នាយករដ្ឋមន្ត្រីតួកគី ប្រកាសលែងចង់ឈរឈ្មោះសំរាប់អាណត្តិថ្មី
នាយករដ្ឋមន្ត្រីតួកគី លោក Ahmet Davutoglu ទើបបានជូនដំណឹងនៅថ្ងៃព្រហស្បតិ៍ម្សិលមិញ អំពីការដកខ្លួនចេញពីមុខតំណែងជាប្រមុខរដ្ឋាភិបាលនិងតួនាទីដឹកនាំគណបក្សកាន់អំណាចឈ្មោះ បក្សយុត្តិធម៌និងអភិវឌ្ឈន៍”AKP”។ ជាសេចក្តីសំរេចចិត្តមួយដែលកាន់តែជួយពង្រឹងការក្តោបក្តាប់អំណាចរបស់លោកប្រធានាធិបតីតួកគី Recep Tayyip Erdogan នៅក្នុងប្រទេសថែមទៀត។ គណបក្ស ”AKP” នឹងរៀបចំសមាជវិសាមញ្ញមួយ នៅថ្ងៃទី២២ឧសភាខាងមុខ ដែលនៅឱកាសនោះ លោកក៏នឹងមិនក្លាយខ្លួនជាបេក្ខជននៅក្នុងកាលៈទេសៈបែបបច្ចុប្បន្ននេះទេ-នេះជាការថ្លែងរបស់លោកនាយករដ្ឋមន្ត្រីតួកគី ក្នុងទឹកមុខដ៏មាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
មានកត្តាជាច្រើនដែលស្ថិតនៅពីក្រោយវិបត្តិខាងលើនេះ វិបត្តិដែលកាន់តែកើនឡើងៗនាអំឡុងប៉ុន្មានសប្តាហ៍ចុងក្រោយនេះ។ ដូច្នេះហើយ បានជា កាលពីម្សិលមិញ នាយករដ្ឋមន្ត្រីតួកគី លោក Ahmet Davutoglu បានថ្លែងពីការដកខ្លួនលោកចេញពីមុខតំណែងជាប្រមុខរដ្ឋាភិបាលនិងតួនាទីដឹកនាំគណបក្សកាន់អំណាចឈ្មោះ បក្សយុត្តិធម៌និងអភិវឌ្ឈន៍”AKP”ផងដែរ។
ទោះជាយ៉ាងណាក្តី នាយករដ្ឋមន្ត្រី តួកគី នៅតែអះអាងដែរថា លោកពុំមានការទាស់ទែងខ្វែងគំនិត ជាមួយនឹងលោកប្រធានាធិបតីតួកគី Recep Tayyip Erdogan ទេ ។ ប៉ុន្តែតាមការពិត វាហាក់ដូចជា លោកប្រធានាធិបតីតួកគីនេះឯង មានជំហរដាច់ខាតមួយ ជាងពេលណាៗទាំងអស់ គឺការក្តោបក្តាប់គ្រប់គ្រងប្រទេសតួកគីតែម្នាក់ឯងគត់ ។
ចំណែក នាយករដ្ឋមន្ត្រីតួកគី លោក Ahmet Davutoglu វិញ កន្លងមកដែលកាន់អំណាចចាត់ចែងការងារនៅក្នុងប្រទេស ទោះបី អំណាចគាត់ ពុំពេញលេញក្តី បានខិតធ្វើការងារដ៏សំខាន់ៗ នៅពេលខ្លះ ជាអាទិ៍នៅឱកាសនៃកិច្ចជជែកពិភាក្សាគ្នាជាមួយអឺរ៉ុប នៅលើបញ្ហាជនភៀសខ្លួន ដែលលោក បានប្រឹងប្រែងយ៉ាងអស់ពីសមត្ថភាពដើម្បីដោះស្រាយបញ្ហានេះឲ្យបានសំរេច តាំងពីដើមរហូតដល់ចុងបញ្ចប់
តែនារយៈពេលប៉ុន្មានថ្ងៃចុងក្រោយនេះ គេបានមើលឃើញ ថាលោក Ahmet Davutoglu និងលោកRecep Tayyip Erdogan មានគំនិតមិនត្រូវគ្នាកាន់តែខ្លាំងឡើងៗ នៅលើបញ្ហានយោបាយនានា ដែលដឹកនាំដោយលោកនាយករដ្ឋមន្ត្រី។ ចំណែកលោកប្រធានាធិបតីតួកគីវិញ ក្នុងបច្ចប្បន្ននេះ ក៏ ទំនងជាចង់ បានបុគ្គល ដ៏ស្មោះត្រង់ ម្នាក់នៅក្នុងចំណោមអ្នកស្មោះត្រង់នឹងរូបលោក ឲ្យឡើងកាន់មុខតំណែងជាប្រមុខរដ្ឋាភិបាលតួកគីដើម្បីធ្វើការជាមួយលោកសំរាប់អាណត្តិជាបន្តទៀត។
ដូច្នេះហើយ ឈ្មោះបុគ្គលដែលត្រូវបានគេលើកឡើងដើម្បីដាក់ជំនួសលោក Ahmet Davutoglu ក៏គេបានដឹងរួចជាស្រេចហើយដែរ គឺ លោករដ្ឋមន្ត្រីក្រសួងថាមពល ដែលពុំមាននណារក្រៅពីកូនប្រសារផ្ទាល់របស់លោកប្រធានាធិបតី Erdogan ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ