អ.ស.ប.បដិសេធលក្ខន្តិកៈគណៈកម្មការការពារអ្នកកាសែតជាអង្គការក្រៅរដ្ឋាភិបាល
អគ្គលេខាធិការអង្គការសហប្រជាជាតិ បាន គីមូន បានសម្តែងការខកចិត្តយ៉ាងខ្លាំង នៅចុងសប្តាហ៍នេះ ចំពោះសេចក្តីសម្រេចចិត្តបដិសេធមិនឱ្យ គណៈកម្មាធិការការពារអ្នកកាសែត មានលក្ខន្តិកៈជាស្ថាប័នអង្គការក្រៅរដ្ឋាភិបាលមួយ របស់អង្គការសហប្រជាជាតិ។ តំណាងភាគីបារាំង អាមេរិក សន្យាថានឹងបោះឆ្នោតប្រឆាំងបកនឹងសេចក្តីសម្រេចបដិសេធនេះវិញ នៅខែកក្កដាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
គណៈកម្មាធិការការពារអ្នកកាសែត បានស្នើសុំលក្ខន្តិកៈជាអង្គការក្រៅរដ្ឋាភិបាល តាំងពីឆ្នាំ ២០១២ ប៉ុន្តែសំណើនេះត្រូវបានរុញចេញ ដោយគ្មានបោះឆ្នោតសម្រេចចំនួន៧ដងមកហើយ។ នៅពេលនេះ សំណុំបែបបទបានឈានដល់ការបោះឆ្នោត តែរុស្ស៊ី ចិន និងអាហ្វ្រិកខាងត្បូង អាស៊ែបៃហ្សង់ ប៊ូរុនឌី គុយបា ប៉ាគីស្ថាន នីការ៉ាហ្កា ស៊ូដង់ វ៉េណេស៊ុយអេឡា ... សរុប១០ប្រទេស ជាសមាជិកគណៈកម្មាធិការអង្គការក្រៅរដ្ឋាភិបាលរបស់អង្គការសហប្រជាជាតិ បានបដិសេធមិនយល់ព្រមឱ្យដាក់បញ្ជូល គណៈកម្មាធិការការពារអ្នកកាសែត ជាអង្គការទេ។ តួកគី ឥណ្ឌា និងអ៊ីរ៉ង់ បានបោះឆ្នោតអនុប្បវាទ។ មានតែអាមេរិក ក្រិក អ៊ីស្រាអែល ហ្គីណេ ម៉ូរីស អ៊ុយរូហ្គាយប៉ុណ្ណោះ ដែលគាំទ្រ។
លោកបានគីមូន អគ្គលេខាធិការអង្គការសហប្រជាជាតិ ដែលបានគាំទ្រការងាររបស់គណៈកម្មាធិការនេះយ៉ាងមុះមុតតាំងពីដើមមក បានសម្តែងការខកចិត្តយ៉ាងខ្លាំងចំពោះលទ្ធផលឆ្នោតដែលរារាំងមិនឱ្យគណៈកម្មាធិការការពារអ្នកកាសែត ដែលជាអ្នកការពារសេរីភាពសារព័ត៌មាន បានក្លាយជាស្ថាប័នមួយរបស់អង្គការសហប្រជាជាតិ និងមានចំណែកបញ្ចេញមតិយោបល់ ការពារសង្គមស៊ីវិល ដូចអង្គការការពារសិទ្ធិមនុស្ស។
ក្រៅអំពីភាពសោកសៅរបស់ប្រធានគណៈកម្មាធិការការពារអ្នកកាសែត សហរដ្ឋអាមេរិក ក៏បានប្រកាសឱ្យដឹងថានឹងលើកសំណើនេះទៅឱ្យសមាជិកក្រុមប្រឹក្សាសេដ្ឋកិច្ចនិងសង្គមនៃអង្គការសហប្រជាជាតិ ដែលជាស្ថាប័នមេរបស់គណៈកម្មាធិការអង្គការក្រៅរដ្ឋាភិបាល ពិនិត្យឡើងវិញនៅខែកក្កដាខាងមុខ។ បារាំងជាសម្ព័ន្ធមិត្ត និងដែលការពារដាច់ខាតសេរីភាពនៃការបញ្ចេញមតិ បានសន្យាថាឱ្យតែមានឱកាសបារាំងនឹងបោះឆ្នោតការពារគណៈកម្មាធិការការពារអ្នកកាសែត ដើម្បីលុបសេចក្តីសម្រេចចិត្តបដិសេធថ្ងៃនេះភ្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ