Sipri៖អាមេរិក និងរុស្ស៊ីបានកាត់បន្ថយបរិមាណក្បាលនុយក្លេអ៊ែរ តែបង្កើនសមត្ថភាព និងប្រសិទ្ធិភាព
វិទ្យាស្ថានស្រាវជ្រាវសន្តិភាពអន្តរជាតិហៅកាត់ថា ស៊ីព្រី (Sipri) ដែលមានទីស្នាក់ការក្នុងទីក្រុងស្តុកខុល ប្រទេសស៊ុយអែតបានបញ្ជាក់ឲ្យដឹងនៅថ្ងៃចន្ទ ទី១៣ មិថុនានេះថា អាមេរិក និងរុស្ស៊ីដែលជាមហាអំណាចនុយក្លេអ៊ែរក្នុងលោកបាន និងកំពុងបន្តកាត់បន្ថយចំនួនក្បាលនុយក្លែអ៊ែររបស់ខ្លួន។ តែទន្ទឹមនឹងការកាត់បន្ថយបរិមាណ ប្រទេសទាំងពីរក៏បានធ្វើឲ្យទំនើប តាមរយៈការបង្កើនគុណភាព និងប្រសិទ្ធភាពចំនួនក្បាលនុយក្លេអ៊ែរដែលនៅសេសសល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
គិតត្រឹមដើមឆ្នាំ ២០១៦ នេះ ចំនួនក្បាលនុយក្លេអ៊ែរសរុបនៅក្នុង ៩ប្រទេសបូករួមគ្នា គឺអាមេរិក រុស្ស៊ី អង់គ្លេស បារាំង ចិន ឥណ្ឌា ប៉ាគីស្ថាន អ៊ីស្រាអែល និងកូរ៉េខាងជើងមានចំនួន ១៥ ៣៩៥ក្បាល ក្នុងនោះ រុស្ស៊ីមាន ៧ ២៩០ក្បាល ហើយអាមេរិកមានប្រមាណជា ៧ ០០០ក្បាល ពោលតិចជាងកាលពី១ឆ្នាំមុនដែលមាន ១៥ ៨៥០ក្បាល។ ម្យ៉ាងទៀត នៅក្នុងចំណោម ១៥ ៣៩៥ក្បាល មាន ៤ ១២០ក្បាលត្រូវបានគេដាក់ពង្រាយ។ សូមជម្រាបជូនថានៅពាក់កណ្តាលទសវត្សឆ្នាំ ៨០ ពិភពលោកមានចំនួនក្បាលនុយក្លេអ៊ែរដល់ទៅ ៧០ ០០០ក្បាល ហើយកាលធ្លាក់ចុះជាង ៥០ ០០០ក្បាលក្នុងរយៈពេលជាង ៣៦ឆ្នាំកន្លងទៅក៏ដោយសារតែអាមេរិក និងរុស្ស៊ីបានចូលរួមកាត់បន្ថយយ៉ាងច្រើនសម្បើម។
ការកាត់បន្ថយរបស់មហាអំណាចទាំងពីរជាលទ្ធផលបានមកពីការចុះហត្ថលេខាលើសន្ធិសញ្ញាចំនួន ៣ គិតតាំងពីឆ្នាំ ១៩៩១ រួមទាំងការសម្រេចចិត្តជាលក្ខណៈឯតោភាគីផង។ ទោះជាយ៉ាងនេះក្តី Sipri បានកាត់សម្គាល់ឃើញថា ការកាត់បន្ថយចំនួនក្បាលនុយក្លេអ៊ែររបស់អាមេរិក និងរុស្ស៊ីនារយៈពេលចុងក្រោយនេះហាក់ដូចជាមានចង្វាក់យឺត បើធៀបនឹង ១០ឆ្នាំមុន ពិសេសតាំងពីវ៉ាស៊ីតោន និងមូស្គូមានកិច្ចព្រមព្រៀងថ្មី START ស្តីពីការកាត់បន្ថយសព្វាវុធដែលបានចូលធរមានតាំងពីឆ្នាំ ២០១១។
យោងតាម Sipri ក្នុងចំណោមប្រទេសដែលមានបំពាក់ក្បាលនុយក្លេអ៊ែរ គ្មានប្រទេសណាមួយបានត្រៀមខ្លួនដើម្បីបោះបង់ចោលទាំងស្រុងទេ ហើយអាមេរិក និងរុស្ស៊ីដែលបានយល់ព្រមកាត់បន្ថយចំនួនក្បាលនុយក្លេអ៊ែរនោះ ក៏បានបង្វែរទៅធ្វើឲ្យទំនើបនូវក្បាលនុយក្លេអ៊ែរដែលនៅសេសសល់ តាមរយៈបង្កើនសមត្ថភាព និងប្រសិទ្ធិភាព។ នៅក្នុងសេចក្តីសន្និដានរបស់ខ្លួន Sipri បានសម្តែងការសោកស្តាយចំពោះកង្វះឆន្ទៈពិតប្រាកដក្នុងការកាត់បន្ថយអាវុធនុយក្លេអ៊ែរនៅក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ