សន្និសីទស្តីអំពីសន្តិសុខអន្តរជាតិបានប្រព្រឹត្តទៅអស់ពីរថ្ងៃជាប់នៅក្រុងម៉ូស្គូ
ចុះផ្សាយនៅថ្ងៃ៖
ស្តាប់ - ០៦:២១
ថ្ងៃ២៧និង២៨មេសាកន្លងទៅ ម៉ូស្គូបានធ្វើជាម្ចាស់ផ្ទះ ទទួលជាលើកទី៥ គិតតាំងពីឆ្នាំ២០១២មក គឺ សន្និសីទស្តីអំពីសន្តិសុខអន្តរជាតិ ហៅកាត់ថា MCIS ដែលចាត់ចែងឡើងដោយ ក្រសួងការពារជាតិរុស្ស៊ី ដោយមាន ការចូលរួមនៃប្រតិភូ ជាង៥០០នាក់ មកពី ៨៣ ប្រទេស។ បាវចនាសន្និសីទ ក្នុងថ្ងៃទី១ គឺ “ ភេរវនិយម ជាការគម្រាមធំបំផុត ដល់សន្តិសុខ ក្នុងលោក” ហើយក្នុងថ្ងៃទី២ គឺ ឧទ្ទិសដល់ “សន្តិសុខនៅអឺរ៉ុប”។ មុនបើកធ្វើសន្និសីទនេះ នៅម៉ូស្គូ ក៏មានប្រព្រឹត្តទៅ កិច្ចប្រជុំក្នុងជាន់ថ្នាក់ រដ្ឋមន្ត្រីការពារជាតិ រវាងរុស្ស៊ីនិង១០ប្រទេស អាស៊ាន ដែលក្នុងនោះ ប្រាកដណាស់ មានទាំង លោក រដ្ឋមន្ត្រីការពារជាតិកម្ពុជា។
ក្នុងចំណោមប្រតិភូជាង៥០០នាក់តំណាងឲ្យ៨៣ប្រទេស តាមដែលក្រសួងការពារជាតិរុស្ស៊ីជាអ្នកចាត់ចែងសន្និសីទនេះ ប្រកាសឲ្យដឹង គឺ មានរដ្ឋមន្ត្រីការពារជាតិ២០រូប បែបយ៉ាងតំណាងចិនដីគោកជាដើម, នាយអគ្គសេនាធិការដ្ឋាន ១៧នាក់,អគ្គលេខាធិការរង ពីរនាក់របស់ អ.ស.ប.,តំណាងអង្គការដើម្បីសន្តិសុខនិងសហប្រតិបត្តិការនៅទ្វីបអឺរ៉ុប OSCE ថ្នាក់ ដឹកនាំសម្ព័ន្ធរដ្ឋអារ៉ាប,ថ្នាក់ដឹកនាំកាកបាទក្រហមអន្តរជាតិ,តំណាង គ្រប់តែ ១០ប្រទេសសហគមន៍រដ្ឋឯករាជ្យ CEI បូកទាំង ៦ប្រទេសនៃ អង្គការសន្ធិសញ្ញដើម្បីសន្តិសុខរួម , តំណាងគ្រប់តែ៨ប្រទេស នៃអង្គការសហប្រតិបត្តិការក្រុងសៀងហៃ OCS , ពួកអ្នកឯកទេស នៃអង្គការក្រៅរដ្ឋាភិបាលណា ដែលមានឥទ្ធិពល។ ល។
រុស្ស៊ី ក៏បានអញ្ជើញពួកប្រទេសអូតង់ដែរ ប៉ុន្តែពួកគេភាគច្រើនតំណាងតែដោយ សេនានុព័ន្ធនៃ ស្ថានទូតគេប៉ុណ្ណោះ។ ចំណែកសេនានុព័ន្ធអាមេរិក ខាងបញ្ហាការពារជាតិ បានបដិសេធ ហើយ ថែមទាំងលំអិតថា ក្រុងវ៉ាស៊ីនតោន មិនបញ្ជូនតំណាងផ្លូវការរបស់ខ្លួនឲ្យមានចូលរួមឡើយ។
តាមដែលលោករដ្ឋមន្ត្រីការពារជាតិរុស្ស៊ី Serguei Shoigou បានថ្លែងពេលបើកសន្និសីទនេះ ប្រធានបទធំៗជាចម្បងគឺអំពីសន្តិសុខនៅតំបន់ អាស៊ីប៉ាស៊ីហ្វិក , បញ្ហាសង្គ្រាមនិងសន្តិភាព នៅអឺរ៉ុប បញ្ហាសន្តិសុខពិភពលោក និងសហប្រតិបត្តិការយោធា។ សន្និសីទ ក៏ផ្តោតការយកដាក់ដាច់ដោយឡែក ទៅលើស្ថានការណ៍នៅដើមបូព៏ា ទៅលើតួនាទីនៃកងកម្លាំងប្រដាប់អាវុធក្នុងការប្រឈមទល់នឹង“បដិវត្តន៍ពណ៏” ទៅលើការធានាសន្តិសុខនៅតំបន់អាស៊ីកណ្តាល។
គោលដៅសន្និសីទគឺពង្រឹងសហប្រតិបត្តិការ រវាងក្រសួងយោធា ស្វែងរកដោយរួមគ្នាផ្លូវ សម្រាប់តទល់នឹងគ្រោះថ្នាក់ថ្មីៗ។ តាមសម្តី លោករដ្ឋមន្ត្រីរុស្ស៊ីជាប្រទេសម្ចាស់ផ្ទះ ក្នុង១ឆ្នាំកន្លងទៅតាំងពីសន្និសីទលើកមុនមកពិភពលោកមិនមានសុខសន្តិភាពកាន់តែមាំទាំឡើយ។
ផ្ទុយទៅវិញ ភាពច្របូកច្របល់បោកកញ្ជ្រោក នៅតំបន់ដើមបូព៌ា ភេរវកម្មកើតមាននៅគ្រប់ទិសទី លំហូរជនភៀសខ្លួនចេញមកពី ប្រទេសដែលខ្ទេចខ្ទាំដោយភ្លើងសង្គ្រាម អស់ទាំងនេះ ជាគ្រោះថ្នាក់ដល់ពិភពលោកហើយ អាចជំនះលើស្ថានភាពបែបនេះទៅកើតលុះណាតែតាមផ្លូវស្រាក់កម្លាំងគ្នា។ ក៏ប៉ុន្តែ ដែលគួរតែ រួបរួមគ្នាសោះ អ្នកនយោបាយខ្លះនៅបស្ចិមលោក បែរទៅជាបង្កជម្លោះជាមួយរុស្ស៊ីទៅវិញ។
លោកមេទ័ពរុស្ស៊ីនេះគូសបញ្ជាក់ថាបស្ចិមលោកកំពុងតែវាតសង្គ្រាមឃោសនាយ៉ាងឃោរឃៅឥតសម្រុះសម្រួលឡើយទល់នឹងរុស្ស៊ី។ មានបន្លឺឡើង សេចក្តីថ្លែងការណ៍ ស្តីអំពីការគម្រាម កំហែងស្អីណា ពីខាងម៉ូស្គូ ដល់បណ្តាប្រទេសអឺរ៉ុប ដូច្នេះ គេចាំបាច់ត្រូវតែ បង្កើនកម្លាំងយោធា សម្រាប់ទប់នឹងរុស្ស៊ី។ ក្នុងឋានៈជាលេសគេថា រុស្ស៊ី ចេះតែខិតចូលទៅជិតនឹងព្រំដែនអូតង់ប៉ុន្តែតាមពិត គឺ អូតង់ទេតើ ដែលបានរំកិលរចនាសម្ព័ន្ធយោធាខ្លួន មកនៅកៀកជាប់ទៅហើយនឹងព្រំដែនរុស្ស៊ី។
ព្រមជាមួយនេះ លោករដ្ឋមន្ត្រីការពារជាតិរុស្ស៊ី ក៏បានលើកឡើងពីចំណុចវិជ្ជមានដែរនៃ សហប្រតិបត្តិការរវាងក្រុងម៉ូស្គូនិងវ៉ាស៊ីនតោនក្នុងការប្រយុទ្ធទល់នឹង ពួកភេរវជននៅស៊ីរី ហើយ ម៉ូស្គូ ត្រៀមធ្វើសហប្រតិបត្តិការនេះ ឲ្យកាន់តែជិតស្និទ្ធឡើង។ គាត់សង្កេតឃើញថា ស.រ.អា. និង រុស្ស៊ី ដែលជាសមាជិកអចិន្ត្រៃយ៍ នៃក្រុមប្រឹក្សាសន្តិសុខអ.ស.ប.ត្រូវរែកលើស្មាខ្លួន នូវនាទី ទួលខុសត្រូវ ចំពោះការទ្រទ្រង់ឲ្យមានសន្តិភាពលើភពផែនដី។
លោកនាយអគ្គសេនាធិការដ្ឋានកងទ័ពរុស្ស៊ី ឧត្តមសេនីយ Valery Guerassimov ពីចំណែកខ្លួន បានថ្លែងពីលើវេទិកាសន្និសីទថា របបឈប់បាញ់ដ៏ផុយស្រួយនៅស៊ីរី ស្ថិតនៅក្រោមគ្រោះថ្នាក់ ជាប់ជានិច្ច បូកទាំងមកពីសកម្មភាព ប្រទេសតួកគីនៅជិតខាង ដែលបន្តឧបត្ថម្ភដល់ ពួកភេរវជន នៅស៊ីរីជាអាវុធ ស្បៀងរំសេវនិងថ្នាំពេទ្យ។ មិនតែប៉ុណ្ណោះ ពួកភេរវជនដែលត្រូវរបួស ថែមទាំងទទួលការស្នាក់ព្យាបាល នៅតាមមន្ទីរពេទ្យតួកគីទៅផង។ គាត់ថា មិនអាចកំទេច ភេរវនិយមឡើយ បើមិនប្រើកម្លាំងអាវុធទេ ហើយប្រើនោះឲ្យបានមុនពួកវា។
ចំណែក លោករដ្ឋមន្ត្រីការពារជាតិ សាធារណរដ្ឋប្រជាមានិតចិន Chang Wanquan បានថ្លែងថា នៅតាមទិសដៅជំនះលើពួកភេរវជន ចិននឹងបង្កើនសមយុទ្ធជាមួយរុស្ស៊ី ហើយគាត់ប្រឆាំងនឹងការលូកដៃពីក្រៅ ចូលក្នុងកិច្ចការផ្ទៃក្នុងរបស់រដ្ឋនេះឬនោះ។
“លោកអគ្គលេខាធិការ អ.ស.ប.បាន គីមូន ចាត់ទុកសន្និសីទក្រុងម៉ូស្គូថា ជាវេទិកាដ៏ល្អសម្រាប់ រៀបរយកិច្ចសហប្រតិបត្តិការ។ ១០ឆ្នាំមុន បណ្តារដ្ឋសមាជិក អ.ស.ប. បានតាក់តែងឡើងយុទ្ធសាស្ត្រ ខាងប្រយុទ្ធ ទល់នឹងភេរវនិយម។ ឥឡូវចាំបាច់ត្រូវតែលើកយក មកប្រើវិញ បទពិសោធន៍ ដែលមានសន្សំបានតាំងពីពេលនោះមក។ រួចពិតជាសន្និសីទនេះឯង ដែល អនុញ្ញាតឲ្យសម្រេចបាននូវគម្រោងដែលមានគ្រោងទុក“សេចក្តីនេះ ថ្លែងដោយ
អគ្គលេខារង របស់គាត់ គឺលោក Jeffrey Feltman។
គួរនិយាយថា មុនដល់សន្និសីទនេះ ពោលគឺក្នុងថ្ងៃ ២៦មេសា នៅម៉ូស្គូដដែល មានប្រព្រឹត្តទៅ កិច្ចប្រជុំជាន់ថ្នាក់រដ្ឋមន្ត្រការពារជាតិ រុស្ស៊ី-អាស៊ានដែលក្នុងនោះ ប្រាកដណាស់ មានទាំង រូប លោក ទា បាញ់ រដ្ឋមន្ត្រីការពារជាតិកម្ពុជា ។ ថ្លែងក្នុងកិច្ចប្រជុំនេះ លោក រដ្ឋមន្ត្រីការពារជាតិ រុស្ស៊ី Serguei Shoigou បានប្រកាសថា ម៉ូស្គូ ចាត់ទុក ប្រទេសទាំង១០ ក្នុងសមាគមនៃ រដ្ឋអាស៊ីអគ្នេយ៍ ថាជាដៃគូគន្លឹះ ខាងធានាសន្តិសុខនៅតំបន់អាស៊ី-ប៉ាស៊ីហ្វិក។
គាត់ គូស បញ្ជាក់ថា ការអភិវឌ្ឍន៍សហប្រតិបត្តិការ ជាមួយប្រទេសអាស៊ាន គឺជាអាទិភាពមួយ ពីក្នុង ចំណោមអាទិភាពរបស់រុស្ស៊ី។ គាត់កត់សម្គាល់ថា កិច្ចប្រជុំលើកនេះ ប្រព្រឹត្តទៅ នៅចំឆ្នាំខួប ទី២០ នៃភាពជាដៃគូសន្ទនា រវាង រុស្ស៊ី និង អាស៊ាន តែម្តង ម៉្លោះហើយបានជាជំនួបកំពូល រុស្ស៊ី-អាស៊ាន ក្នុងឆ្នាំខួបនេះ នឹងប្រព្រឹត្តទៅ គឺ នៅលើដីរុស្ស៊ីជាប្រទេសម្ចាស់ផ្ទះ ក្នុងខែឧសភា ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ