងជួយរក្សាសន្តិសុខឱ្យរដ្ឋាភិបាលថ្មី។ “អន្តរាគមន៍យោធាបារាំងអាចប្រព្រឹត្តទៅបានដរាបណាសំណើពីរដ្ឋាភិបាលលីប៊ី ទៅកាន់សហគមន៍អន្តរជាតិទេ និងស៊ីចង្វាក់គ្នានឹងដំណោះស្រាយនយោបាយ”។ នេះជាប្រសាសន៍លោកប្រមុខការទូតបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ