Brexit៖បើអង់គ្លេសមិនទាន់បញ្ចប់សមាជិកភាពជាផ្លូវការទេ សហភាពអឺរ៉ុបក៏នឹងមិនចរចាអ្វីទាំងអស់
ចុះផ្សាយនៅថ្ងៃ៖
ស្តាប់ - ០៧:០៦
ព្រឹត្តិការណ៍ Brexit កំពុងបន្តក្លាយជាបច្ចុប្បន្នភាពក្តៅគគុក និងចម្រូងចម្រាសនៅផ្ទៃក្នុងសហភាពអឺរ៉ុប។ ៥ថ្ងៃក្រោយការបោះឆ្នោតប្រជាមតិដែលប្រជារាស្រ្តអង់គ្លេសបានសម្រេចផ្តាច់ខ្លួនចេញពីសហភាពអឺរ៉ុបមក កិច្ចប្រជុំរបស់ថ្នាក់ដឹកនាំអឺរ៉ុប ពិសេសក្រុមប្រទេសស្ថាបនិកអឺរ៉ុបបាន និងកំពុងបន្តជួបប្រជុំជាហូរហែ។ នៅថ្ងៃអង្គារ ទី២៨ និងថ្ងៃពុធ ទី២៩ មិថុនា សហភាពអឺរ៉ុបបើកកិច្ចប្រជុំវិសាមញ្ញ និងជំនួបកំពូលនៅក្នុងទីក្រុងព្រុចសែល ប្រទេសបែលហ្សិក។ នៅថ្ងៃចន្ទ ទី២៧ មិថុនា ប្រទេសអ៊ីតាលី បារាំង និងអាល្លឺម៉ង់បានរួមប្រជុំគ្នាក្នុងទីក្រុងប៊ែរឡាំង ប្រទេសអាល្លឺម៉ង់។
ប្រទេសអ៊ីតាលី បារាំង និងអាល្លឺម៉ង់សុទ្ធសឹងជាប្រទេសដែលស្ថិតក្នុងចំណោមប្រទេសស្ថាបនិកអឺរ៉ុបទាំង ៦ ជាមួយនឹងប្រទេសបែលហ្ស៊ិក ហូឡង់ និងលុចសំបួ។ តែកិច្ចប្រជុំក្នុងទីក្រុងប៊ែរឡាំង ប្រទេសអាល្លឺម៉ង់នៅថ្ងៃចន្ទ ទី២៨ មិថុនា គឺមានតែអ៊ីតាលីចូលរួមដោយលោកនាយករដ្ឋមន្រ្តីម៉ាតេអូ រ៉េនហ្ស៊ី អាល្លឺម៉ង់ដោយលោកស្រីអង់ហ្កឺឡា មែរកិល និងបារាំងដោយលោកប្រធានាធិបតីហ្រ្វង់ស័រ ហូឡង់។ មានប្រធានបទសំខាន់ចំនួនពីរដែលថ្នាក់ដឹកនាំកំពូលទាំង ៣រូបបានលើកយកទៅជជែក ទី១ គឺគម្រោងកំណែទម្រង់អឺរ៉ុបនៅលើគ្រប់វិស័យក្នុងគោលដៅជួយផ្តល់សន្ទុះចរន្តសហភាពអឺរ៉ុបឡើងវិញ និងទី២ គឺបញ្ជាក់ពីជំហរសហភាពអឺរ៉ុបចំពោះអង់គ្លេសដែលទើបសម្រេចផ្តាច់ខ្លួនចេញសហភាពអឺរ៉ុប។
លោកស្រីមែរកិល លោករ៉េនហ្ស៊ី និងលោកហូឡង់បាននិយាយសម្លេងតែមួយដូចគ្នាថា បើអង់គ្លេសនៅមិនទាន់ផ្តើមនីតិវិធីផ្តាច់ខ្លួនជាផ្លូវការដូចដែលមាត្រាទី៥០ នៃសន្ធិសញ្ញាក្រុងលីស្បូនបានតម្រូវឲ្យធ្វើទេ នោះសហភាពអឺរ៉ុបនឹងមិនចរចាអ្វីទាំងអស់ជាមួយអង់គ្លេស។ គួររម្លឹកជូនថា ប្រជារាស្រ្តអង់គ្លេសបានបោះឆ្នោតចេញពីសហភាពអឺរ៉ុបហើយ តែមកដល់ថ្ងៃនេះ ម៉ោងនេះ រដ្ឋាភិបាលអង់គ្លេសនៅមិនបានបំពេញបែបបទចាកចេញផ្ញើទៅក្រុមប្រឹក្សាអឺរ៉ុប និងគណៈកម្មការអឺរ៉ុបជាផ្លូវការនៅឡើយទេ។
ជាថ្មីម្តងទៀត និងខុសពីលោកស្រីមែរកិលដែលអំពាវនាវឲ្យរក្សាភាពអត់ធ្មត់ លោកប្រធានាធិបតីបារាំងហូឡង់ចង់ឲ្យអង់គ្លេសបំពេញបែបបទចាកចេញឲ្យបានលឿនបំផុត។ លោកហូឡង់បានបញ្ជាក់ថា សហភាពអឺរ៉ុបនៅមានការងារជាច្រើនទៀតដែលត្រូវធ្វើសម្រាប់អនាគតវែងឆ្ងាយរបស់ខ្លួន ពោលមិនមែនអង្គុយរង់ចាំដោះស្រាយតែបញ្ហាអង់គ្លេសមួយប៉ុណ្ណោះ។ អ្វីដែលលោកហូឡង់ចង់មានន័យនោះគឺថា បើអង់គ្លេសសម្រេចចិត្តលែងលះពីសហភាពអឺរ៉ុបហើយ គួរតែចេញឲ្យឆ្ងាយពីមុខមាត់អឺរ៉ុបទៅ កុំនៅត្រេងត្រាងយូរពេក។
លោកដាវីដ កាមេរ៉ូនមិនប្រញាប់ចាកចេញភ្លាមៗទេ
ប្រតិកម្មរបស់អង់គ្លេសចំពោះសំណើទាមទារយ៉ាងទទូច និងច្រើនដងរបស់សហភាពអឺរ៉ុបត្រូវបានធ្វើឡើងចេញពីបបូរមាត់របស់លោកនាយករដ្ឋមន្រ្តីដាវីដ កាមេរ៉ុនក្នុងថ្ងៃចន្ទ ទី២៨ មិថុនានៅសភាអង់គ្លេសក្នុងទីក្រុងឡុងដ៏។ អន្តរាគមន៍របស់លោកកាមេរ៉ុននៅចំពោះមុខក្រុមអ្នកតំណាងរាស្រ្តបានធ្វើឡើង មួយថ្ងៃមុននឹងលោកទៅចូលរួមនៅក្នុងជំនួបកំពូលអឺរ៉ុបក្នុងថ្ងៃទី២៨ និងទី២៩ មិថុនាក្នុងទីក្រុងព្រុចសែល ប្រទេសបែលហ្ស៊ិក។ លោកកាមេរ៉ុនបានបញ្ជាក់ច្បាស់ៗថា អង់គ្លេសនឹងមិនប្រញាប់ដាក់ពាក្យបញ្ឈប់សមាជិកភាពពីសហភាពអឺរ៉ុបភ្លាមៗពេលនេះទេ និងថា អង់គ្លេសត្រូវការពេលចរចាជាមួយអឺរ៉ុបដើម្បីនិយាយគ្នាឲ្យបានច្បាស់ពីទំនាក់ទំនងដែលអង់គ្លេសត្រូវមានជាមួយអឺរ៉ុបនៅពេលដែលអង់គ្លេសលែងស្ថិតជាសមាជិកអឺរ៉ុប។
« នៅថ្ងៃស្អែក ខ្ញុំនឹងទៅប្រជុំកំពូលអឺរ៉ុប ហើយប៉ុន្មានថ្ងៃកន្លងទៅនេះ ខ្ញុំបានជជែកជាមួយលោកស្រីប្រមុខរដ្ឋាភិបាលអាល្លឺម៉ង់ អង់ហ្កេឡា មែរកិល និងលោកប្រធានាធិបតីបារាំង ហ្វ្រង់ស័រ ហូឡង់ ព្រមទាំងជាមួយនឹងមេដឹកនាំអឺរ៉ុបមួយចំនួនផ្សេងទៀត។ យើងជជែកគ្នា អំពីភាពចាំបាច់ក្នុងការត្រៀមបើកកិច្ចចរចាលើការចាកចេញរបស់អង់គ្លេស និងជាពិសេស គឺបញ្ជាក់ពីជំហររបស់យើងថា អង់គ្លេសនឹងមិនដាក់ពាក្យសុំបញ្ឈប់សមាជិកភាពពីសហភាពអឺរ៉ុបភ្លាមៗនៅពេលនេះទេ។
មុននឹងធ្វើ យើងចាំបាច់ត្រូវតែកំណត់គ្នាជាមុនសិនថា តើនៅពេលដែលអង់គ្លេសចេញទៅ តើអង់គ្លេស និងសហភាពអឺរ៉ុបត្រូវមានទំនាក់ទំនងនឹងគ្នាបែបណា? ហើយរឿងអស់ទាំងនេះ ខ្ញុំនឹងទុកឲ្យនាយករដ្ឋមន្រ្តីថ្មីជាអ្នកសម្រេច។
ខ្ញុំក៏បានបញ្ជាក់ប្រាប់ទៅប្រធានក្រុមប្រឹក្សាអឺរ៉ុប និងប្រធានគណៈកម្មការអឺរ៉ុបផងដែរ ហើយខ្ញុំនឹងប្រាប់មេដឹកនាំប្រទេសសមាជិកសហភាពអឺរ៉ុបនៅក្នុងជំនួបកំពូលថ្ងៃស្អែកទៀតថា ការចាប់ផ្តើមដាក់ពាក្យសុំឈប់ពីសហភាពអឺរ៉ុបនៅពេលណា គឺជាសិទ្ធិអធិបតេយ្យរបស់អង់គ្លេស ហើយមានតែអង់គ្លេសទេដែលមានសិទ្ធិសម្រេច »
សហភាពអឺរ៉ុបផ្តើមគិតគូរកំណែទម្រង់ដើម្បីបញ្ជៀសការបំបែកខ្លួនរបស់សមាជិកផ្សេង
អ្វីដែលសំខាន់ និងជាបន្ទាន់នៅចំពោះមុខរបស់សហភាពអឺរ៉ុប គឺអនុម័តនូវសេចក្តីសម្រេចចិត្តមួយដើម្បីបង្ខំលោកនាយករដ្ឋមន្រ្តីអង់គ្លេសដាវីដ កាមេរ៉ុនឲ្យរៀបចំបែបបទបញ្ឈប់សមាជិកភាពអង់គ្លេសពីអឺរ៉ុបភ្លាមៗ ពោលមិនត្រូវបន្តអូសបន្លាយពេលទេ។ សំណួរដែលកំពុងចោទនៅក្នុងជំនួបកំពូលពេលនេះគឺថា តើជាជំនួបកំពូលរវាងសមាជិកទាំង ២៨ប្រទេសដូចសព្វមួយដង ឬមួយក៏ជាជំនួបតែ ២៧ប្រទេសសមាជិកដោយគ្មានអង់គ្លេស ឬមួយក៏ជាជំនួប ២៧ បូក ១ ដោយរង់ចាំអង់គ្លេសចាកចេញជាផ្លូវការ។
យ៉ាងណាក៏ដោយនៅក្នុងជំនួបកំពូលរយៈពេល ២ថ្ងៃនេះ លោកនាយករដ្ឋមន្រ្តីអង់គ្លេសដាវីដ កាមេរ៉ុនក៏មានវត្តមានដែរ តែប្រហែលជាសម្លេងរបស់លោកទាក់ទងនឹងកិច្ចការផ្ទៃក្នុងរបស់អឺរ៉ុបមិនត្រូវបានគេរាប់បញ្ចូលទេ។ វត្តមានសំខាន់របស់លោក គឺដើម្បីចរចាជាមួយអឺរ៉ុបពីលក្ខខណ្ឌមួយចំនួនដែលអង់គ្លេសត្រូវបន្តមានជាមួយអឺរ៉ុបក្នុងនាមជាប្រទេសដៃគូ ពោលមិនមែនក្នុងនាមជាប្រទេសសមាជិកទៀតឡើយ។ ក្រៅពីបញ្ហាអង់គ្លេស ជំនួបកំពូលអឺរ៉ុបក៏នឹងផ្តើមគិតគូរធ្វើកំណែទម្រង់រចនាសម្ព័ន្ធអឺរ៉ុបដើម្បីចៀសវាងការផ្តាច់ខ្លួនរបស់ប្រទេសសមាជិកផ្សេងដូចករណីអង់គ្លេស។
លោកស្រីនាយករដ្ឋមន្រ្តីអាល្លឺម៉ង់មែរកិល សមភាគីអ៊ីតាលីលោករ៉េនហ្ស៊ី និងលោកប្រធានាធិបតីបារាំងហូឡង់ដែលបានប្រជុំគ្នានៅថ្ងៃចន្ទ ទី២៨ មិថុនាបានឯកភាពផ្តល់សន្ទុះអឺរ៉ុបលើ ៤ផ្នែក គឺការពារ កំណើនសេដ្ឋកិច្ច ការងារ និងការប្រកួតប្រជែង។ នៅក្នុងន័យនេះ ថ្នាក់ដឹកនាំកំពូលទាំង ៣នាក់បានកំណត់យកអាទិភាពសំខាន់ចំនួន ៣ គឺសន្តិសុខផ្ទៃក្នុង និងក្រៅប្រឈមទប់នឹងភេរវនិយម ការអភិវឌ្ឍន៍វិស័យការពារអឺរ៉ុប និងការតាមដាននៅព្រំដែនខាងក្រៅរបស់អឺរ៉ុប។ អឺរ៉ុបយល់ឃើញថា វាជារឿងបន្ទាន់ដែលអឺរ៉ុបត្រូវធ្វើកំណែទម្រង់ដើម្បីផ្តល់ជំនឿទុកចិត្តជាថ្មីដល់ប្រទេសសមាជិក ពិសេសប្រជាជនអឺរ៉ុប។ បើពុំនោះសោតទេ អឺរ៉ុបនឹងបន្តបែកបាក់ ហើយទីបំផុត គឺសហភាពអឺរ៉ុបទាំងមូលតែម្តងដែលត្រូវរលាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ