អំពើហិង្សាខ្លាំងក្លានៅក្រៅក្បួនបាតុកម្មប្រឆាំងសេចក្តីព្រាងច្បាប់ការងារបារាំង
នៅប្រទេសបារាំង ចលនាក្បួនបាតុកម្មប្រឆាំងនឹងពង្រាងច្បាប់ការងាររបស់រដ្ឋាភិបាលបារាំងកាលពីថ្ងៃព្រហស្បតិ៍ទី ២៨ មេសា បានប្រព្រឹត្តទៅដោយមានការប៉ះទង្គិចគ្នាយ៉ាងហិង្សាបំផុតនៅប៉ារីស និងនៅតាមខេត្ត។ អំពើហិង្សា ដែលបានបណ្តាលឲ្យមានអ្នករងរបួសទំាងខាងកងកម្លាំងរក្សាសណ្តាប់ធ្នាប់និងទាំងខាងក្រុមបាតុករ។ ក្នុងហេតុការណ៍នេះ អាជ្ញាធរបារាំង បានចាប់ខ្លួនមនុស្សប្រមាណ២១៤នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
យោងតាមអង្គការសហជីពបារាំង CGT មនុស្សចំនួន៦ម៉ឺននាក់បានចូលរួមក្នុងក្បួនបាតុកម្មកាលពីថ្ងៃព្រហស្បតិ៍ម្សិលមិញ ក៏ប៉ុន្តែយោងតាមតួលេខរបស់អាជ្ញាធរបារាំងវិញ អ្នកចូលរួមក្នុងចលនាបាតុកម្មមានចំនួនតែ ១៤ ០០០ទៅ ១៥ ០០០នាក់តែប៉ុណ្ណោះ។ ក្រៅពីដ្ឋធានីប៉ារីស ក្បួនដង្ហែរបាតុកម្មនេះ ក៏មានចំនួនប្រមាណជា២០៩ខ្សែ និងប្រមូលផ្តុំ បាតុករ ចំនួន ១៥ម៉ឺន៥០០០នាក់ ក្នុងនោះ យុវជន មាន១ម៉ឺន៥០០០នាក់- នេះបើយោងតាមតួរលេខរបស់ក្រសួងមហាផ្ទៃបារាំង។
ចលនាបាតុកម្មកាលពីម្សិលមិញ ក៏ដូចជាបាតុកម្មនៅលើកមុនៗដែរ ត្រូវបានប្រព្រឹត្តទៅដោយមានការផ្ទុះឡើង អំពើហិង្សាវាយប្រឡូកគ្នា រវាងក្រុមបាតុករនិងកងកម្លាំងរក្សាសណ្តាប់ធ្នាប់នៅក្នុងរដ្ឋធានីប៉ារីសនិងនៅខែត្រ Rennes ឬក៏នៅខែត្រ Lyon ក្រៅក្បួនដង្ហែរបាតុកម្ម។ នៅប៉ារីស ភាពស្ងប់ស្ងាត់ បានចាប់មានឡើងវិញនៅពេលព្រលប់។
នៅក្នុងហេតុការណ៍នេះ លោកនាយករដ្ឋមន្ត្រីបារាំង Manuel Valls នៅក្នុងសារTweeter មួយ បានធ្វើការថ្កោលទោសយ៉ាងខ្លាំងក្លាទៅលើអំពើហិង្សាដែលបង្កឡើងដោយក្រុមជនមួយចំនួនដែលលោកចោទថា គ្មានការទទួលខុសត្រូវ ។ លោក នាយករដ្ឋមន្ត្រី Manuel Valls ថែមទាំងបានបង្ហាញការគាំទ្រយ៉ាងពេញទំហឹងដែរដល់ក្រុមនគរបាលបារាំង។ លោក Manuel Valls ថែមទាំងបានបញ្ជាក់ទៀតថា “ក្រុមជនដៃដល់នៅក្នុងអំពើហិង្សា នឹងត្រូវចាប់បញ្ជូនខ្លួនទៅ ឲ្យតុលាការកាត់ទោសជាមិនខាន។
ចំណែករដ្ឋមន្ត្រីក្រសួងមហាផ្ទៃបារាំងវិញ លោក Bernard Cazeneuve បានគូសបញ្ជាក់ប្រាប់ថា” នៅក្នុងការផ្ទុះអំពើហិង្សាកាលពីយប់ថ្ងៃព្រហស្បតិ៍នោះ មាននគរបាលឬកងកម្លំាងរក្សាសណ្តាប់ធ្នាប់ ចំនួន៧៨នាក់ បានត្រូវរងរបួស ក្នុងនោះ មាន ៣នាក់ត្រូវរងរបួសធ្ងន់នៅទីក្រុងប៉ារីស។ នគរបាលបារាំង-ក៏បានធ្វើអន្តរាគមព័ទ្ធចាប់ បានជនចំនួន២១៤នាក់នៅទូទាំងប្រទេស។ រដ្ឋមន្ត្រីក្រសួងមហាផ្ទៃបារាំង ថែមទាំងបានទាមទារ ឲ្យអ្នកចាត់ចែងក្បួនបាតុកម្ម ធ្វើការផ្តន្ទាទោស ទៅលើពួកជនដែលបានបង្កហិង្សាប្រឆាំងទល់នឹងកងកម្លាំងរក្សាសណ្តាប់ធ្នាប់ទៀតផង។
លើសពីនេះ លោក Bernard Cazeneuve បានធ្វើការរិះគន់ផងដែរ ទៅលើពួកអ្នក ដែល កំពុងតែព្យាយាមកេងយកចំណេញលើផ្នែកនយោបាយ នៅ លើ អំពើហិង្សាដែលបានផ្ទុះឡើងកាលពីយប់ថ្ងៃព្រហស្បតិ៍ម្សិលមិញនេះ នៅក្រៅក្បួនបាតុកម្មប្រឆាំងពង្រាងច្បាប់ការងារបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ