តុលាការចិនកាត់ទោសពិរុទ្ធជនពីររូបឲ្យជាប់ពន្ធនាគារពីបទពុករលួយ
ប្រទេសចិននៅថ្ងៃពុធ១៥មិថុនា តុលាការនៅក្រុងយីងចង់ខេត្តហុយបេ ប៉ែកកណ្តាល ប្រទេស បានកាត់ទោសកូនប្រុសនិងភរិយារបស់លោក Zhou Yongkang ឲ្យជាប់គុក ម្នាក់១៨ឆ្នាំនិងម្នាក់ទៀត៩ឆ្នាំ ពីបទប្រព្រឹត្តអំពើពុករលួយនិងធ្វើជំនួញដោយខុសច្បាប់។ លោក Zhou Yongkang គឺជាអតីតចៅហ្វាយនាយដ៏មានអំណាចម្នាក់នៃក្រុមហ៊ុនសន្តិសុខដែលអស់មុខតំណែងដោយសារព្រព្រឹត្តអំពើពុករលួយដែរ។
ចុះផ្សាយនៅថ្ងៃ៖
ស្តាប់ - ០១:៤០
តុលាការនៅក្រុងយីងចង់ ក្នុងខេត្តហុយបេ បានទទួលស្គាល់ថា លោកZhou Bin ដែលជាកូនប្រុសលោក Zhou Yongkang ត្រូវជាប់ពិរុទ្ធពីបទពុករលួយនឹងរកស៊ីខុសច្បាប់។
ឪពុករបស់លោក Zhou Bin គឺលោក Zhou Yongkang ដែល ជាឥស្សរជនជាន់ខ្ពស់ម្នាក់នៃរបបចិននិងដែលត្រូវអស់បុណ្យសក្តិនៅ ខណៈពេលដែលលោកប្រធានាធិបតី ស៊ី ជីនពីង
បានចាប់ផ្តើមយុទ្ធនាការកំចាត់អំពើពុករលួយនៅទូទាំងប្រទេស នាពេលដែលលោកឡើងកាន់អំណាចនៅចុងឆ្នាំ២០១២។ អតីតមន្ត្រីជាន់ខ្ពស់ចិនរូបនេះត្រូវបានតុលាការកាត់ទោសឲ្យជាប់គុគអស់មួយជីវិតនៅខែមិថុនាឆ្នាំ២០១៥ ពីបទប្រព្រឹត្តអំពើពុករលួយ រំលោភអំណាច និងបើកទម្លាយការសម្ងាត់របស់រដ្ឋ។
លោក Zhou Bin ដែលជាកូនវិញ មិនគ្រាន់តែត្រូវជាប់គុកចំនួន១៨ឆ្នាំប៉ុណ្ណោះទេ តែត្រូវបានតុលាការនៅក្រុង Yi chang ឲ្យបង់ប្រាក់ពិន័យចំនួន៣៥០លានយ័ន ឬស្មើនឹង៤៧លានអឺរ៉ូទៀត។
តាមដំណឹងផ្លូវការ លោក Zhou Bin ត្រូវបានគេដាក់គុកតាំងពីថ្ងៃពុធម៉្លេះ។ គួរបញ្ជាក់ថា លោក Zhou Bin ធ្លាប់មានទំនាក់ទំនងយ៉ាងជិតស្និតជាមួយមហាសេដ្ឋីចិនម្នាក់ខាងឧស្សាហកម្មរ៉ែឈ្មោះ Liu Han ដែលត្រូវជាប់ចោទពីបទដឹកនាំក្រុមបនMafiaមួយនិងត្រូវបានគេប្រហារជិវិតកាលពីឆ្នាំទៅមិញ។
ចំណែកលោកស្រី Jin Xiaoye ម្តាយរបស់លោក Zhou Bin ដែល ជាភរិយារបស់ លោក Zhou Yongkang ត្រូវតុលាការកាត់ទោសឲ្យជាប់គុក៩ឆ្នាំពីបទទទួលសំណូកសូកប៉ាន់។
សូមបញ្ជាក់ថា ជនជាប់ចោទទាំងពីររូបនេះ ពុំបានធ្វើការប្តឹងតវ៉ាទៅឧទ្ធរណ៍ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ